WENÉNÉ LE JAN A GYE (Évangile selon Jean) 16 - Kazambale lé Sebe Sauunu 1979

¹ An we ’konu fe ka lɛ, bɔle ka va we ma, léé, té ka diéra lo.

² Wo dan ka bɔra lɛ bazorokɔnnu gi; yé é ziin bléyi do é dan bɔ lɛ, ’bɛna dé miomian é ka gyɛ é dan dɔ lɛ a gi léé, ’é a Kazambale bɔna.

³ Wo ’ka an Ti dɔɔa lo, yé wo ’ka an dɔɔa lo, bɛwemalé wo dan kɛlɛ lɛ a zo.

⁴ Maa we ’konu fe ka lɛ léé, dé a bléyi bɔ, yé a sele ’é dɔ ka gi léé, maa wo fe ka lɛ. A pélisiana, ’té maa a ka va, bɛwemalé maa ’ka a fe lɛ ka lɛ ’bɛ bléyi va lo.

Léli Sauun lé nyanamanu

⁵ Sin, maa a gona mi lé é an pa zia, a va, yé ka va mi do kpen ’ka a laana an lee léé: I go kyɛɛn? lo.

⁶ Naa, maa we ’konu fe aan wo ka lɛ, amalé ka bli kyɛ dɔ é baba bɛ.

⁷ Naa, webozen lé maa a fe ka lɛ duowo, dé an go ’bɛ fila vɔ ka lɛ; naa, dé an ’ka go lɛ lo, Tɔrɔpaazan ’ka dan da lɛ ka va lo; naa, dé an go maa dan a pa lɛ ka lɛ zia.

⁸ Dé é da, dé mɛ ɛ ke wenyané nyaa? dé mɛ ɛ ke we tegele nyaa? dé mɛ ɛ ke weblele nyaa? é dan tɛrɛlamunu bɔn gi kini lɛ wolé we ma.

⁹ Wo bli ’ka vo lɛ an lɛ lo, bɛwemalé we lé ke wenyané nya, é dan wo bɔn‐in kini lɛ ’bɛ lé we ma;

¹⁰ yé maa dan go lɛ an Ti va yé ka ’ka dan an ye lɛ é dɛrɛ lo, bɛwemalé we lé é ke we tegele nya, é dan wo bɔn‐in kini lɛ ’bɛ lé we ma;

¹¹ wo tɛrɛ ’ko nwiinzan blɛn lé we ble, bɛwemalé we lé ke weblele nya, é dan wo bɔn‐in kini lɛ ’bɛ lé we ma.

¹² We kiɛre a an gi yé é sɔ an lɛ léé, maa a fe ka lɛ é ziin, naa, ka ’ka bɔa wo gi ’male lɛ lao lo.

¹³ Tɔrɔpaazan lé é ke webozen Léli nya, dé é da é dan go lɛ ka nya webozen faa va. We lé é dan a fe lɛ, abo dére kaan lo, naa, we faa lé é dan a ’ma lɛ, yee lé é dan a fe lɛ, yé é dan wenu fale vɔ lɛ ka lɛ.

¹⁴ We lé é dan a fe lɛ, anlé we lé, bɛwemalé é dan an tɔ kɛlɛ lɛ blɛn.

¹⁵ Fɛ faa lé é ke an Ti lee, é a anzé nya, bɛwemalé maa léé, we lé é dan a fe lɛ ka lɛ, anlé we lé.

Bli kyɛdɔle é dan nɔla lɛ gi nanale nya

¹⁶ Maa a gona an Ti va, bɛwemalé é vo bléyi sɛ nya yé ka ’ka dan an ye lɛ é dɛrɛ lo; ’bɛ zuo sɛ ka dan an ye lɛ é ziin.

¹⁷ ’Bɛ zuo a zuomi kenu lé ’wo ke lɛ léé: We lé é a fe léé, é vo bléyi sɛ nya yé ka ’ka dan ’é ye lɛ é dɛrɛ lo, yé ’bɛ zuo sɛ ka dan ’é ye lɛ, naa, ’é a gona ’é Ti va, ’bɛ gi lé nɔɔ?

