Jérémi 5 - Kazambale lé Sebe Sauunu 1979

Jérusalɛm lé wenyané

¹ ’Ka gié Jérusalɛm zinu ta, ’Ka nagini, ’ka we ma laa, ’ka vuun la nagini, Dé ka mi do ye ana, dé é a mi do nyaoo, ’Té éé we tegele kɛla, ’té é a é kunle webozen ma, Maa dan Jérusalɛm munu ma we vo lɛ alé we ma.

² Dé wa fe boenwo léé: Gakelebale a é yuɛma, ’Té wa bale ’nyɔɔnna vié nya.

³ Gakelebale, i yuɛ ’ka webozen yé loo? I wo bla, yé é ’ka ’na lɛ wo ma lo; I wo nyaa, yé wo ’ka ilé wepladére nyi si lɛ lo; Yé wo yuɛma dɔ plɛplɛ bélé gɔlɛ zo. Wo sɔn vɔ ’wo bli nɔlale ma.

⁴ Maa lé kɔɔn léé: Munu ’ko, wa nénu nya. Wo ’ka Gakelebale lé zi dɔɔa lo; wo ’ka wolé Bale lé bélidɔwe dɔɔa lo, Amalé woo we kɛla tavole nya.

⁵ Maa dan go lɛ mi segelenu va, yé ’bɛnu lɛ lé maa dan we fe lɛ; Naa, ’bɛnu ɛ Gakelebale lé zi dɔɔ, Yé ’bɛnu ’wolé Bale lé bélidɔwe dɔɔ. Naa, wo é ziin, wo ’wo bɔrɔ ma luubale kini Yé wo si an wuo;

⁶ Amalé pɔrɔ gi golizra éé wo gya, Bwila glau éé wo wi kinié ékema, Kua a wo mavɔɔna wolé flagɔrɔ ’léé, Munu faa lé woo sié fla, é dan wo wi kini lɛ ékema; Naa, wo bélidɔwe sɛrɛ di, Wo yuɛgiblanle gi gyɛ.

⁷ Maa kɛla kaa ’naan, yé an ka ma we voo? Kalé nénu sɔn vɔ an ma, Yé vié balenu lé wo ’ka lo, woo wo ’nyɔɔn‐an. Maa fɛ kiɛre nɔ wo lɛ, naa, woo goo gɔné bɛ gini lɛ. Woo wɔraan gɔnégini le lé kɔn gi wo gu nya.

⁸ Wa bélé wisoogɔnénu lé wo ke é buale, ’té woo vlanburuwo ’ko valé ’ko, wo zo. Wo faa do do a siaana ’wo bɔlu bɛ na zuo.

⁹ Gakelebale léé: Maa ’ka dan we lɛdɔ lɛ wo gi we ’konu ma loo? Maa ’ka dan anzé lɛgi pa lɛ ’bɛ zo bɛn ma loo?

¹⁰ ’Ka vɔ a gɔrɔ bɔrɔ la yé ’ka a ’wii, Naa, té ka a zana tata lo. Alé dɔrɔyilinu lé wo ’ka Gakelebale zé nya monomono lo, ’Ka wo soowɔla.

¹¹ Naa, Izraɛl munu valé Juda munu ’ka plaan an wuo lo, azama. Maa Gakelebale ɛ ke a fena.

Bale we lɛ kini munu lɛ

¹² Wo sɔn vɔ Gakelebale ma yé wo léé: Bale ’ka lo. Yé we tɔntɔn ’ka dan bɔ lɛ ko ma lo. Gwɔun valé lɔrɔ ’ka dan ko gyɛ lɛ lo.

¹³ Balelayemunu a bélé fu zo é pla, yé mi do ’ka we fé wo lɔlu nya lo. ’É kɛlɛ wo lɛ yee ɛ zo ma.

¹⁴ Amalé Gakelebale, lai sunyanu lé Bale, léma: Naa, ka we ’ko fe, amalé é sɔ an lɛ léé, an dére ’é kɛlɛ bii Jérémi ’léé kyɛ nya, yé munu ’ko ’é kɛlɛ yili gale nya, yé kyɛ ’é wo ble.

¹⁵ Gakelebale léé: Ka lé, ka ke Izraɛl munu nya, maa dan bɛn baa do nwa lɛ ka ma, yé wo dan guli dan lɛ ka va; wa bɛn plɛplɛ nya, bɛn namɔnle nya; bɛn lé ka ’ka wo dére dɔɔa lo, yé ka ’ka dan wo dére gi ’ma lɛ lo, woo lé.

