Jérémi 6 - Kazambale lé Sebe Sauunu 1979

Wo nyanézannu Jérusalɛm zi lɛ sɔɔ

¹ ’Kaa Bɛnjamɛn munu, ’ka fwi Jérusalɛm. ’Ka béli fɛn Tékoa, ’ka fɛ do nwa Bɛt‐Akérɛm tɔmase nya. Naa, woo we tɔntɔn valé dunuzénmitawe blɛn yé sina yirinwana bɛbolazia.

² Siɔn lé ke fla zima valé fla nɔnɔmi nya, maa dan a sɛrɛ lɛ tata.

³ ’Blatabinzannu valé ’wolé ’blanu wa gona a va, woo ’wolé sɔkɔnnu dɔa a zi, wo faa do do ’wozé blé.

⁴ ’Ka ka ma’lɛrɛ, ’ka kee wo nya, ’ka nwa, kaa go é yiéyi. Yiri a vɔna, nyanadi furɔ toro; ’bɛ a ko ma we tɔntɔn nya.

⁵ ’Ka é nwa, kaa go é béli ’ko, kaa alé fuakɔnnu sɛrɛ.

⁶ Naa, lai sunyanu lé Gakelebale léé: ’Ka yilinu vɔ, ’ka wo dɔ Jérusalɛm gɔrɔ giéamafɛnu nya; é a lé wo we lɛdɔ fla ’ko lamunu gi; vakɛlɛle saa ɛ ke ana.

⁷ Fɛan zo lé ’yi éé duun‐an ’yiguru gi, a zo duo lé fla ’ko lé we lɛrɛlɛrɛnu éé nwɛɛn‐an; dé é ’ka glawe valé fɛ sɛrɛle nya lo, wo ’ka we zuo fé ana lo; wo ’ka fɛ bɛ yé lo, fɔɔ kleblelenu valé manɔnnu lé.

⁸ Yé bii Jérusalɛm, ’i wepladérenu nyi si, dé maa da si i ma baa yé maa i kɛlɛ é ’bin nya, tɛrɛ lé mi ’ka ana lo, a nya.

⁹ Lai sunyanu lé Gakelebale léma: Wo dan Izraɛl munu boogi pɔné fwi lɛ bélé woo dɔrɔféi gɔ ma soo fɛan zo, a zo; ’i bɛ kɛlɛ é ziin a ma, bélé dɔrɔsozan éé bɛ kɛla dɔrɔ ma fɛan zo, a zo.

¹⁰ Maa dan we fe lɛ mi kyɛn lɛɛ? Yé mi kyɛn lé maa sié anlé wenayezan nya, yé wo tɔné dɔ an lɛɛ? Bé ye, wo tɔné ’ka voo Bale dére lɛ lo, yé wo ’ka bɔa ’wo tɔné dɔle lɛ we lɛ lo. Gakelebale dére a wo yuɛ gi serelebomafɛ nya, é ’ka wo gi nanamawe nya lo.

¹¹ Gakelebale lé bliflile an kan; an ’ka bɔa anbo kunle lɛ lo. I bli ’é fli né lé é ke zi gi, a ma. I bli ’é fli miboronénu lé woo zén‐é ékema, wo ma. Naa, wo dan gɔné valé lezan kun lɛ; mi kwa, mi lé ana mɔn, wo dan wo kun lɛ.

¹² Gakelebale léé: Dé an bɛ nwa tɛrɛ ’ko lamunu ma bléyian va, wolé kɔnnu é dan kɛlɛ lɛ mi bɛnu zé nya, wolé féinu valé wo nanu koo é ziin.

¹³ Naa, é sia mi kiéné ma fɔɔ yé é bɔ mi kwa ma, fɛyelɔrɔ blɛn éé wo gya. É sia balelayezan ma fɔɔ yé é bɔ Balebanzan ma, wo faa kɛlɛ dablikɛlɛzannu nya.

¹⁴ Woo anlé munu manɔn paan gi nyané nya, ’té wa fé léé: ’I vo drɔɔ, ’i vo drɔɔ, yé vole drɔɔ do kpen ’ka ana lo.

