WENÉNÉ LE JAN A GYE (Évangile selon Jean) 10 - Kazambale lé Sebe Sauunu 1979

’Blagɔrɔ ma gɔné vɔle

¹ Maa fe ka lɛ kyɔ webozen nya, mian é ’ka wɔraan ’blagɔrɔ ’léé zia lo, naa, éé wɔraan a fɛ bɛna zia, é a kyeenwozan valé ’bla?-?gyɛzan nya.

² Naa, mi lé éé wɔraan gɔrɔ ’léé zia, é a ’blanu tabinzan nya.

³ ’Blagɔrɔtabinzan éé gɔrɔ lɛ soo a lɛ, yé ’blanu a dére maan. ’Blanu lé wo ke azé nya, éé wo laan ’wo tɔ nya, ’té éé goo wo nya béera.

⁴ Abozen lé ’blanu faa bɔrale zuo, éé tawoo wo ’lɛ. ’Blanu a dére dɔɔ, amalé woo goo a zuo.

⁵ Wo ’ka goo mi bɛnu zuo lo; wo ’ka mi bɛnu dére dɔɔa lo, amalé woo vian buruwo ’bɛnu lee baa.

⁶ Jézu gɔné ’ko vɔ wo lɛ, Naa, we lé é ke a fena wo lɛ, wo ’ka a gi ’ma lɛ lo.

Jézu a ’blatabinzan zima nya

⁷ Jézu lé é ziin wo lɛ léé: Maa fe ka lɛ kyɔ webozen nya, maa a ’bla gɔrɔ ’léé nya.

⁸ Munu faa lé wo da an ’lɛ é kyɛn, wa kyeenwozannu valé migyɛzannu nya. Naa, ’blanu ’ka tɔné dɔ lɛ wo lɛ monomono lo.

⁹ Maa a gɔrɔ ’léé nya. Dé mian é wɔra an vazia é dan si lɛ we gi; é dan wɔra lɛ, yé é dan bɔra lɛ, yé é dan fɛblelenu ye lɛ.

¹⁰ Kyeenwozan éé dan kyeenwole koo, fɛ gyɛle koo, fɛ sɛrɛle koo, wo saa ɛ we ma; an da ’blanu vole é yuɛma we gi, é valé wo fuu dɔle wo ta we ma fɔɔ yé é gié é glɛ ta.

¹¹ Maa a ’blatabinzan zima nya. ’Blatabinzan zima éé gaan ’élé ’blanu ta.

¹² Naa, nyanamapazan lé é ’ka ’blatabinzan nya lo, ’té ’blanu ’ka azé nya lo, dé é glau ye dana éé sié ’blanu zi yé éé vian buruwo, ’té glau éé wo kunwo, ’té ’bɛ éé wo fwilaan.

¹³ Nyanamapazan éé vlan buruwo; é a nyanamapazan nya é pla, yé é ’ka ’blanu lé gi bɔrɔ paan lo, azama.

¹⁴ Maa a ’blatabinzan zima nya. Maa anlé ’blanu dɔɔ yé wo an dɔɔ,

¹⁵ fɛan zo lé an Ti an dɔɔ yé an Ti dɔɔ, a zo, yé maa gaan anlé ’blanu ta.

¹⁶ ’Bla bɛnu a é ziin anzé nya, ’té wo ’ka gɔrɔ ’ko gi ’blanu nya lo. ’Bɛnu é ziin, é a lé an da wo nya; wo dan an dére ’ma lɛ yé wo dan kɛlɛ lɛ trubɛ do kpen nya yé ’blatabinzan é dan kɛlɛ lɛ do kpen.

¹⁷ Maa gaan an nwale é ziin we gi, bɛwemalé an sɔ an Ti lɛ.

¹⁸ Mi do kpen ’ka an gya lo, naa, maa anbo no gale lɛ. A se a an lɛ léé, an ga yé a se a an lɛ léé, an nwa é ziin. ’Ko zo lé an Ti an béli dɔ.

¹⁹ Dére ’konu lé we ma lé Juifinu gi bɔi é ziin.

