Jérémi 51 - Kazambale lé Sebe Sauunu 1979

Bale Babilɔn lé we ble, weplenu lé é a kɛlɛ Izraɛl ma, alé we ma

¹ Gakelebale léma: Ka ye, maa dan fɛsɛrɛfu do pa lɛ zia Babilɔn munu valé Kaldé munu ma.

² Maa dan ’sa vasifu pa lɛ zia Babilɔn munu ma, yé é dan wo vasi lɛ. Maa dan fɛsɛrɛfu si lɛ wo zi fɛfaana, yé maa a pa zia wo lɛ yé é dan fɛ faa sɛrɛ lɛ wolé tɛrɛ la, yé é dan kɛlɛ lɛ we tɔntɔn bɔyi nya wo ma.

³ Savulizan ’é sa vuli mian éé sa vulian a va, a va, ’bɛ valé mi lé a pale ke ébo takuunfɛ ta, a va. Té ka pɛniɛnu vo lo. ’Ka Babilɔn lé sunyanu faa gyɛ.

⁴ ’Wo dia yé ’wo gama tuowo Kaldé tɛrɛ la, yé ’wo wo fɔn Babilɔn flaworo dii zinu ta.

⁵ Naa, Juda munu valé Izraɛl munu lé Bale, lai sunyanu lé Gakelebale, é ’ka sɔn vɔ lɛ wo ma lo, yé Kaldé tɛrɛ la a é fanle weple nya Izraɛl lé Mi Sauun ma.

⁶ ’Ka fwi Babilɔn, yé ka faa é vo é yuɛma, dé ka da zamaga wo a sɛrɛbléyi va. Naa, é a Gakelebale lé we lɛgi pabléyi nya; é dan alé we lɛgi pa lɛ a kɛlɛwenu yɛrama.

⁷ Babilɔn a Gakelebale lee bélé ’yiminigi kyankana zo; éé tɛrɛlamunu faa gya bélé nwɛ lé mi gyɛle zo. Bɛnnu alé dɔrɔ mini, bɛwemalé wo kɛlɛ bélé gwegyɛzannu zo.

⁸ Kele tɔɔn, Babilɔn dia, yé wa ’wii. ’Ka dunnu alé we ma, ’ka lia pa a tuona gi, dé é dan béli lɛɛ?

⁹ É sɔ ko lɛ léé, Babilɔn ’é béli, naa, é ’ka béli lɛ lo. ’Ka vo, yé kaa faa do do kaa go kaalé tɛrɛ la. Naa, we lɛdɔle a gi kɛlɛ blɛn fɔɔ é bɔ la gi, é nwa fɔɔ yé é bɔ latinu ta.

¹⁰ Gakelebale kolé we tegele nagɔɔn munu yuɛ gi; ’ka da, yé ’ka Gakelebale kolé Bale kɛlɛwenu glewo Siɔn.

¹¹ ’Kalé dinnu lɛ vɔ, ’ka kun ka botakuunfɛ ma; Gakelebale ɛ Médi munu nwiinzan blɛn bli nwa, é sɔ a lɛ léé, é Babilɔn sɛrɛ, azama. Naa, Gakelebale lé we lɛgi pale lé; a bangikɔn lé we lɛgi pale lé.

¹² ’Ka drapo nwa Babilɔn ma, ’ka sunyanu taa pa, ’ka wo taginizannu dɔ, ’ka fla mabɛn! Naa, we do a Gakelebale gi, yé wean é a fe Babilɔn munu ma, é dan a lɛ sɔɔ lɛ.

¹³ Bii lé i ke é nyanale ’yi blɛnnu sɔnɔ, ’té ilé fɛwezannu ke di, i bɔ izé ’wuo plana; ilé fɛyilɔrɔ glɛ dɔ.

¹⁴ Lai sunyanu lé Gakelebale ébo ’nyɔɔn léé: Iin, maa dan i nyanézannu fan lɛ bélé gangannu zo, yé wo dan nwa lɛ i ma gulidan siaalenu nya.

¹⁵ É tɛrɛ kɛlɛ é bɛ plɛplɛ nya; Alé wedɔɔle nya lé é tɛrɛ gane vɔ; É lanu fwila élé gikinile nya.

¹⁶ ’Yinu a dére ’ma tɔɔn, ’wo vun we lanu gi. Éé latinu nwaan tɛrɛ glɛ sina, Éé lɛɛ yuɛ wuo vɔa yé éé lɛɛné dan; Éé fu sié élé fɛwezannu va.

