Jérémi 50 - Kazambale lé Sebe Sauunu 1979

We lé Bale a fe Babilɔn ma

¹ Dére lé Gakelebale a pa balelayezan Jérémi ’léé, Kaldé tɛrɛ la Babilɔn mawe nya, yee lo.

² ’Ka a zuo fe bɛnnu méléna, ’ka a zana dɔɔ wo lɛ, ’ka drapo do nwa loru; ’Ka zana dɔɔ wo lɛ, té ka gɔ do kpen yɔɔ wo ma lo. ’Ka fe léma: Wo Babilɔn si, wolé bale Bɛl fuu si é ta. Wo wolé bale Mérodak sɛrɛ. Wolé miyilinu ’lɛ ’ka é dɛrɛ lo, wolé miyilinu yéli.

³ Naa, bɛn do nwa a ma yirinwana bɛbolazia, yé é dan Babilɔn tɛrɛ kɛlɛ lɛ bwi nya; mi do kpen ’ka dan nyana lɛ ana é dɛrɛ lo. Munu valé winu fwi; wo si ana.

⁴ Gakelebale léma: ’Bɛ yi ’ko la, ’bɛ bléyi ’ko va, Izraɛl munu valé Juda munu é dan da lɛ é ziin ékeva; wo dan tawo lɛ wuvɔle nya; wo dan Gakelebale, wolé Bale nagini lɛ.

⁵ Wo dan Siɔn lé zi ma laa lɛ, wo dan ’wo yara nɔla lɛ a vazia. ’Ka da, ’ka gi pa do Gakelebale va, gipawe lé a glɛ ’ka lo, ’té ka gi ’ka saan a ma monomono lo, a nya.

⁶ Anlé munu a ’bla trubɛ palu sanle nya. Wo tabinzannu zi saan wo nya, wo wo saan gɔnu nwiin; wo si gɔ blɛnnu nwiin yé wo go gɔpanénu nwiin; wo gi san ’wo nyanana ma.

⁷ Munu faa lé ’bɛnu éé bɔa wo ma, ’bɛnu éé wo blé, yé wo nyanézannu léma: Ko nwiinwe kaan lo; Gakelebale lé é ke we tegele punsina nya, wo wenyané kɛlɛ a ma. Gakelebale lé wo tranu bli ke a lɛ, wo wenyané kɛlɛ a ma, azama.

⁸ ’Ka fwi Babilɔn; ’ka si Kaldé tɛrɛ la yé ka kɛlɛ bélé ’blagɔnénu lé wo ke ’blanu ’lɛ, wo zo.

⁹ Naa, ka ye, maa dan bɛn blɛn kiɛre nwa lɛ yirinwana bɛbolazia tɛrɛ la yé wo nwa Babilɔn munu ma. Wo dan wo ma’lɛrɛ lɛ gulidanle we gi a va, yé wo dan a si lɛ. Wolé sawɔlɛnu a bélé gulidan sunya lé wo gulidanle dɔɔ, ’té wo ’ka dan wo pa gi wo leekoro nya lo, wo zo.

¹⁰ Wo dan ’wii lɛ Kaldénu lé tɛrɛ la. Munu faa lé wo ’wii tɛrɛ ’ko la, wo dan kan lɛ. Maa Gakelebale ɛ ke a fena.

¹¹ Iin, ka lé, ka ’wii anlé tɔnɔ ta, ka gi ’é nana yé ka bli ’é vo drɔɔ. Iin, ’ka fɔrɔ bélé diridané lé éé fɔrɔan luyɛ gi, a zo. ’Ka siaa bélé wisoonu lé wo fuu ke wo ta, a zo.

¹² Yara a ka bu gyɛna; ka yaazan yuɛ tana yara lé a gyɛle we ma. Sin, é a bɛn yara ’téli nya bɛnnu méléna; é a bwi nya; é a tɛrɛ gale lé é ’ka fɛ dɔa lo, a nya.

¹³ Gakelebale bli flile we ma, mi ’ka dan kɛlɛ lɛ ana é dɛrɛ lo. É dan kɛlɛ lɛ fɛna pla nya é wo. Munu faa lé wo dan gié lɛ Babilɔn sɔnɔ, wo gi é dan vuru lɛ wo ma, yé wo dan ’furu fɛn lɛ we faa lé é bɔ a ma, a we ma.

¹⁴ ’Kaa savulizannu faa lé, ’ka ma’lɛrɛ yé ’ka diri Babilɔn zi gulidanle a va we ma; ’ka sa vuli a va, té ka sawɔlɛnu ta dɔ lo. Naa, é wenyané kɛlɛ Gakelebale ma.