²⁰ Wo va mi kiɛre léé: Yo a a gi; gwe a a ’wuo gi; mɛmalé ka tɔné dɔa a lɛɛ?

²¹ Yé a kenu léé: Dére ’konu ’ka yoagizan dérenu nya lo; yo éé bɔaléé, é yuɛwiizannu yuɛnu fuoo?

Juifinu sɔn vɔ Jézu ma

²² Wa kɔn nɔle Bale lɛ lé fɛti kɛlɛna Jérusalɛm.

²³ É a dunubléyi nya ’té Jézu a dɔwona Balebangikɔn lɛɛ lé Salomɔn a kɛlɛ, a wuo.

²⁴ Yé Juifinu a zi lɛ sɔɔ yé wo lé a lɛ léé: Ko a ko tanyila, i dan ko bɔn‐in kini lɛ mɛ bléyi vaa? Dé bii ɛ ke Krist nya, bé fe ko lɛ kpaklaa.

²⁵ Jézu lé wo lɛ léé: Maa a fe ka lɛ yé ka ’ka dɔ lɛ a ta lo. Nyanamanu lé maa ke wo pana an Ti tɔ gi, woo ɛ an ma we fé.

²⁶ Naa, ka ’ka anlé ’blanu nya lo, bɛwemalé ka ’ka pa lɛ wo ta lo.

²⁷ Anlé ’blanu an dére maan, yé maa wo dɔɔ yé woo dan an zuo.

²⁸ Vole é yuɛma lé a glɛ ’ka lo, maa wo wɔra ’bɛ gi, yé wo ’ka dan zamaga wo lɛ monomono lo; yé mi do kpen ’ka dan wo si lɛ an lee gla nya lo.

²⁹ An Ti lé é wo nɔ an lɛ, a blɛn mini fɛ faa ta, yé mi do kpen ’ka bɔa wo sile lɛ an Ti lee gla nya lo.

³⁰ Maa valé an Ti, ko a do.

³¹ Yé Juifinu gɔlɛ sia é ziin a gyɛle we ma.

³² Jézu lé wo lɛ léé: Maa an Ti panyanama zima kiɛre pa ka yuɛ va; wo va nyanama kyɛn lé we ma lé ka gɔlɛ vulian an vaa?

³³ Juifinu lé a lɛ léé: Ko ’ka gɔlɛ vulina i va nyanama zin lé we ma lo; naa, i Kazambale sɔnɔ yé bii lé i ke mi nya, i ’ibo kɛlɛ Bale nya, amalé ko gɔlɛ vulian i va.

³⁴ Jézu a zi pa wo lɛ léé: É ’ka é gyɛle kalé bélidɔwe sɛbɛ gi léé: Maa léé: Ka a balenu nya, loo?

³⁵ Munu lé wo Kazambale lé we fe wo lɛ, dé Kazambale lé sɛbɛ wo laa balenu, yé dé sɛbɛgiwe ’ka bɔaléé, é kɛlɛ we pla nya lo,

³⁶ maa lé Kazambale an pa é yɛrama yé é an pa zia tɛrɛlamunu va, dé maa a fe léé, Bale Be lé ke an nya, yé ka léé, an Bale sɔnɔɔ?

³⁷ Nyanama lé an Ti a paan, dé an ’ka a paan lo, té ka bli é vo an lɛ lo.

³⁸ Naa, dé maa wo paan, dé ka bli ’ka vo an lɛ lo, ka bli ’é vo yee nyanama ’konu lɛ, kalé a gi dɔɔle valé kalé a yele we gi léé, an Ti a an gi yé maa a an Ti gi.

³⁹ ’Bɛna tɔɔn wa kwa kulina é ziin léé, wa kun; naa é so wo lee.

⁴⁰ Jézu go é ziin Juudɛn yuu zi, fɛana lé Jan munu batizéwo é vinin, ana. Yé é nyana ana.

⁴¹ Mi kiɛre da a va yé wo léé: Jan ’ka gyɛzorowe do kpen kɛlɛ lɛ lo, naa, we faa lé Jan a fe mi ’ko ma, é a wezen nya.

⁴² Yé mi kiɛre bli vo a lɛ ’bɛna.