¹⁵ Gakelebale léma: Yara é dan wo gyɛ lɛ, naa, wa bozowenu kɛlɛna. Yara ’ka wo gya lo, wo ’ka yaragyɛwe dɔɔa boenwo lo; amalé wo dan ga lɛ munu lé woo gaan, wo nya, yé dé maa a we lɛdɔna wo gi bléyian va, wo guru é dan zana lɛ a gi.

¹⁶ Gakelebale léma: ’Ka dɔ zinu ta, ’ka a nagini yé ’ka a ma laa léé: Zi kyɛnnu ɛ ke zi kwanu nyaa? Zi kyɛn ɛ ke zi zin nyaa? ’Ka tawo a ’léé yé ka dan flinle ye lɛ kabozen zé nya. Naa, wa zi pa léé: Ko ’ka dan tawo lɛ a ’léé lo.

¹⁷ Maa ka tabin sunyanu dɔ ka sɔnɔ; ’ka tɔné dɔ gulibéli dére lɛ. Naa, wa zi pa léé: Ko ’ka dan ko tɔné dɔ lɛ ’bɛ lɛ lo.

¹⁸ Amalé, bɛngɔnɔnu, ’ka tɔné dɔ, yé ’kaa zén‐ékevamunu, we lé é dan bɔ lɛ wo ma, ’ka a gi dɔɔ ma.

¹⁹ Tɛrɛ, ’i tɔné dɔ. Maa dan we tɔntɔn bɔ lɛ munu ’ko ma, wo ’wuogibɔrɔlenu tɔnɔ lé. Naa, wo ’ka ’wo tɔné dɔ lɛ an dérenu lɛ lo, wo nyé yéli anlé bélidɔwe ma.

²⁰ Séba tɛrɛ la lasikɔrɔpo lé wa kyɛ blé koo, gyan ginzan lé éé sié tɛrɛ baa la koo, an mawe a wo gii? Winu lé ka wo kyɛ blé an lɛ, wo ’ka an gi nanaan lo, yé kalé sarakanu ’ka sɔ lɛ an lɛ pelo.

²¹ Amalé Gakelebale léma: Maa dan misaangɔlɛnu pla lɛ munu ’konu ’lɛ; nénu valé ’wo tinu sɔné é dan san lɛ ékeva; béé valé béénu sɔné é dan san lɛ a ma yé wo dan zamaga wo lɛ.

²² Gakelebale léma: Ka ye, bɛn do a sina yirinwana bɛbolazia tɛrɛ do la; bɛn blɛn do a nwana tɛrɛ glɛ sina.

²³ Wa dana sa valé toané din nya wo lee; wo gi a pɔnpɔn, wo nyanai ’ka zén‐é lo; wo dére éé wé bélé wɛyi gi gunule zo. Wa é vɔle wisoonu ta; wo ma a é ’lɛrɛle gulidanle we ma bélé mi do kpen zo ’kaa Siɔn munu ma.

²⁴ Wo vun gi wele éé ko bɛnu gaan ko ma; nyanéblele blɛn ko kun bélé né yaa le lé nyanéblele zo.

²⁵ Té ka go féinu ta lo, té ka go zinu ta lo. Naa, ka nyanézannu lé gwɔun a ’bɛna yé di kinile mi gi a fɛfaana.

²⁶ Anlé munu, ’ka bɔlɔ zén ka ta, yé ’ka burula kyɛyee va. ’Ka gyɛ bo bélé négɔné do kpen gyɛ zo. Ka yuɛyi ’é zén, ’ka dunuzénmita wuvɔ; naa, fɛsɛrɛzan a dana ko va ko tanyila.

²⁷ Maa i dɔ ilé munu méléna bélé foliɛwɔlɛ gidanzan zo, bélé guliyɔɔkɔn plɛplɛ zo, léé, ’i wolé tawobɛ dɔɔ yé bé gi dan.

²⁸ Wo faa a nwamimazannu nya, yee valé mi tɔ sɛrɛzannu nya; wa plɛplɛ bélé zéné valé foliɛwɔlɛ zo; wo faa a é vɔnle.

²⁹ Wolé bɔɔnwoli kyɛ éé blé; kyɛ lɛe ble, dé wa gi dan‐oo, ’té ’bɛ a é pla. A bo ’ka sié a ma lo.

³⁰ Woo wo laama gɔɔlifu bo. Naa, Gakelebale sɔn vɔ wo ma, azama.