WENÉNÉ LE JAN A GYE (Évangile selon Jean) 12 - Kazambale lé Sebe Sauunu 1979

Lezan lasikɔrɔ zén Jézu ma Bétani

¹ Dé é vo yi suiɛdo yé wo Taboyi lé fɛti pélisia, Jézu go Bétani, fɛana lé é Lazaa nwa gamunu va, ana.

² Wo fɛ kɛlɛ a lɛ ’bɛna é nyanadi; Maate fɛ nɔ wo lɛ yé munu lé wo ke fɛblena Jézu va, Lazaa a wo va mi do nya.

³ Lasikɔrɔ lé é ke nari bozen nya é vlɛ nya blɛn, kilo buu nya, Mari a si yé é a zén Jézu gane ma, yé é a ganenu ma boo é nwin nya. Yé lasikɔrɔ gin kɔn ’ko fan.

⁴ Jézu zuomi do, Kariɔtzan Simɔn be Judas, mi lé é dan yee Jézu pa lɛ munu lee bɛ, é léé:

⁵ Mɛmalé wo ’ka lasikɔrɔ ’ko dan lɛ dénié wuru do yɔ soru va yé wa mafɛ nɔ nyanégyɛmunu lɛ loo?

⁶ É ’ka kɛlɛ lɛ léé, nyanégyɛmunu lé we gi bɔrɔ a a ma, ’bɛ we ma lé é a fe lo; kyeenzan lé ke a nya; kolé gɔɔlipabala a yee ɛ lee, yé fɛ lé ko paan a gi, éé ’bɛ sié, bɛwemalé é a fena.

⁷ Naa, Jézu léé: ’Ka daan lezan ’ko ma. É lasikɔrɔ ’ko tadɔ turu an payi lé we ma.

⁸ Nyanégyɛmunu a ka va yifaama; naa, maa ’ka ka va yifaama lo.

Wo Lazaa ma we ble

⁹ Juifi mi kiɛre a ’ma léé, Jézu a Bétani, yé wo da ana. Wo ’ka da lɛ yee saa lé we ma lo, naa, wo da Lazaa lé é ’bɛ nwa gamunu va, ’bɛ yele we gi é ziin.

^10-11 Juifi mi kiɛri péli si Balebanmunu segelenu va Lazaa lé we ma, yé wo zén Jézu zuo, bɛwemalé Balebanmunu segelenu ’wo gi pa léé, ’wo Lazaa gyɛ é ziin.

Jézu bɔra Jérusalɛm minwiinzan blɛn nya

¹² ’Bɛ é tu kini, mi gu blɛn da fɛti la. Wa ’ma aan wo léé, Jézu a dana Jérusalɛm,

¹³ amalé wo yɔlaanu sia yé wo go a si lɛ zia siaale nya léé: Ozana, mi lé é da Mizambale tɔ gi, a drɔɔ ’é vo ma! Izraɛl nwiinzan blɛn drɔɔ ’é vo ma!

¹⁴ Jézu sokofale boroné do ye, yé é nyana a punu, é a é gyɛle sɛbɛ gi fɛan zo, a zo, léé:

¹⁵ Siɔn munu, té ka kana monomono lo; Ka ye, ka nwiinzan blɛn a dana, É nyanale sokofale tina lé né punu.

¹⁶ É vinin a zuomunu ’ka we ’konu gi ’ma lɛ lo, naa, Jézu wɔra aan wo élé fua gi, a sele dɔ wo gi léé, wo we ’konu gyɛ sɛbɛ gi alé we ma yé a kɛlɛwenu yee sɛbɛ gi we lɛ sɔɔ.

¹⁷ Bléyian va lé Jézu Lazaa laa léé, ’é si gɔlɛkoro gi, yé é a nwa gamunu va, munu faa lé ’bɛnu ke Jézu va ’bɛ bléyi va, ’bɛnu alé we fe.

¹⁸ Munu a ’ma léé, é gyɛzorowe ’ko kɛlɛ, bɛwemalé wo go a si lɛ zia.

¹⁹ Yé Farizimunu lé ’wo ke lɛ léé: Ka yua bɛ, kalé we ’ko ’ka vɔna a ma lo. Ka ’ka a yé loo? Munu faa go a zuo bii.

Grɛki mi kenu da Jézu nagini lɛ

²⁰ Munu lé wo da Kazambale bɔ lɛ fɛti yinu la, Grɛki mi kenu a wo va.

²¹ Yé wo go Galilé tɛrɛ lé Bɛtsaidazan Filip va yé wo lé a lɛ léé: Kozan, é sɔ ko lɛ léé, ko Jézu ye.

²² Filip go a fe lɛ André lɛ, yé André valé Filip go a fe lɛ Jézu lɛ.

²³ Yé Jézu a zi pa wo lɛ léé: Bléyian va lé wo dan maa blami Be tɔ kɛlɛ lɛ blɛn, é bɔ.

²⁴ Maa fe ka lɛ kyɔ webozen nya, ’sawɔlɛ do lé wa vɔ, dé a gɔn ’ka bɔ lɛ lo, é vo é do; naa, dé a gɔn bɔ, éé baan di.

²⁵ Mian alé tɛrɛla we ke a lee, é dan vuru lɛ a gi; yé mian alé tɛrɛla za ke a gi tɛrɛ la ’ko, azé ta a é dɔle vole é yuɛma lé a glɛ ’ka lo, a gi.