¹⁵ ’Ka siaa gulidandére nya a zi fɛfaana. É yɔfalo fu nwa; a ganevɔnanu zana a gi; a gurunu zana. Naa, Gakelebale ézé lɛgi pa a ma; ’ka kazé lɛgi pa a ma, ’ka kɛlɛ a lɛ bélé fɛan zo lé é a kɛlɛ, a zo.

¹⁶ Mian éé fɛ vɔa, é valé mian éé fɛ gya kɔblané nya fɛgyɛbléyi va, ’ka wozé nyaa tata. Wa mi gyɛna gwɔun nya, amalé mi faa do do ’é nɔla élé munu va; mi faa do do ’é fwi, ’é go ’élé tɛrɛ la.

¹⁷ Izraɛl a ’bla sanle lé golizra a zuo bin‐é, a nya; Asirinu nwiinzan blɛn a ble é vinin, yé é voéla ’ko, Babilɔn nwiinzan blɛn Nébukanɛsaa a wɔlɛnu yéli.

¹⁸ Bɛwemalé lai sunyanu lé Bale, Izraɛl lé Bale léma: Ka ye, maa dan we lɛdɔ lɛ Babilɔn nwiinzan blɛn valé alé tɛrɛ la munu gi bélé fɛan zo lé maa we lɛdɔ Asirinu nwiinzan blɛn gi fɛan zo, a zo.

¹⁹ Maa dan Izraɛl munu nyana lɛ wo pa gi é ziin; wolé fɛblena é dan kɛlɛ lɛ Kaamɛl valé Bazan tɛrɛ la, yé wobozen é dan kan lɛ Éfraim gɔ nwiin valé Galaad tɛrɛ la.

²⁰ Gakelebale léma: ’Bɛ yi ’konu la, ’bɛ bléyi ’ko va, wo dan Izraɛl lé weplenu gini lɛ, yé wo ’ka ana é dɛrɛ lo; wo dan Juda lé wenyanénu gini lɛ, yé wo ’ka dan wo ye lɛ é dɛrɛ lo; naa, munu lé maa wo vo ana, maa dan wo ma we vo lɛ.

²¹ Tɛrɛ ’ko la munu lé wo nwa Bale ma gɔnɔ fié, ’i nwa wo ma; ’i nwa ana munu ma, yé i we lɛdɔ wo gi. ’I wo zuo bin, ’i wo gyɛ, ’i wo kulu ga. Maa Gakelebale ɛ ke a fena. ’I anlé bélidɔwenu lɛ sɔɔ ’té.

²² Gulidan siaalenu zuogi éé goo wele nya tɛrɛ ’ko la, dunuzénmitawe ’ko a blɛɛn.

²³ Éé, mɛ léé? Wo tɛrɛ faa lé maato yéli; wa ’wii; Babilɔn sɛrɛ bɛnnu méléna.

²⁴ Babilɔn, an san vɔ i ’lɛ yé maa i kun a nya i ma trɔnné va. Wo bɔ i ma, wo i kun, i gulidan Gakelebale va, azama.

²⁵ Gakelebale élé gulidanfɛnu pagi?-?kɔn lɛ so, yé élé bli fli gulidanfɛnu si a gi; naa, Mizan lai sunyanu lé Gakelebale lé nyanama lé é a pa Kaldé munu lé tɛrɛ la, yee lé ke bɛ.

²⁶ ’Ka si Babilɔn zi fɛfaana yé ’ka bɔra fla; ’ka alé fɛtadɔboonu lɛ so; ’ka wo gifɛ zun dɔ bélé ’sanwun zun dɔle zo yé ’ka a sɛrɛ tata. Té alé fɛ do kpen é vo ana é dɛrɛ lo.

²⁷ ’Ka dirigɔnénu faa gyɛ, ’ka wo bɔrɔ bo. Wenaané kɛlɛ wo lɛ ma, naa, wozé yi bɔ; we lɛdɔ wo gi bléyi bɔ.

²⁸ ’Ka tɔné dɔ Babilɔn lé vɔfligimunu lé siaalenu lɛ, yé ’ka go Gakelebale kalé Bale lé we lɛgi pale zana dɔɔ Siɔn, yé ’ka a bangikɔn lɛgi pale zana dɔɔ ana.

²⁹ ’Ka savulizannu faa laa, léé, ’wo nwa Babilɔn ma, wo lé wo savulile dɔɔ, wo lé. ’Ka diri a zi, té mi do é so a ta lo. ’Ka a lɛgi pa a kɛlɛwenu yɛrama. ’Ka kɛlɛ a lɛ fɛan zo lé é a kɛlɛ, a zo ’té. Naa, é nwa boblɛn nya Gakelebale ma, Izraɛl lé Mi Sauun ma,

³⁰ ’bɛ lé we ma lé alé pɛniɛnu é dan dia lɛ fla zinu ta, yé alé gulidanmunu faa é dan zamaga wo lɛ ’bɛ yi nya. Maa Gakelebale ɛ ke a fena.

