WENÉNÉ LE JAN A GYE (Évangile selon Jean) 14 - Kazambale lé Sebe Sauunu 1979

Jézu a zi lé éé goo Ti va, a nya

¹ Té ka we do kpen gibɔrɔ pa lo. ’Ka bli vo Kazambale lɛ yé ’ka bli vo an lɛ é ziin ma.

² Nyanana kiɛre ana an Ti lé kɔn gi. Dé ’bɛ kaan lo, ’té maa a fe ka lɛ. Maa a gona ka nyanana ma’lɛrɛ lɛ ka lɛ.

³ Yé dé maa go, dé maa ka nyanana ma’lɛrɛ faa, maa dan da lɛ é ziin, yé maa dan ka sia lɛ yé maa go ka nya, yé fɛana lé an ke, yé ka kɛlɛ ana é ziin.

⁴ Fɛana lé maa ke gona, ka ana dɔɔ, yé ka alé zi dɔɔ.

⁵ Tɔmas lé a lɛ léé: Mizan, ko ’ka i gona dɔɔa lo ’naan, ko kɛla kaa yé ko alé zi dɔɔ?

⁶ Jézu lé a lɛ léé: Maa lé ke zi koo, webozen koo, vole é yuɛma koo, wo nya. Mi do kpen ’ka dan an Ti va lo, ’té dé é ’ka gié lɛ an va lo.

⁷ Dé é vo léé, ka an dɔɔ, ’té ka an Ti dɔɔ é ziin. Yé a pélisia sin ka a dɔɔ, yé ka a ye.

⁸ Filip lé a lɛ léé: Mizan, ’i Ti nagɔɔn ko lɛ, ’té ’bɛ kozé bɔ.

⁹ Jézu lé a lɛ léé: Filip, ana mɔn ’té maa a ka va, yé i ’ka tan an dɔɔ lɛ loo? Mi lé é an ye, é an Ti ye. É kɛlɛ kaa yé i léé, an Ti nagɔɔn ’wo lɛɛ?

¹⁰ Maa a an Ti gi yé an Ti a an gi, i ’ka paan ’bɛ ta loo? Dérenu lé maa wo fé ka lɛ, anbo dére kaan lo. An Ti lé é ke an gi, yee ɛ ke élé nyanamanu pana.

¹¹ Maa a an Ti gi yé an Ti a an gi. Ka ’maa? Dé ’bɛ kaan lo, an kɛlɛwe ’konu a gɔɔn é ziin.

¹² Maa fe ka lɛ kyɔ webozen nya, mi lé é an si, é dan an kɛlɛwenu kɛlɛ lɛ é ziin yé an gole an Ti va lé we ma lé, ’bɛzan kɛlɛwenu é dan kɛlɛ lɛ blɛn é minié anzé ta.

¹³ Yé we faa lé ka a laan an tɔ gi, maa a kɛla, an Ti tɔ kɛlɛle blɛn, maa a Be gi we ma.

¹⁴ Dé ka weowean laa an tɔ gi, maa a kɛla.

Jézu léé, é dan Léli Sauun nɔ lɛ

¹⁵ Dé an sɔ ka lɛ, ’ka anlé bélidɔwenu kɛlɛ ma.

¹⁶ Yé maa dan bazoro lɛ an Ti lɛ, yé é dan tɔrɔpaazan bɛ nɔ lɛ ka lɛ, yé ’bɛ é dan vo lɛ ka va yifaama.

¹⁷ Yee tɔrɔpaazan lé ke webozen Léli nya; tɛrɛlamunu ’ka a yé lo, yé wo ’ka a dɔɔa lo, bɛwemalé wo ’ka bɔa a sile lɛ wozé nya lo; naa, ka a dɔɔ, é a é nyanale ka va yé é dan kɛlɛ lɛ ka gi, azama.

¹⁸ Maa ’ka dan ka vo lɛ bugalazannu valé tigalazannu zo lo; maa dan da lɛ ka va.

¹⁹ É vo sɛ yé tɛrɛlamunu ’ka dan an ye lɛ é dɛrɛ lo, naa, maa a é yuɛma, yé ka dan kɛlɛ lɛ é yuɛma é ziin, amalé ka dan an ye lɛ.

²⁰ ’Bɛ yi la, ka dan a dɔɔ lɛ léé, maa a an Ti gi, yé ka a an gi, yé maa a ka gi.

²¹ Mi lé anlé bélidɔwenu ke a lee, ’té éé wo kɛla, yee ɛ lɛ lé an sɔ, yé mi lé an sɔ a lɛ, é dan sɔ lɛ an Ti lɛ, yé é dan sɔ lɛ an lɛ, yé maa dan anbozen nagɔɔn lɛ a lɛ.

²² Judas we fe, Kariɔtzan Judas kaan lo, Judas bɛ ’bɛ, ’bɛ lé a lɛ léé: Mizan, mɛwemalé i dan ibo nagɔɔn lɛ ko lɛ, yé i ’ka ibo nagɔɔn‐an tɛrɛlamunu lɛ loo?

²³ Jézu lé a lɛ léé: Dé an sɔ mianzan lɛ, é dan tawo lɛ an dére ta, yé é dan sɔ lɛ an Ti lɛ, yé ko dan da lɛ a va, yé ko dan ko nyanana kɛlɛ lɛ a va.

²⁴ Mi lé an ’ka sɔa a lɛ lo, é ’ka tawoo an dérenu ta monomono lo, yé dére lé ka a maan, anbo dére kaan lo, naa, an Ti lé é an pa zia, a dére lé.

²⁵ Bléyian va lé maa ke ka va, maa we ’konu fe ka lɛ.

²⁶ Naa, tɔrɔpaazan lé é ke Léli Sauun nya, ’té Ti é dan a pa lɛ zia an tɔ gi bɛ, é dan we faa paa lɛ ka gi, yé we faa lé maa a fe ka lɛ, é dan wo sele dɔ lɛ ka gi.

²⁷ ’Ka vo drɔɔ. Maa anlé vole drɔɔ no ka lɛ. Maa ’ka a no ka lɛ bélé fɛan zo lé tɛrɛlamunu a no ka lɛ, a zo lo. Té ka we do kpen gi bɔrɔ pa lo. Té ka kana monomono lo.

²⁸ Ka a ’ma an ta léé, maa a gona, yé maa dan da lɛ é ziin ka va. An Ti blɛn mini an ta; bɛwemalé, dé an sɔ ka lɛ, ka gi é dan nana lɛ an gole an Ti va we ma.

²⁹ Yé sin, maa we ’konu fe ka lɛ wo bɔle ’lɛ, yé dé wo bɔ, yé ka bli é vo an lɛ.

³⁰ Maa ’ka dan we kiɛre fe lɛ ka lɛ é dɛrɛ lo. Tɛrɛlamunu nwiinzan blɛn a dana yé an kunmawe ’ka a gi lo.

³¹ Naa, é a lé tɛrɛlamunu a gi dɔɔ léé, an Ti sɔ an lɛ yé maa a dére tawe kɛla. ’Ka nwa fɛkona, kaa go.