²⁶ Dé é sɔ mian lɛ léé, é anlé nyanama pa, ’é da an zuo ma; yé fɛana lé an ke, ana lé anlé nyanamapazan é dan kɛlɛ lɛ é ziin. Mian éé anlé nyanama paan, an Ti é dan ’bɛzan tɔ kɛlɛ lɛ blɛn.

É a lé wo blami Be dun

²⁷ Sin, gi bɔrɔ pa an ma. Dé maa dan a fe lɛ nɔɔ? Maa dan a fe lɛ léé, an Ti, ’i an si we ’ko gii? Gba, we ’ko ma lé bléyi ’ko bɔ an ma.

²⁸ An Ti, ’i tɔ kɛlɛ blɛn ma. Yé dére do we la gi yé é léé: Maa a kɛlɛ blɛn, yé maa dan a taa kɛlɛ lɛ blɛn é ziin.

²⁹ Mi gu lé wo ke ana bɛ, wa ’ma yé wo léé: Zagele ɛ ban bɛ. Mi kenu léé: Lanje do ɛ ke we fena a lɛ.

³⁰ Jézu léé: Wo ’ka dére ’ko fe lɛ anlé we ma lo; kalé we ma lé wa fe.

³¹ Sin, tɛrɛlamunu lé weblebléyi bɔ yé wo dan tɛrɛ ’ko nwiinzan vuli lɛ béera.

³² Yé maa, dé wo an si yian ma tɛrɛ la yé wo an dun loru, maa dan mi faa gana lɛ an va.

³³ É we ’ko fe wo lɛ é gabɛ gɔɔnle wo lɛ we ma.

³⁴ Yé mi gu lé a lɛ léé: Ko a ’ma bélidɔwe sɛbɛ gi léé, Krist é dan vo lɛ é yuɛma lɛɛfaama. Yé mɛmalé bii léé, é a lé wo blami Be duun? De ɛ ke ’bɛ blami Be ’ko nyaa?

³⁵ Jézu lé wo lɛ léé: San ana é ziin bléyi sɛ nya ka méléna. Bléyian va lé san ke ka va, ’ka tawo, té béli é tan ka ma lo; mi lé é ke tawona gunutinu va, é ’ka é gona dɔɔa lo.

³⁶ Bléyian va lé san a ka va, ka bli é vo san lɛ, ka va kinile we gi. Jézu we ’konu fe aan wo, é go yé é yɔɔ wo lee baa.

Juifinu ’ka wo bli pa lɛ a lɛ lo

³⁷ É gyɛzorowe kiɛre kɛlɛ wo yuɛ va, yé wo ’ka wo bli vo lɛ a lɛ duowo lo,

³⁸ dére lé balelayezan Ézai a fe, a lɛsɔɔle we ma. É léé: Mizambale, de ɛ bli vo kolé wefedére lɛɛ? Yé de lɛ lé Mizambale élé plɛplɛ nagɔɔn?

^39-40 Ézai lé é ziin léé: É wo yuɛ ’wii, yé é wo tɔné gi kɛlɛ yuyu, Dé wo da fɛ ye ’wo yuɛ nya; Dé wo da we ’ma ’wo bli gi, Dé wo da ’wo bli nɔla yé maa wo béli. Bɛwemalé wo ’ka bɔ lɛ ’wo bli vole lɛ a lɛ é ziin lo.

⁴¹ Bléyian va lé Ézai Mizan lé fuasan ye, é we ’konu fe, yé é a ma we fe.

⁴² Minwiinmunu méléna, mi kiɛre pa Jézu ta duowo, naa, Farizimunu lé we ma lé wo ka a fe lɛ gɔrɔ la lo, dé ’bɛnu é da wo bɔra bazorokɔn gi.

⁴³ Naa, munu lé wo tɔbɔle sɔ wo lɛ é mini Kazambale lé wo tɔbɔle ta.

Jézu dére éé munu lé we blé

⁴⁴ Jézu siaa yé é léé: Mi lé a bli vo an lɛ, an lɛan a bli vo lo; mi lé é an pa zia, ’bɛzan lɛ lé a bli vo;

⁴⁵ yé mi lé éé an yé, mi lé é an pa zia, éé ’bɛzan yé.

⁴⁶ Maa ɛ ke san nya, yé maa ɛ da tɛrɛ la léé, dé miomian bli vo an lɛ, é ’ka vo gunutinu va lo.

⁴⁷ Dé mi do an dérenu maan yé é ’ka tawo wo ta lo, maa ’ka alé weblezan nya lo; maa ’ka da lɛ tɛrɛlamunu lé we blele we ma lo, naa, an da tɛrɛlamunu sile we gi we ma.

⁴⁸ Mi lé éé sɔn vɔa an ma, yé é ’ka tawoo an dérenu ta lo, alé weblezan ana; dérenu lé maa wo fe, wo ta lé Bale é dan alé we ble lɛ yi voéla nya.

⁴⁹ Wean maa a fe, anbo ’léé dére kaan lo, naa, we lé é a lé maa a fe, é valé dérenu lé é a lé maa a fe, an Ti lé é an pa zia, yeebozen ɛ a pa an ’léé.

⁵⁰ Yé maa a gi dɔɔ léé, a dére éé mi voo é yuɛma, ’bɛ glɛ ’ka lo. Bɛwemalé, wenu lé maa ke wo fena, maa a wo fena fɛan zo lé an Ti wo pa an ’léé, a zo.