WENÉNÉ LE JAN A GYE (Évangile selon Jean) 17 - Kazambale lé Sebe Sauunu 1979

Jézu bazoro é zuomunu tɔ ma

¹ We ’konu fele zuo Jézu é yara nwa loru yé é léé: An Ti, a bléyi bɔ. Maa lé ke i Be nya ’ko, ’i an tɔ kɛlɛ blɛn yé maa i é tɔ kɛlɛ blɛn é ziin,

² fɛan zo lé bé se kɛlɛ an lɛ léé, an pla mi faa nwiin, munu lé i wo nɔ an lɛ, vole é yuɛma lé a glɛ ’ka lo, anlé a nɔle wo lɛ we ma.

³ Bii lé i ke Bale nya i do kpen, dé mi i dɔɔ, yé maa Jézu Krist lé i an pa zia, dé mi an dɔɔ, yee ɛ ke vole é yuɛma lé a glɛ ’ka lo, a nya.

⁴ Maa i tɔ kɛlɛ blɛn tɛrɛ la, yé nyanama lé bé nɔ an lɛ léé, maa a pa, maa a pale lɛ sɔɔ.

⁵ Yé sin, bii an Ti, ’i an tɔ kɛlɛ blɛn ibozen va, fua lé é ke an lee é kyɛn i va, ’té tɛrɛ ’ka tan lo, a nya.

⁶ Munu lé i wo si tɛrɛlamunu méléna yé i wo nɔ an lɛ, maa i tɔ gɔɔn wo lɛ. Wa izé nya, yé i wo nɔ an lɛ, yé wo tawo i dére ta.

⁷ Sin wa gi dɔɔ léé, fɛ faa lé bé nɔ an lɛ, i va lé é si,

⁸ yé dérenu lé bé pa an ’léé, maa a fe wo lɛ yé wa nyi si yé wa gi dɔɔ webozen nya léé, i va lé maa si, yé wo dɔ a ta léé, bii ɛ an pa zia.

⁹ Wo tɔ ma lé an ke bazorona. Maa ’ka bazorona tɛrɛlamunu tɔ ma lo, naa, munu lé i wo nɔ an lɛ, wo tɔ ma lé an ke bazorona. Wa izé nya, ’bɛzama.

¹⁰ Yé munu faa lé wo ke anzé nya, wa izé nya, yé munu faa lé wo ke izé nya, wa anzé nya é ziin, yé wolé we ma lé an tɔ kɛlɛ blɛn.

¹¹ Maa ’ka tɛrɛlamunu méléna é dɛrɛ lo; naa, wa tɛrɛlamunu méléna yé maa a gona i va. An Ti sauun, munu lé i wo nɔ an lɛ, ’i yuɛ pa wo va i tɔ nya, wo kɛlɛle mi do nya ko zo lé we ma.

¹² Bléyian va lé maa ke wo va tɛrɛ la, an yuɛ pa wo va i tɔ gi. Munu lé i wo nɔ an lɛ, an wo ta béli dɔ. Dé é ’ka sanzan do kpen nya lo, wo va mi do kpen ’ka san lɛ lo, we lé wa gyɛ Kazambale lé sɛbɛ gi, a lɛsɔɔle we ma.

¹³ Yé sin, maa a gona i va, yé maa we ’konu fé tɛrɛ la, léé, an gi boen a é nanale tegele fɛan zo yé wo gi é nana a zo.

¹⁴ Wo ’ka tɛrɛlamunu nya lo, bélé fɛan zo lé maa ’ka tɛrɛlami nya lo, a zo, bɛwemalé dé maa i dére fe wo lɛ, wo za a tɛrɛlamunu gi.

¹⁵ Maa ’ka a fena i lɛ léé, ’i wo si tɛrɛ la lo, naa, maa a fena i lɛ léé, ’i yuɛ pa wo va Nyanézan lé we ma.

¹⁶ Wo ’ka tɛrɛlamunu nya lo, bélé fɛan zo lé maa ’ka tɛrɛlami nya lo, a zo.

¹⁷ ’I wo pa é yɛrama ilé webozen nya; i dére a webozen nya.

¹⁸ Fɛan zo lé i an pa zia tɛrɛ la, a zo duo lé maa wo pa zia tɛrɛ la é ziin.

¹⁹ Yé maa anbozen pa é yɛrama wolé we ma, wo é ziin, wo pale é yɛrama webozen yɛrama we gi.

²⁰ Maa ’ka bazorona wo saa tɔ ma lo, naa, munu lé ’bɛnu bli é dan vo lɛ an lɛ wo dére lé we ma bɛ, maa a bazorona ’bɛnu tɔ ma é ziin,

²¹ wo kɛlɛle mi do nya we ma, bélé Bii an Ti, i a an gi yé maa a i gi fɛan zo, wo é ziin yé wo ’é kɛlɛ mi do nya a zo ko gi, yé tɛrɛlamunu a gi dɔɔ léé, bii ɛ an pa zia.

²² Fua tɔbɔle lé bé nɔ an lɛ, maa a nɔ wo lɛ, wo kɛlɛle mi do nya we ma, bélé fɛan zo lé maa valé bii ke mi do nya, a zo,

²³ ’té maa a wo gi, ’té bii a an gi, wo kɛlɛle tegele mi do nya we gi, yé tɛrɛlamunu a gi dɔɔ léé, bii ɛ an pa zia yé wa dɔɔ é ziin léé, wo sɔ i lɛ, bélé an sɔ i lɛ fɛan zo a zo.

²⁴ An Ti, é sɔ an lɛ léé, fɛana lé an ke, munu lé i wo nɔ an lɛ, ’wo kɛlɛ an va ana, anlé fua tɔbɔle lé bé nɔ an lɛ, wolé a yele we ma. An sɔ i lɛ tɛrɛ bɔrale ’lɛ, ’bɛ lé we ma.

²⁵ An Ti tegele, tɛrɛlamunu ’ka i dɔɔa lo, naa, maa i dɔɔ, yé an vamunu ’ko a gi dɔɔ léé, bii ɛ an pa zia.

²⁶ Maa i tɔ gɔɔn wo lɛ, yé maa dan a gɔɔn lɛ wo lɛ é ziin, sɔlɛle lé an sɔ i lɛ a nya, a kɛlɛle wo gi valé an kɛlɛle wo gi we ma é ziin.