¹⁶ Alé sakɔlɛ a mi vun nya, yé wo faa a nyanazannu nya.

¹⁷ É dan kalé féifɛnu valé kalé buru ble lɛ; é dan ka benu valé ka lunu kulu ga lɛ; é dan kalé ’blanu valé kalé dirinu ble lɛ; é dan kalé dɔrɔféinu valé kalé bɔrɔféinu ble lɛ; yé kalé nyanamunu lé flanu lé ka ke é pale wo ta, wo dan wo sɛrɛ lɛ tata.

¹⁸ Gakelebale léé: Naa, ’bɛ yinu la, maa ’ka dan ka kulu ga lɛ tata lo.

¹⁹ Dé ka fe léé: Mɛmalé Gakelebale kolé Bale éé we ’ko faa kɛla ko lɛɛ? bé zi pa wo lɛ léé: Ka sɔn vɔa an ma fɛan zo yé ka bale bɛnu bɔ kalé tɛrɛ la, a zo duo lé ka dan pla lɛ bɛn bɛnu wuo, tɛrɛ lé é ’ka kazé nya lo, a ta.

²⁰ ’Ka we ’ko lɛ kini Jakɔb lé munu lɛ, yé ’ka a zana dɔɔ Juda munu lɛ, léé:

²¹ ’Kaa tavozannu lé ka bli ’ka tegele lo, ’ka tɔné dɔ we ’ko lɛ. Ka yuɛnu a, yé ka ’ka yɛrɛ yé lo; ka tɔnénu a, yé ka ’ka we do kpen maan lo.

²² Gakelebale léma: Ka ’ka kanaan an lee loo? Ka ma ’ka nyɔɔn‐an an ’lɛ loo? Maa ɛ wɛyi glɛ dɔ nyéné nya, a glɛ lé wɛyi ’ka bɔa a kinile lɛ monomono lo, yee lé. Dé é fɔrɔoo, plɛplɛ ’ka a lee lo, dé é gi gunu oo, é ’ka a kinié lo.

²³ Munu ’ko a bli plɛplɛzannu valé tɔnégiplɛplɛzannu nya; woo nwaan mi ma, yé woo goo.

²⁴ Wo ’ka a fé wo bli gi léé: Kaa kana Gakelebale kolé Bale lee, lo. Bale lé éé lɛɛ paan zia lɛɛdabléyi va, ’té éé lɛɛ vininzan valé lɛɛ voélazan dan, ’té éé bléyi kenu no ko lɛ kolé féifɛnu gyɛle we ma, wo ’ka kanaan yee Bale lee lo.

²⁵ Kalé weplenu lé we ma lé ka mawe zinnu ’ka kɛlɛ lɛ ’é kɛlɛbléyi va lo; kalé wenyanénu lé we ma lé wezinnu ’ko vuru ka ma.

²⁶ Naa, mi nyanénu a anlé munu méléna; woo munu mavɔɔan bélé mianégyɛzan éé sannu dɔa mianénu lee fɛan zo, a zo. Woo sélinu vɔa, yé woo munu kunwo wo nya.

²⁷ Mane?-?nu woo zénkɔɔ faan fɛan zo, a zo lé wolé kɔnnu a é fanle dablifɛnu nya. ’Bɛ zo lé woo kɛla mi plɛplɛnu valé fuablezannu nya.

²⁸ Woo buaan, wo kɔlɛ éé bié wo ta planplan; wolé wenaané kɛlɛle éé giéan é glɛ la; wo ’ka dɔa tigalazannu valé bugalazannu zuo lo, yé ’bɛ faa nyian éé woo wo ma; wo ’ka we tegele kɛla nyanégyɛzannu lɛ lo.

²⁹ Gakelebale léé: Maa ’ka dan we lɛdɔ lɛ wo gi we ’konu ma loo? Maa ’ka dan anzé lɛgi pa lɛ ’bɛ zo bɛn ma loo?

³⁰ Dunuzénmita wenu valé bozo wenu éé kɛla tɛrɛ ’ko la;

³¹ balelayemunu éé balelawe fé vié nya, yé Balebanmunu éé dɔa wo dére zuo, yé ’bɛ sɔ anlé munu lɛ. Ka dan kɛlɛ lɛ kaa a ’wuoplanaa?