³¹ Mizan, lai sunyanu lé Gakelebale léma: Boblɛnzan, bé ye, maa a i ma; ilé yi bɔ; we lɛdɔ i gi bléyi bɔ.

³² Boblɛnzan sɔné é dan san lɛ yé é dan dia lɛ, yé a nwazan ’ka dan kɛlɛ lɛ lo. Maa dan alé flanu valé é zi tɛrɛnu faa kyɛ ble lɛ.

³³ Lai sunyanu lé Gakelebale léma: Woo yaan Izraɛl munu valé Juda munu ta ékeva; munu faa lé wo go wo nya luu gi, ’bɛnu vo é kunle wo ma; wo ’ka daanle wo ma nyi si lɛ lo.

³⁴ Naa, wo lɛgipazan a plɛplɛ; yee lé wa tɔ laama lai sunyanu lé Gakelebale. Naa, é dan dɔ lɛ wo zuo, léé, é flinle nɔ wo lɛ wolé tɛrɛ la, yé Babilɔn munu ma ’é nyɔɔn.

³⁵ Gakelebale léma: ’Wo gwɔun sia Kaldé munu ma! ’Wa sia Babilɔn munu koo, a nwiinmunu koo, alé wedɔɔzannu koo, wo ma.

³⁶ ’Wo gwɔun sia viébalelayezannu ma, ’wo kɛlɛ bélé ’wuosɛrɛzannu zo ma. ’Wo gwɔun sia nyanazannu ma, di ’é kini wo gi ma.

³⁷ ’Wo gwɔun sia alé wisoonu valé alé gulidanmunu ma, Munu gɔnɔ faa lé wo ke a va, ’wa sia wo ma ma; ’Wo kɛlɛ bélé lomu zo ma. ’Wo gwɔun sia wolé fɛwezannu ma, ’wo wii wo ta ma.

³⁸ Yɛrɛgabléyi ’é bɔ ’yinu ma, ’wo béli ma. Naa, tɛrɛ ’ko a é fanle miyilinu nya. Wo kɛlɛ gwegyɛzannu nya wolé miyilinu lé we ma.

³⁹ Bɛwemalé bwigiwinu é dan nyana lɛ ’bɛna gwenu va, yé mianéléduo é dan nyana lɛ ana. Mi ’ka dan nyana lɛ ana é dɛrɛ monomono lo, munu ’ka dan kɛlɛ lɛ ana é dɛrɛ monomono lo,

⁴⁰ bélé Sɔdɔm valé Gɔmɔɔ valé ’wo punma flanu lé Gakelebale wo sɛrɛ, wo zo. Mi ’ka dan nyana lɛ ana é dɛrɛ lo, mi do kpen ’ka dan kɛlɛ lɛ ana lo. Maa Gakelebale ɛ ke a fena.

⁴¹ Ka ye, munu a sina yirinwana bɛbolazia, Bɛn blɛn do valé munu nwiinzan blɛn plɛplɛnu nya; Wa nwana tɛrɛ glɛ sinanu na,

⁴² Sa valé toané din a wo lee; Wa gi pɔnpɔnzannu nya; wo nyanai ’ka zén‐é lo. Wo dére gi éé wé bélé wɛyi zo; Wo vɔ wisoonu ta; Wo ma a é ’lɛrɛle gulidanle we ma bélé mi do kpen zo, Bii Babilɔn lé munu ma.

⁴³ Babilɔn nwiinzan blɛn we ’ko ’ma tɔɔn, A bɛwɔlɛ gi nyaa a ma; Nyané blɛn blele a kun Bélé né yaa le lé nyanéblele zo.

⁴⁴ Ka ye, wo nyanézannu éé giéan Juudɛn yuu gɔnu tɔbɔlenu ma bélé golizra zo, yé woo giéan nyanana plɛplɛ ma. Kele tɔɔn maa dan wo bin lɛ yé mi lé maa si a va, maa dan ’bɛ dɔ lɛ a nwiin. Naa, de ɛ ke bélé maa zoo? De ɛ dan an béli dɔ lɛɛ? Yé minwiinzan kyɛn ɛ dan dɔ lɛ an maa?

⁴⁵ Bɛwemalé, we lé é dɔ Gakelebale gi Babilɔn lé we ma, ’ka tɔné dɔ a lɛ, yee valé we lé é a ’é ’wuo gi bɔrɔna Kaldé tɛrɛ ma a nya, wo nya. Weboen lé, wo dan wo gana lɛ bélé ’blanu lé plɛplɛ ’ka wo lee lo, wo zo. Wo dan ’wii lɛ wo nyanana ta weboen nya.

⁴⁶ Vun lé é we Babilɔn sile we ma, é tɛrɛ ma nyɔɔn, yé wo wo siaale ’ma bɛnnu méléna.