WENÉNÉ LE JAN A GYE (Évangile selon Jean) 1 - Kazambale lé Sebe Sauunu 1979

Dére kinin mi nya

¹ A pélisiana Dére a, ’té Dére a Kazambale va, ’té Dére a Kazambale nya.

² A pélisiana ’té é ana Kazambale va.

³ É fɛnu faa kɛlɛ, yé fɛofɛan wo ’bɛ kɛlɛ, ’té yee ’ka ’bɛ kɛlɛ lɛ lo, ’bɛ fɛ ’ka lo.

⁴ A gi lé vole é yuɛma ke, yé yee vole é yuɛma a munu lé san nya.

⁵ Yé yee san ’ko éé bié gunutinu va, yé gunutinu ’ka mini lɛ a ta lo.

⁶ Kazambale mi do nwunvɔ, wa laama Jan.

⁷ É da kɛlɛ lɛ wenayezan nya san lé we fele we gi, léé, munu faa bli é vo a lɛ ’é dére ta.

⁸ É ’ka san nya lo, naa, é da san lé we fele we gi.

⁹ San ’ko a san bozen nya; é da tɛrɛ la, yé é munu faa va kini.

¹⁰ Dére a tɛrɛ la yé é tɛrɛ kɛlɛ, yé tɛrɛlamunu ’ka a dɔɔ lɛ lo.

¹¹ É da élé munu va, yé alé munu ’ka a si lɛ wozé nya lo.

¹² Naa, munu faa lé wa si ’wozé nya, ’té wo bli vo a tɔ lɛ bɛ, é a se kɛlɛ wo lɛ léé, ’wo kinin Kazambale lé nénu nya.

¹³ Wo ’ka wo yaa lɛ tɛrɛla né yaabɛ nya lo, wo ’ka wo yaa lɛ blaminu lé sɔlɛwe nya lo, wo ’ka wo yaa lɛ mi lé blibɔmale nya lo, naa, wo wo yaa Kazambale lé blibɔmale nya.

¹⁴ Yé Dére kinin mi nya, yé é nyana ko va; ’té zin valé webozen saa ɛ ke a gi; yé ko alé fuasan nagini, mi lé é ke é Ti Be wɔlɛ do kpen lé, a zoɛ bɛ ’ka lo, a nya, ’té é si é Ti va, yee ɛ lé fuasan lé ko a nagini.

¹⁵ Jan alé we fe, yé é siaa léé: Mi lé maa alé we fe léé: Mi lé é dan an zuo, yee ɛ ke an ’lɛ, naa, é ana an ’lɛ é vinin, yee lé é ke bɛ.

¹⁶ Fɛ lé é ke a gi saawo bɛ, é a ke nɔ ko faa lɛ blɛ nya, yé é zin kiɛre kɛlɛ ko lɛ.

¹⁷ Moizi ɛ da bélidɔwe nya, naa, Jézu Krist ɛ da zin valé webozen nya.

¹⁸ Mi do kpen ’ka tan Kazambale ye lɛ lo; a Be do kpen lé, a zoɛ bɛ ’ka lo, ’té yeebozen ke Bale nya, ’té é ke é Ti bɛ gi, yee ɛ a nagɔɔn.

Mi batizéwozan Jan lé wenayedére

¹⁹ Juifinu lé wo ke Jérusalɛm, wo Balebanzannu valé Lévinu nwunvɔ we laale Jan lee we gi léé: De ɛ ke i nyaa?

²⁰ Yé Jan ébo mawe fe yé é ’ka a ta yɔɔ lɛ lo, yé é léé, yeebozen ’ka Krist nya lo.

²¹ Yé wa laa a lee léé: I a de ɛ nyaa? Éli lé i nyaa? Yé é léé: Maa ’ka ’bɛ nya lo. Yé wo léé: Balelayezan‐o bɛ, bii ɛ ke a nyaa? Yé é léé: Gba.

²² Yé wo lé a lɛ léé: ’A, de nya lé i kee? Ko a a va léé, munu lé wo ko pa zia, ko ilé we zuo fe wo lɛ. Mɛ we lé bé fé ibozen maa?

²³ É léé: Balelayezan Ézai a gyɛ élé sɛbɛ gi léé: Mi lé é ke siaana bwi gi, a dére lé ke ’ko: ’Ka Mizan lé zi ta bɔ ékema. Yee dére lé ke an nya.

²⁴ Munu lé, wo ’bɛnu nwunvɔ, wa Farizimunu nya.

²⁵ Yé ’bɛnu we laa a lee léé: Dé i ’ka Krist nya lo, dé i ’ka Éli nya lo, dé i ’ka balelayezan‐o ’bɛ nya lo, mɛmalé i munu batizéwoo?

²⁶ Jan lé wo lɛ léé: Maa munu batizéwoo ’yi nya, naa, mi do a ka méléna, ka ’ka ’bɛzan dɔɔa lo;

²⁷ ’bɛzan é dan da lɛ an zuo; a yara ’ka an yara lé maa ’bɛlé sawala bale fuo lo.

