Jérémi 9 - Kazambale lé Sebe Sauunu 1979

¹ Yiba! dé é kɛlɛ kɔɔn léé, an ’wuo a é fanle ’yi nya, Dé an yuɛ a kɔɔn ’yibɔna zo, ’Té maa dan anlé munu galenu wuvɔ lɛ, Bladi nyanadi.

² Oo, dé é vo léé, kɔn do a an lee bwi gi giézannu nyanana nya, ’Té an sɔn vɔ anlé munu ma yé an si wo ma baa; Naa, wo faa a le bɛ valé gɔné bɛ ginizannu nya; Wa dabli munu nya.

³ Wo nɛnɛ a é ganale bélé sa zo, ’té woo vié vulian a nya. Dé wa plɛplɛ tɛrɛ ’ko la, ’té webozen‐an é wo dɔ plɛplɛ lo. Naa, woo goo we lɛrɛlɛrɛ kɛlɛle nya, ’té woo goo a kɛlɛle nya, ’Té wo ’ka an dɔɔa lo. Maa Gakelebale ɛ ke a fena.

⁴ É a lé mi faa do do ébo tabin é béé lee, Yé té wo bli é vo wo bwe do kpen lɛ lo. Naa, bwenu faa a dablikɛlɛzi ginina, Yé mi béénu faa a mi tɔ sɛrɛna.

⁵ Wa wo ke tanna, Yé wo ’ka webozen fé pelo; Viéwole a wo baagiwe nya, Yé woo wenaané kɛlɛle draan.

⁶ I nyanaan vié méléna, Vié nya lé wo sɔn vɔ an dɔɔle ma. Maa Gakelebale ɛ ke a fena.

⁷ Amalé lai sunyanu lé Gakelebale léma: Ka ye, maa dan wo zuo kuli lɛ, yé maa dan wo gi dan lɛ, Naa, maa dan a kɛlɛ lɛ kaa anlé munu lé we maa?

⁸ Wo nɛnɛ a mi gyɛ din nya, Woo vié saa woo, Woo vole drɔɔ fé ’wo bɔluzan lɛ ’wo ’léé, Yé wo bli wɔlɛ ma mi woo san dɔa a lee.

⁹ Maa ’ka dan we lɛdɔ lɛ wo gi we ’konu ma loo? Maa ’ka dan anzé we lɛgi pa lɛ ’bɛ zo bɛn ma loo? Maa Gakelebale ɛ ke a fena.

¹⁰ É sɔ an lɛ léé, an wuvɔ yé an dunnu gɔ nwiin; Maa dan gyɛ wuvɔ lɛ nyéné saa lé fɛna pɛblɛɛna; Naa, wo ana kyɛ ble, mi do kpen ’ka giéna ana lo, Wo ’ka trubɛnu dére maan ana é dɛrɛ lo; Lagi mianénu valé winu fwila yé wo san.

¹¹ Maa dan Jérusalɛm kɛlɛ lɛ é ’bin nya, gwenu yiina nya, Yé maa dan Juda tɛrɛ la flanu kɛlɛ lɛ bwi nya, ’té mi do kpen ’ka ana lo.

¹² Wedɔɔzan lé éé we ’konu maan, é a kyɛɛn? Mi lé Gakelebale we fe a lɛ, yee ɛ fe ma. Mɛmalé tɛrɛ a é sɛrɛle yé ana kyɛ ble bélé bwi gi lé mi do kpen ’ka giéan ana lo, a zoo?

¹³ Gakelebale léé: Wo sɔn vɔ anlé bélidɔwenu lé maa pla wo ’lɛ, wo ma, yé wo ’ka ’wo tɔné dɔ lɛ an dére lɛ yé wa ta tawo lo, azama.

¹⁴ Wo tawo wo bligiwenu yɛrama, wo go Baalnu zuo, wo tinu a paa wo gi fɛan zo, a yɛrama.

¹⁵ Amalé, lai sunyanu lé Gakelebale, Izraɛl munu lé Bale léma: Ka ye, maa dan kɔnɔn nɔ lɛ munu ’konu lɛ wolé fɛblele nya, yé maa dan laleyi nɔ lɛ wo lɛ wo miniyi nya.

¹⁶ Maa dan wo nwɛɛn lɛ bɛnnu lé wo valé wo tinu ’ka wo dɔɔ lɛ lo, wo méléna, yé maa dan wo zuo bin lɛ gwɔun nya fɔɔ yé maa wo kulu ga.

Jérusalɛm munu a gulioo guli vɔna

¹⁷ Lai sunyanu lé Gakelebale léma: ’Ka wuvɔlomu gini, ’ka wo laa yé ’wo da. Lomu lé woo baan wuvɔle gi, ’ka mi nwunvɔ wo laana yé ’wo da.

¹⁸ ’Wo gyɛ wuvɔ ko ta é kele ma, Yé ko yuɛyi ’é bɔra ma, Yé yuɛyi ’é yoro ko yuɛlakɔné gi ma.

¹⁹ Gyɛbodérenu a wena Siɔn. Ka ye do, ko kulu ga. Yara wɔra ko ’wuo ma bélé sɔ zo, É a lé ko si tɛrɛ ’ko la, Wo ko nyanana guru zana a gi.

²⁰ ’Kaa lomu, ’ka tɔné dɔ Gakelebale dére lɛ, Yé we lé é ke a fena, ’ka a ’ma ma. ’Ka gyɛbolɛrɛ paa ka lunu gi; ’Ka wuvɔlɛrɛ paa ka ke gi.

²¹ Naa, gale wɔra kolé fɛnɛtinu ta, É wɔra kolé fuakɔnnu gi; É nénu kulu ga zinu ’léé, Yé é mi boronénu nyaa vuun ta.

²² Bé fe léma: Gakelebale léma: Mi galenu é dan dia lɛ Bélé wibo vulile zo féinu ta, Bélé fɛan zo léé, ’sanɛnɛ éé zanaan ’sagyɛzan zuo, ’Té wo ’ka a sian lo, a zo.

²³ Gakelebale léma: Té wedɔɔzan ébo tɔ bɔ élé wedɔɔle gi lo; Té mi plɛplɛ ébo tɔ bɔ élé plɛplɛ gi lo; Té fuablezan ébo tɔ bɔ élé fuafɛnu gi lo;

²⁴ Naa, mian é sɔ a lɛ léé, ébo tɔ bɔ, ’É ébo tɔ bɔ léé, wedɔɔle a ’é lee, Gakelebale dɔɔle we ma, É valé a gi dɔɔle we ma lee, maa ɛ ke Gakelebale lé É zin koo, we drɔle koo, we tegele koo, éé wo kɛla tɛrɛ la, a nya. Naa, ’bɛ zoɛ wedɔɔle sɔ an lɛ. Maa Gakelebale ɛ ke a fena.

²⁵ Ka ye, Gakelebale léma: A yi é dan bɔ lɛ, yé munu faa lé wo gane ke é dɔle, ’té wo bli ’ka é sile ’wo kɛlɛwe kyɛnnu lɛ lo, maa dan we lɛdɔ lɛ wo gi.

²⁶ Éjipiti munu koo, Juda munu koo, Édom munu koo, Amɔn munu koo, Moab munu koo, munu faa lé woo puoma gun ma gya koo, munu lé woo nyanaan nyéné saa lé fɛna koo, woo lé. Naa, bɛnnu faa ’ko, wo gane ’ka é dɔle lo, yé Izraɛl munu faa bli ’ka é sile ’wo kɛlɛwe kyɛnnu lɛ lo.