Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

Jérémi 52 - Kazambale lé Sebe Sauunu 1979


Jérusalɛm guru zana a gi
( 2 MNw 25:1–7 ; Jér 39:1–10 )

1 Sédésias kɛlɛ minwiinzan blɛn nya bléyian va, ’té a lɛɛ a yɔ do wɔlɛ do, yé é pla munu nwiin lɛɛ vu ta do Jérusalɛm. A bu a Libina le lé wa laama Jérémi lu Amutal, a nya.

2 We lé ke é naané Gakelebale yuɛ gi, yee lé é a kɛlɛ, Jojakɛn a kɛlɛ fɛan zo, a zo ’kyɛ.

3 Gakelebale bli fli Jérusalɛm valé Juda ma, yé é a a va léé, ’é wo si é yuɛ gi, amalé we ’ko kɛlɛ. Yé Sédésias nwa Babilɔn minwiinzan blɛn ma.

4 Sédésias plale munu nwiin lɛɛ sɔraziɛnzan lé moné vuzan lé yi vuzan nya, Babilɔn nwiinzan Nébukanɛsaa da Jérusalɛm ma, élé sunyanu faa nya é va; é sɔkɔnnu dɔ a ’lɛ, yé é tɛrɛ zun dɔ a zi.

5 Wo fla mabɛn fɔɔ minwiinzan blɛn Sédésias lɛɛ vu ta dozan nya.

6 A moné ziɛnzan lé yi sɔraziɛnzan nya, lɔrɔ dɔ fla plɛplɛ, yé ana munu ’ka fɛblele ye lɛ lo.

7 Yé wo nyanémunu fla zi gɔrɔ ’wii. Gulidanzannu faa vɔ fli gi yé wo si fla é béli, minwiinzan blɛn lé zianféi zi lé, éé giéan fla zi gɔrɔ fiénu méléna, wo ’bɛ zi sia yé wo fɛna pɛblɛɛna zi sia. ’Té Kaldé munu a é dirile fla zi.

8 Naa, Kaldémunu lé sunyanu minwiinzan blɛn zuo bin yé wo bɔ a ma Jériko lé fɛna pɛblɛɛna, yé alé sunyanu kini ékema a ma.

9 Wo minwiinzan blɛn kun yé wo go a nya Babilɔn minwiinzan va Ribla; yé wo alé we ble ’bɛna.

10 Babilɔn nwiinzan blɛn Sédésias benu bɔrɔ bo wo ti yuɛ va. Yé é Juda nwiinzannu faa bɔrɔ bo Ribla.

11 ’Bɛ zuo wo Sédésias yuɛnu so a gi yé wo zéné gɔgɔbalenu vɔ a ma. Babilɔn nwiinzan blɛn go a nya Babilɔn yé wa vɔ bokɔn gi fɔɔ yé a gayi bɔ a zo.


Wo Balebangikɔn zana
( 2 MNw 25:8–17 )

12 Moné soruzan lé yi vuzan nya, yee lé ke Babilɔn nwiinzan blɛn Nébukanɛsaa plale munu nwiin lɛɛ vu ta sɔraziɛnzan nya, Babilɔn nwiinzan blɛn wuozan Nébuzaradan lé ke sunyanu ’lɛzan nya, é da Jérusalɛm.

13 Gakelebale lé kɔn koo, minwiinzan blɛn lé kɔn koo, Jérusalɛm lé kɔnnu faa koo, é wo kyɛ ble; dé kɔn‐an a we keoo, é wo kyɛ ble.

14 Kaldé lé sunyanu faa lé ke sunyanu ’lɛzan va, wo Jérusalɛm zi gɔrɔ faa zana.

15 Sunyanu ’lɛzan Nébuzaradan go nyanégyɛzannu kenu nya luu gi; munu lé wo vo é nyanale fla koo, numu lé wobo bɔra Babilɔn nwiinzan blɛn lɛ, ’bɛnu koo, mi gbau pɔnénu lé wo vo, wo koo, wonu lé.

16 Naa, duowo, sunyanu ’lɛzan Nébuzaradan ana tɛrɛ la nyanégyɛzannu kenu vo ana dɔrɔféipazannu valé féipazannu nya.

17 Zénéwɛyili lé ke Gakelebale lé kɔn gi koo, zénéganenu koo, zéné’wolikana lé ke Gakelebale lé kɔn gi koo, Kaldémunu wo yéli, yé wo go a zéné faa nya Babilɔn.

