Jérémi 8 - Kazambale lé Sebe Sauunu 1979

^1-2 Gakelebale léma: ’bɛ bléyi va, Juda nwiinzan blɛnnu koo, flazannu koo, Balebanzannu koo, balelayezannu koo, Jérusalɛm munu koo, wo dan wo wɔlɛnu si lɛ wo pagurunu gi. Yiri valé monénénu lé wo sɔ wo lɛ, ’té woo ’bɛnu bɔa, ’té woo tawoo ’bɛnu zuo, ’té woo ’bɛnu naginian, ’té woo ’wo ’wuo tuaan ’bɛnu lɛ é vinin bɛ, wo dan yee munu wɔlɛnu gɔɔn lɛ wo lɛ. Wo ’ka dan wo sia lɛ lo; wo ’ka dan wo pa lɛ monomono lo. Wo dan kɛlɛ lɛ tɛrɛ va bélé wibo zo.

³ Lai sunyanu lé Gakelebale léma: Munu faa lé wo dan vo lɛ bɛn nyané ’ko gɔnɔlazannu nya fɛfaana lé maa wo bin‐é ana, ga é dan kɛlɛ lɛ wo ’léé néné yé é mini vole é yuɛma ta. Maa lai sunyanu lé Gakelebale ɛ ke a fena.

Bale éé we lɛdɔa wenyanékɛlɛzannu gi

⁴ Bé fe wo lɛ léma: Gakelebale léma: Mi éé diaan yé é ’ka nwaan loo? Taa, mi éé goo yé é ’ka dan loo?

⁵ Mɛmalé Jérusalɛm munu wo wobo no zi sanlenu lé wo glɛ ’ka lo, wo lɛɛ? Woo yara paan dabli kɛlɛle ta, yé woo sɔn vɔa ’wo bli nɔlale ma.

⁶ Maa a wemazan nya, an tɔné a é dɔle; wo ’ka we fé wefebɛ yɛrama lo; wo va mi do kpen ’ka é bli nɔlaan élé we lɛrɛlɛrɛ kɛlɛle ma lo. Yé é ’ka a fé léé: Mɛ we lé maa a kɛlɛ bɛɛ? lo. Wo faa zén ’wolé zinu ta bélé wisoo lé éé fɔrɔan guli danna, a zo.

⁷ Bwibalo boen ézé bléyi dɔɔ lanu gi; plala koo, leelené koo, valusanbla koo, wo ’wo gobléyi dɔɔ. Naa, anlé munu ’ka Gakelebale lé bélidɔwe dɔɔa lo.

⁸ Mɛmalé ka fé léé, ’wo we dɔɔ yé Gakelebale lé bélidɔwenu a ’wo lee? Naa, sɛbɛgifemunu ɛ vié wo, wo sɛbɛgyɛyili lé nyanama pa é wo.

⁹ Yara wedɔɔmunu gyɛ; di kini wo gi yé wo wo kun. Wo nyé yélié Gakelebale dére ma. Wedɔɔle kaa ɛ ke wo lee?

¹⁰ Amalé maa dan wo nanu nɔ lɛ mi bɛnu lɛ yé maa dan wolé féinu nɔ lɛ munu lé ’bɛnu féinu si wo lee, ’bɛnu lɛ. Naa, é sia mi kiéné ma fɔɔ yé é bɔ mi kwa ma, fɛyelɔrɔ blɛn a wo ma. É sia balelayezan ma fɔɔ yé é bɔ Balebanzan ma, wo faa éé dabli kɛla.

¹¹ Woo anlé munu manɔn paan gi nyané nya, ’té wa fé léé, ’i vo drɔɔ, ’i vo drɔɔ, yé vole drɔɔ do kpen ’ka ana lo.

¹² Gakelebale léé: Yara é dan wo gyɛ lɛ, naa, wa bozowenu kɛlɛna. Yara ’ka wo gya lo, wo ’ka yaragyɛwe dɔɔa boenwo lo; amalé wo dan ga lɛ munu lé woo gaan, wo va, yé dé an we lɛdɔ wo gi bléyian va, wo guru é dan zana lɛ a gi.

¹³ Gakelebale léé: É sɔ an lɛ léé, an wozé nyaa. Dɔrɔporo ’ka dan kɛlɛ lɛ dɔrɔféi lo, yé bɔrɔporo ’ka dan kɛlɛ lɛ bɔrɔféi lo, yé yililaanu é dan zɔrɔ lɛ; yé fɛ lé maa a nɔ wo lɛ é dan so lɛ wo lee.

¹⁴ Mɛmalé ko vo é nyanalee? ’Ka zén ékeva yé kaa go nyanamunu lé fla zamaga wole we ma. Naa, Gakelebale, kolé Bale, ga pla ko ’lɛ. ’Yinu lé mi gyɛ lale ke wo va, é a kɛlɛ ko miniyi nya; naa, ko wenyané kɛlɛ Gakelebale ma, azama.

¹⁵ Ko bli a kɔɔn vole drɔɔ lɛ, yé ginanawe do kpen ’ka bɔna lo; ko bli a kɔɔn bélile lɛ, yé ka ye, dikiniémigiwe bɔ.

¹⁶ Wolé wisoonu a siaana Dan zia, yé tɛrɛ ma éé nyɔɔn‐an wo dére nya. Wa dana, yé tɛrɛ koo, é tafɛnu koo, fla koo, é tamunu koo, woo wo nyaan.

¹⁷ Naa, maa dan ménénu valé bɔménéluzanuo pa lɛ ka lɛ zia; naa, yokɛlɛzannu lé lia ’ka dan bɔ lɛ yee ménénu lɛ lo yé wo dan suiɛ dɔ lɛ ka ma. Maa Gakelebale ɛ ke a fena.

Jérémi bli kyɛ dɔ alé munu lé we ma

¹⁸ É sɔ an lɛ léé, anlé kleblele ta ’é zana; An bli a nyané blena an gi.

¹⁹ Ka ye, anlé munu siaadérenu Zuo gi éé goo wele nya tɛrɛ baa la. Gakelebale ’ka Siɔn é dɛrɛ loo? A nwiinzan ’ka ana é dɛrɛ loo? Mɛmalé wo an bli fli wolé miyili nyaalenu Valé bɛnnu lé miyilinu nyaa?

²⁰ Fɛ gyɛbléyi gié, yé lɛɛ dabléyi nyaa Yé ko ’ka tan si lɛ we gi lo.

²¹ Anlé munu lé nyanéblelenu an gyɛ an gi, An bli kyɛ dɔ é baba, di kini an gi.

²² Bomélia ’ka Galaad tɛrɛ la loo? Dɔtrɔ gyétrɛn ’ka ana loo? Mɛmalé anlé munu ’ka bélina loo?