Kazambale lé ’Blané lé ke ’ko

²⁸ Wo we ’konu kɛlɛ Bétani, Juudɛn yuu zi, fɛana lé Jan munu batizéwo, ana.

²⁹ ’Bɛ é tu kini, Jan Jézu ye dana ’é va, yé é léé: Kazambale lé ’Blané lé éé munu lé wenyané sié wo lee, yee lé é dan bɛ.

³⁰ Mi lé maa alé we fe léé: Mi lé é ke an ’lɛ, é dan da lɛ an zuo, naa, é ana an ’lɛ é vinin, yee lé ke bɛ.

³¹ Maa ’ka a dɔɔ lɛ lo, naa, a nagɔɔnle Izraɛl munu lɛ we gi léé, an da munu batizéwo lɛ ’yi nya.

³² Jan wean na ye, é a fe, yé é léé: Maa Kazambale Léli ye sina la gi, ’té éé zunwo bélé plala zo, yé é dɔ a nwiin.

³³ Maa ’ka a dɔɔ lɛ lo, naa, mi lé é an pa zia léé, an munu batizéwo ’yi nya, yee ɛ fe an lɛ léé: Mi lé i dan Kazambale Léli ye lɛ zunna a ta, yé é dɔ a nwiin, yee ɛ ke mi lé é dan munu batizéwo lɛ Léli Sauun nya bɛ, a nya.

³⁴ Yé maa a ye, yé maa a mawe fe léé, é a Kazambale Be nya.

Jézu zuomunu vininzannu

³⁵ ’Bɛ é tu kini, Jan ana mi ’é zuomi fié va é ziin,

³⁶ yé dé Jézu a giéna Jan a nagini, yé é léé: Kazambale lé ’Blané lé é ke bɛ.

³⁷ Dé a zuomunu fié dére ’ko ’ma a ta, wo go Jézu zuo.

³⁸ Jézu nɔla yé é a ye aan wo léé, wa dana ’yee ɛ zuo, é lé wo lɛ léé: Mɛ fɛ lé ka ke a gininaa? Yé wo lé a lɛ léé: Rabi, ’bɛ gi léé, ’wozan, i nyanaan kyɛɛn?

³⁹ É lé wo lɛ léé: ’Ka da, ka ana ye. Wo go, yé fɛana lé éé nyanaan, wo ana ye, yé ’bɛ yi la wo vo a va mi. Dé yiri tɛnla bléyi léé? a nya.

⁴⁰ Mi fié lé wo Jan dére ’ma yé wo go Jézu zuo, a do lé é ke Simɔn Piɛri zuané André nya.

⁴¹ Dé é si Jézu va é go é bwe Simɔn va tegelee, yé é lé a lɛ léé: Ko Mɛsi ye, ’bɛ gi léé, Krist.

⁴² Yé é go ’bɛ nya Jézu va. Jézu ’bɛ nagini yé é léé: Bii a Jonas be Simɔn nya; wo dan i laa lɛ Séfa, ’bɛ gi léé, Piɛri. A gi léé é ziin, gɔlɛ.

Jézu Filip valé Natanaɛl laa

⁴³ ’Bɛ é tu kini, é sɔ Jézu lɛ léé, ’é go Galilé tɛrɛ la, yé wo kee Filip nya. Yé é lé ’bɛ lɛ léé: ’I da an zuo.

⁴⁴ Filip a Bɛtsaidazan nya, yé ’bɛ ɛ ke André valé Piɛri lé fla nya.

⁴⁵ Filip valé Natanaɛl kee, yé Filip lé a lɛ léé: Mi lé Moizi alé we gyɛ bélidɔwe gi yé balelayezannu a mawe fe, ko a ye, Nazarɛtzan Jézu, Jozɛfu be lé.

⁴⁶ Natanaɛl lé a lɛ léé: Fɛ zin é bɔa sile lɛ Nazarɛt? Filip lé a lɛ léé: ’I da, bé ye.

⁴⁷ Jézu Natanaɛl ye aan wo dana é va, é a mawe fe léé: Izraɛl mi do lé, dabli we do kpen ’ka a gi lo, yee lé é ke ’ko webozen nya.

⁴⁸ Natanaɛl lé a lɛ léé: I an dɔɔ fɛ kyɛnnaa? Jézu a zi pa a lɛ léé: Bléyian va lé Filip ’ka tan i laa lɛ lo, ’té i a é dɔle bɔrɔyili wuo, ’bɛna lé maa i ye.

⁴⁹ Natanaɛl lé a lɛ léé: Anzan, bii a Kazambale Be nya. Bii a Izraɛl munu nwiinzan blɛn nya.

⁵⁰ Jézu lé a lɛ léé: Maa a fe aan wo i lɛ léé, maa i ye bɔrɔyili wuo, bɛwemalé i pa an taa? Wenu lé wo blɛn mini we ’konu ta, i dan ’bɛnu ye lɛ.

⁵¹ Yé é lé a lɛ léé: Ka dan la lɛ ye lɛ é sole, yé ka dan Kazambale lé lanjenu ye lɛ gona loru, ’té woo zunwo, maa blami Be ta. Maa fe ka lɛ.