¹⁷ Munu faa éé kɛla tavozannu nya alé wedɔɔle lee, Yara éé folibomunu faa gya wolé miyili nyaale we ma; Naa, miyili ’konu a vié nya, azama, Flinfu do kpen ’ka wo gi lo.

¹⁸ Wa fɛnu lé wo ’ka we do nyian wo mi ma lo, wo nya; wa dabli panyanama nya; Dé we lɛdɔ mi gi yi bɔ, wozé é dan nyaa lɛ.

¹⁹ Bale lé é ke Jakɔb zé nya, ’bɛ ’ka wozé zo lo; Naa, ’bɛ ɛ fɛnu faa kɛlɛ, Yé Izraɛl lé ke alé tɔnɔ nya. A tɔ lé lai sunyanu lé Gakelebale.

²⁰ Bii ɛ kɛlɛ an lɛ bélé maato zo, bélé gulidanfɛ zo; I nya lé an bɛnnu ’wii, I nya lé an fuatɛrɛnu sɛrɛ.

²¹ I nya lé an wisoo valé étazan gyɛ, I nya lé an gulidangoro sɛrɛ yé maa a gizan gyɛ.

²² I nya lé an gɔnénu valé lomu gyɛ, I nya lé an mi segelenu valé nénu gyɛ, I nya lé an pɛniɛnu valé blɛnnu gyɛ.

²³ I nya lé an ’blatabinzan valé ’blanu gyɛ, I nya lé an féipazan valé élé dirinu gyɛ, I nya lé an minwiinzannu valé flazannu gyɛ.

²⁴ Wenaané faa lé Babilɔn munu valé Kaldé munu faa a kɛlɛ Siɔn lɛ ka yuɛ gi, maa dan a lɛgi pa lɛ wo ma. Maa Gakelebale ɛ ke a fena.

²⁵ Gakelebale léma: Bé ye, bii Babilɔn, migyɛgɔ, bii lé i tɛrɛ faa sɛrɛ, maa a i ma. An dan an bɛ soi lɛ i ma; maa dan i burula lɛ yé i si gɔlɛgɔnu nwiin, yé maa i kɛlɛ gɔ lé kyɛ a ble, a nya.

²⁶ Wo ’ka dan kɔnsungɔlɛnu valé kɔn gane vɔgɔlɛnu si lɛ i va lo, naa, i dan vo lɛ é ’bin nya yifaama. Maa Gakelebale ɛ ke a fena.

²⁷ ’Ka drapo nwa bɛn tɛrɛ la, ’ka béli fɛn bɛnnu méléna; ’ka bɛnnu ma’lɛrɛ nwale a ma we ma; Ararat munu koo, Mini munu koo, Asikénaz munu koo, ’ka wo laa, ’wo nwa wo ma. ’Ka sunyanu nwiinzannu dɔ, ’ka wo pa zia wo ma, ’ka wisoonu pa zia wo ma kiɛre bélé gangannu lé woo kana zén‐é mi gi, wo zo.

²⁸ Bɛnnu koo, Médi munu nwiinzan blɛn koo, tɛrɛ faa lé ’bɛ ke é plale a wuo koo, ’ka wo ma’lɛrɛ, ’wo nwa wo ma.

²⁹ Tɛrɛ ma nyɔɔn; gligli zén a gi, naa, Gakelebale bligiwe lɛ sɔɔ Babilɔn ma. É dan Babilɔn tɛrɛ kɛlɛ lɛ bwi nya, ’té mi do kpen ’ka dan kɛlɛ lɛ ana lo.

³⁰ Babilɔn lé sunyanu daan gulidanle ma, wo vɔ wolé yɔɔna plɛplɛnu na; wo fuu si wo ta, wa bélé lomu zo. Wo kyɛ vɔ wo nyanana, wo wolé kɔn lɛ tan foliɛwɔlɛnu yéli.

³¹ Lɛtrɛ kɔné sizannu kee, nwunvɔzannu gié é ke la, we zuo fele Babilɔn nwiinzan blɛn lɛ we ma; Wo léé: Wo diri ilé fla zi yé wa si;

³² wo zi dɔ giénanu na, yé wo ’yibai fɛnu kyɛ ble, yé gulidanzannu gi blin wo ma.

³³ Naa, lai sunyanu lé Gakelebale, Izraɛl lé Bale léma: Babilɔn munu a bélé fɛ lé wo ’sa sunwo ana wo gane nya, a zo. É vo sɛ yé a sunwo bléyi é bɔ.