¹⁸ Bɛwemalé wo léé: We lé é a fe léé, é vo bléyi sɛ nya, ’bɛ gi lé nɔɔ? We lé é ke a fena, ko ’ka a gi maan lo.

¹⁹ Jézu a gi dɔɔ léé, é sɔ wo lɛ léé, ’wo we gi laa é lee, yé é lé wo lɛ léé: Ka a we laana ka ke lee, we lé maa a fe léé, é vo bléyi sɛ nya yé ka ’ka dan an ye lɛ é dɛrɛ lo, ’bɛ zuo sɛ ka dan an ye lɛ, a we ma.

²⁰ Maa fe ka lɛ kyɔ webozen nya, ka dan wuvɔ lɛ, yé ka dan gyɛ bo lɛ, yé tɛrɛlamunu gi é dan nana lɛ. Ka gi kyɛ é dan dɔ lɛ, naa, kalé gi kyɛ dɔle é dan nɔla lɛ gi nanale nya.

²¹ Dé le a né yaana, dé a yaabléyi bɔ a gi kyɛ éé dɔa, naa, dé é a yaa faa nyanéblele sele ’ka dɔa a gi é dɛrɛ lo, mi yaale tɛrɛ la lé gi nanale we ma.

²² Bɛwemalé ka é ziin, ka bli gi kyɛ a sin, naa, maa dan ka ye lɛ é ziin, yé ka gi é dan nana lɛ, yé mi do kpen ’ka dan ka gi nanale si lɛ ka lee lo.

²³ ’Bɛ yi nya, ka ’ka dan we do kpen gi laa lɛ an lee é dɛrɛ lo. Maa fe ka lɛ kyɔ webozen nya, dé ka fɛofɛan laa an Ti lee, é dan a nɔ lɛ ka lɛ an tɔ lé we ma.

²⁴ Fɔɔ bléyi ’ko va, ka ’ka tan we do kpen laa lɛ an tɔ gi ’lo. ’Ka fɛ laa, yé ka dan a ye lɛ, ka gi nanale tegelee we ma.

Maa tɛrɛla kele

²⁵ Maa we ’ko fe ka lɛ gɔnévɔlenu nya. A bléyi é dan bɔ lɛ, ’té maa ’ka we fé ka lɛ é dɛrɛ gɔnévɔlenu nya lo, naa, maa dan an Ti lé we fe lɛ ka lɛ kpaklaa.

²⁶ ’Bɛ yi nya ka dan fɛ laa lɛ an tɔ gi, yé maa ’ka a fé ka lɛ léé, maa dan bazoro lɛ an Ti lɛ ka tɔ nya lo;

²⁷ an sɔ ka lɛ, yé ka dɔ a ta léé, an si Kazambale va, bɛwemalé ka sɔ an Ti bozen lɛ.

²⁸ An si an Ti va, yé an da tɛrɛ la; sin, maa a sina tɛrɛ la yé maa go an Ti va.

²⁹ A zuomunu lé a lɛ léé: Sin, bii a we fena kpaklaa, yé i ’ka we do kpen fena gɔnévɔle nya lo.

³⁰ Sin ko a gi dɔɔ léé, i we faa dɔɔ, yé é ’ka lé mi do kpen é we laa i lee é dɛrɛ lo; bɛwemalé ko dɔ a ta léé, i si Kazambale va.

³¹ Jézu lé wo lɛ léé: Ka dɔ sin ’bɛ taa?

³² Ka ye, a bléyi é dan bɔ lɛ yé é bɔ tɛkɛ, yé ka dan fwila lɛ yé ka faa é go kalé fɛna do do, yé ka an vo an do; naa, an Ti a an va, amalé maa ’ka an do lo.

³³ Maa we ’konu fe ka lɛ ka vole drɔɔ an gi we ma. Ka dan nyané ble lɛ tɛrɛ la, naa, ’ka bli ta dɔ plɛplɛ; maa tɛrɛla kele.