18 Kyɛyeezéngifɛnu koo, diadianu koo, sɛnnénu koo, ’yiminikananu koo, kananénu koo, zénéfɛ faa lé wo Gakelebale lé kɔn gi nyanama pa wo nya koo, wo wo si.

19 Kananu koo, kyɛnyɛsifɛnu koo, ’yiminikananu koo, kyɛyeezéngifɛnu koo, fintrannu koo, kananénu valé bɔnu koo, fɛnu lé wa kɛlɛ kyan valé gɔɔlifu nya, sunyanu ’lɛzan a si.

20 Wɛyili fié koo, ’wolikana koo, zéné dirigɔné foto vu ta fié lé wo kɛlɛ a gane nya, ’té Salomɔn wo kɛlɛ Gakelebale lé kɔngifɛnu nya, zénéfɛnu faa ’ko, wo ’ka wo bɛn dɔɔ lɛ lo.

21 Wɛyili do nwale loru a mɛtrɛ sɔraziɛn, yé bale do lé ke mɛtrɛ suiɛdo, éé sɔa a zi ’té; ’té a koro gi a é pla, yé a boro a bɛnwɔlɛ ziɛn pale ékema zo.

22 Wɛyilinu ’wuo a zéné nya, a wuo a é nwale loru mɛtrɛ fié é buu; séli valé grénadéyili poro foto a wɛyili ’wuo zi, a faa a zéné nya; wɛyili fiézan valé alé grénadéyili poro foto a yee duo zo.

23 Grénadé poro fotonu a a bɛ do la yɔ ziɛn wɔlɛ vu ta suiɛdo, yé grénadé poro fotonu lé ke é vɔle zéné sélinu lɔlu ’léé fɛfaana, wa yɔ soru.


Wo go Juda munu nya Babilɔn
( 2 MNw 25:18–21 )

24 Balebanmunu ’lɛzan Séraja koo, Balebanzan fiézan Sofoni koo, kɔn ’léé tabinzannu yaa koo, sunyanu ’lɛzan wo si.

25 Miblale do lé ke fla, ’té é ke é plale gulidanmunu nwiin koo, we pla minwiinzan lɛzannu va mi soru lé wo wo ye fla koo, sunyanu nwiinzan lé sɛbɛgyɛzan lé éé munu tɔ gya koo, ana tɛrɛlamunu yɔ yaa lé wo wo ye fla koo, é wo kun.

26 Sunyanu ’lɛzan Nébuzaradan wo si, yé é go wo nya Babilɔn minwiinzan va Ribla.

27 Babilɔn nwiinzan wo gyɛ yé wo ga Ribla, Amat tɛrɛ la. ’Bɛ zo lé wo go Juda munu nya luu gi, wolé tɛrɛ ma baa.

28 Munu lé Nébukanɛsaa go wo nya luu gi, wo ’léé lo: a lɛɛ sɔrafiézan nya, Juifinu baa do wuru soru yɔ do wɔlɛ yaa lé;

29 Nébukanɛsaa plale munu nwiin lɛɛ vu ta sɔraazan nya, é mi wuru ziɛn mi yɔ do wɔlɛ vu ta fié si Jérusalɛm;

30 Nébukanɛsaa plale munu nwiin lɛɛ yɔ do wɔlɛ yaazan nya, sunyanu ’lɛzan Nébuzaradan go Juifi mi wuru yaa mi yɔ sɔrafié wɔlɛ soru nya; munu faa kɛlɛ baa fié wuru yaa.

31 Juda nwiinzan blɛn Jojakɛn vole luubale gi lɛɛ yɔ do wɔlɛ vu ta sɔrafiézan nya, a moné vu ta fiézan lé yi yɔ do wɔlɛ soruzan nya, Babilɔn munu nwiinzan blɛn Évil‐Mérodɔk plale mi nwiin lɛɛ vininzan nya, é tɛrɛ si Juda munu nwiinzan blɛn Jojakɛn nwiin, yé é a bɔra bokɔn gi.

32 É we néné fe a lɛ, yé é alé fuablin dɔra é va Babilɔn yé é mini a bɔlunu lé fuablinnu ta.

33 Yé é alé bokɔn gi sɔnu tavɔɔ, yé Jojakɛn fɛ ble a va alé tɛrɛla bléyi faa gi.

34 Babilɔn nwiinzan blɛn alé yi do do ma gɔɔli nɔ a lɛ alé tɛrɛla faa gi fɔɔ yé é bɔ a gale ma.

Alliance Biblique de Cote d'Ivoire 1979

British & Foreign Bible Society
ကြှနျုပျတို့နောကျလိုကျပါ:



ကြော်ငြာတွေ