³⁴ Jérusalɛm léma: Babilɔn nwiinzan blɛn Nébukanɛsaa an ble, é an sɛrɛ; É an kɛlɛ bélé bɔkoro zo; É an mini bélé dragɔn zo; É kan anlé fɛwezannu nya, É an bin.

³⁵ Munu lé woo nyanaan Siɔn, wo léma: Glawenu lé wa kɛlɛ ko lɛ koo, ko wi kinile ékema koo, ’é dia Babilɔn ta. Jérusalɛm munu léma: Ko nyɛwe ’é dɔ Kaldé munu nwiin ma.

³⁶ Bɛwemalé Gakelebale léma: Maa dan bɔ lɛ i va; maa dan ilé we lɛgi pa lɛ, maa dan Babilɔn wɛyi guru gi ga lɛ; maa dan alé ’yibɔna dɔ lɛ.

³⁷ Babilɔn é dan kɛlɛ lɛ é ’bin nya, gwenu yiina nya, fɛ sɛrɛle valé we nanamafɛ nya; mi ’ka dan kɛlɛ lɛ ana é dɛrɛ lo.

³⁸ Wo dan ’wo gi gunu lɛ ékeva bélé golizranu zo. Wo dan siaa lɛ bélé golizranénu zo.

³⁹ Dé nwɛ gié wo yuɛ ma, maa dan nwɛ taa nɔ lɛ wo lɛ, yé maa wo gyɛ a nya wobo nɔle ginanale lɛ we ma. ’Bɛ zuo yé wo dan yi gyɛ lɛ fɔɔ ’bɛ glɛ ’ka dɔa lo, yé wo ’ka vuoan é dɛrɛ lo. Maa Gakelebale ɛ ke a fena.

⁴⁰ Yé maa dan wo zun lɛ bélé ’blanu lé woo goo wo nya wi gyɛna, wo zo, bélé ’blagɔnénu valé boligɔnénu zo.

⁴¹ Éé, mɛ léé? Wo Sésak si! Fla lé alé fuatɔ ke é bɔle tɛrɛ faa la, wa kele. Yé ’té mɛ léé? Wo Babilɔn sɛrɛ bɛnnu méléna!

⁴² Wɛyi zén Babilɔn ta; a fɔrɔlenu Babilɔn ta bua.

⁴³ Alé flanu guru zana a gi; alé tɛrɛ kɛlɛ bwi nya. Mi do kpen ’ka nyanaan ana lo, yé mi do ’ka giéan ana lo.

⁴⁴ Maa dan we lɛdɔ lɛ Bɛl gi Babilɔn; maa dan fɛblele so lɛ a ’léé, yé bɛnnu ’ka dan yoro lɛ a vazia é dɛrɛ lo. Babilɔn zi gɔrɔ boen dia;

⁴⁵ anlé munu, ’ka si a méléna; ka faa do do, ’ka so Gakelebale lé bliflile baba lee, yé ka vo é yuɛma.

⁴⁶ Té ka we do kpen gi bɔrɔ pa lo, té kana é zén ka gi, vun lé é dan we lɛ tɛrɛ ’ko ta, a we ma lo. Vun do é dan we lɛ lɛɛ ’ko gi, yé lɛɛ bɛ gi vun do é dan we lɛ; glawe é dan pla lɛ tɛrɛ ’ko nwiin, yé glazan do é dan nwa lɛ glazan do ma.

⁴⁷ Bɛwemalé, ka ye, a yi é dan bɔ lɛ yé maa dan Babilɔn lé miyilinu sɛrɛ lɛ, yé yara é dan tɛrɛ ’ko la munu faa gyɛ lɛ, yé alé munu faa galenu é dan dia lɛ ana.

⁴⁸ La koo, tɛrɛ koo, wo gifɛnu koo, wo dan siaa lɛ ginanale nya Babilɔn diale we ma; naa, fɛsɛrɛzannu é dan si lɛ yirinwana bɛbolazia, yé wo dan baa lɛ a ta. Maa Gakelebale ɛ ke a fena.

⁴⁹ Oo, Izraɛl lé mi galenu, Babilɔn é ziin, é dan dia lɛ fɛan zo lé é tɛrɛ faa lé mi galenu dia, a zo.

⁵⁰ ’Kaa lé ka so gwɔun lee, ’ka go, té ka dɔ lo. Yé tɛrɛ baa lé ka bɔ ana, ’ka bɔn‐in bɔrɔ Gakelebale ma ’bɛna, yé Jérusalɛm sele ’é dɔ ka gi.

⁵¹ Ko sɔnɔle ’ma aan wo, ’bɛ kɛlɛ ko ma yaragyɛwe nya; dé bɛnnu wɔra Gakelebale lé kɔn sauun gi, yara wɔra ko ’wuo ma.

⁵² Bɛwemalé Gakelebale léma: Ka ye, ’bɛ yinu é dan bɔ lɛ, yé an dan miyilinu sɛrɛ lɛ, yé munu lé wo tuo, wo dan dunnu lɛ wolé tɛrɛ faa la.

⁵³ Gakelebale léma: Dé Babilɔn munu nwa kɔɔn, léé, ’wo go la gioo, dé wo wɔra ’wolé guliyɔɔkɔn torole plɛplɛnu gioo, maa dan fɛsɛrɛzannu pa lɛ wo lɛ zia duowo.

⁵⁴ Babilɔn munu woo dunnuan, Kaldé tɛrɛ sɛrɛ blɛn, a we ma.

⁵⁵ Naa, Gakelebale a Babilɔn sɛrɛna, Yé é wolé siaalenu glɛ dɔ, Fɛsɛrɛzannu a dana kiɛre bélé ’yi dale zo, ’té wo gi éé wé blɛn, Yé woo wo vun wele blɛn maan.

⁵⁶ Iin, fɛsɛrɛzan baa yee Babilɔn ta; Wo Babilɔn lé sunyanu si, Wo wolé sanu yéli. Naa, Gakelebale a Bale lé, éé mi faa do do banwoo ’Wo kɛlɛwenu yɛrama, a nya, Yee ɛ munu do do gooli paan.

⁵⁷ A nwiinzannu koo, alé wedɔɔzannu koo, Alé gbɔrɔnamanu koo, alé flazannu valé alé sunyanu koo, Maa dan wo gyɛ lɛ nwɛ nya, Maa dan wo ta pla lɛ yi nya, ’bɛ glɛ ’ka lo, ’té wo ’ka dan vuo lɛ é dɛrɛ lo; A zo lé minwiinzan blɛn lé, wa tɔ laama lai sunyanu lé Gakelebale, é a fe.

⁵⁸ Lai sunyanu lé Gakelebale léma: Wo dan Babilɔn lé gɔrɔ laala blɛnnu zana lɛ a gi, Wo dan alé duoli torolenu kyɛ ble lɛ; ’Bɛ gi léé, alé munu nyanama pa é pla; Bɛnnu wɔlɛ gi nyaa wo ma é pla, é kɛlɛ kyɛ zé nya.

⁵⁹ Balelayezan Jérémi we do bɛ pa Maséja be Nérija be Séraja lee, bléyian va lé wo go Babilɔn Judanu nwiinzan blɛn Sédésias nya, Sédésias plale munu nwiin lɛɛ ziɛnzan nya, ’bɛ bléyi va. Naa, Séraja a Sédésias leemunu nwiinzan nya.

⁶⁰ We tɔntɔnnu faa lé wo dan bɔ lɛ Babilɔn ma, é valé Babilɔn ma dérenu faa lé ke é gyɛle, Jérémi wo gyɛ sɛbɛ do ta.

⁶¹ Jérémi lé Séraja lɛ léma: Dé i bɔ Babilɔn, ’i sɛbɛ ’ko faa ta fe, yé bé fe léma:

⁶² Bii Gakelebale a fe léé, wo dan fɛkona sɛrɛ lɛ, yé dé é a mi nyaoo, dé é a wi nyaoo, é ’ka dan nyana lɛ ana é dɛrɛ lo, naa, é dan kɛlɛ lɛ bwi nya lɛɛfaama.

⁶³ Yé dé i nyaa sɛbɛ ’ko tafele nya, i dan gɔlɛ do yere lɛ a ma, yé bé vuli Yufrat yuu va,

⁶⁴ yé i dan a fe lɛ léma: A zo duo lé Babilɔn é dan san lɛ ’yi wuo. We tɔntɔnnu lé maa dan wo bɔ lɛ a ma, é ’ka dan so lɛ wo gi lo; a tamunu fuu é dan si lɛ wo ta yé wo dan dia lɛ. Jérémi lé we nyaana lé ke bɛ.