Jérémi 49 - Kazambale lé Sebe Sauunu 1979

Bale Amɔn munu lé we ble

¹ Amɔn munu mawe lo. Gakelebale léma: Izraɛl be do kpen ’ka loo? A zarablezan ’ka loo? Mɛmalé Gad tɛrɛ la vo bale lé wa laama Malkɔm, a lɛ, yé ’bɛ banmunu éé nyanaan ana flanu taa?

² Gakelebale léma: Bɛwemalé a yinu é dan bɔ lɛ yé maa dan nwa lɛ Amɔn munu lé fla lé wa laama Rabat, a ma, yé wo dan guli dan siaalenu zuo gi ’ma lɛ. É dan kɛlɛ lɛ é ’bin nya yé a zi flanu kyɛ é dan ble lɛ, yé munu lé wo Izraɛl munu bin, Izraɛl munu é dan wo bin lɛ; maa Gakelebale ɛ ke a fena.

³ Esibɔn munu, ’ka dunnu, ’ka siaa, naa, wo Ai guru zana a gi. Raba munu, ’ka siaa yé ’ka bɔlɔ zén ka ta; ’ka wuvɔ yé ’ka vlan buru ’ko valé ’kona bɔbɔ vɔle nya. Naa, wo Malkɔm si yé wa gona a banzannu valé a nwiinzannu nya luu gi.

⁴ Mɛmalé ibo tɔ bɔa ilé gɔ woronanu maa? Nwamimazan, ilé gɔ worona ’yibo. I pa ilé fɛwezannu ta yé i léé, de ɛ dan nwa lɛ ’é maa?

⁵ Mizan, lai sunyanu lé Gakelebale léma: Ka ye, maa dan kana blɛn zén lɛ i gi; é dan si lɛ i zi fɛfaana yé é zén i gi; wo dan ka do do faa zuo bin lɛ baa, yé mi do kpen ’ka dan vɔfligimunu zén lɛ ékeva é dɛrɛ lo.

⁶ Naa, ’bɛ zuo, maa dan Amɔn munu si lɛ luu gi. Maa Gakelebale ɛ ke a fena.

Édom — Damas — Kédaa — Élam Bale wolé munu lé we ble

⁷ Édom munu mawe lo. Lai sunyanu lé Gakelebale léma: Wedɔɔle ’ka Téman munu gi é dɛrɛ loo? ’Wuoatazan lé we ma pale saan? Wolé wedɔɔle ’ka é dɛrɛ loo?

⁸ Dédan munu, ’ka fwi, ’ka nwunzi dɔ, ’ka yɔɔ gɔmagurunu gi. Naa, an dan wenaané bɔ lɛ Ézau kulunu ma; we lɛdɔ a gi bléyi bɔ.

⁹ Dé dɔrɔsozannu da i va, wo ’ka dan a wɔlɛ do kpen vo lɛ é gɔ ma loo? Dé kyeenwozannu da é béli, fɛ lé wa si, wa ke vo.

¹⁰ Naa, maa dan Ézau gi puo lɛ; maa dan a yɔɔna tanu bɔra lɛ yé é ’ka bɔa yɔɔle lɛ é dɛrɛ lo. Alé nénu koo, a bwenu koo, a punma munu koo, wo dan zamaga wo lɛ, ’té wo ’ka é dɛrɛ lo.

¹¹ ’I daan tigalazannu valé bugalazannu ma, maa dan wo vo lɛ é yuɛma, yé ilé zanagala lomu ’wo pa an ta ma.

¹² Naa, Gakelebale léma: Bé ye, mi lé é ’ka kɔɔn ’yi ’ko minizan nya lo, é dan a mini lɛ; yé bii, wo ’ka dan we lɛdɔ lɛ i gi loo? Wo dan we lɛdɔ lɛ i gi, i dan a mini lɛ.

¹³ Naa, Gakelebale léma: Maa anbozen ’nyɔɔn, léé, Bozra é dan kɛlɛ lɛ guru zana a gizan valé serelebomazan nya; wo dan a sɛrɛ lɛ tata yé wo bale pa a ma. Alé flanu é dan kɛlɛ lɛ é ’bin nya, ’té ’bɛ glɛ ’ka lo.

¹⁴ We zuo lé Gakelebale a fe yé maa a ’ma, yee lo; dére lé é a pa zia bɛnnu lɛ, yee lo. É léé: ’Ka zén ékeva; ’ka nwa Bozra ma; ’ka nwa gulidanle we gi a va.

¹⁵ Naa, maa dan i kɛlɛ lɛ kiéné bɛnnu méléna; munu é dan serele bo lɛ i ma.

¹⁶ Bii lé i nyanaan gɔlɛkoro gi, yé i nyanaan gɔ sokoro?-?nénu nwiin, ilé kana zénle mi gi valé ilé boblɛn, wo i saan. Dé ilé kɔn dɔ fɛna nwale loruna bélé gola zooo, maa dan i dia lɛ. Maa Gakelebale ɛ ke a fena.

¹⁷ Édom é dan kɛlɛ lɛ guru zana a gizan nya; munu faa lé wo dan gié lɛ a sɔnɔ wo gi é dan vuru lɛ yé wo dan ’furu fɛn lɛ we faa lé é bɔ a ma, a we ma.

¹⁸ Gakelebale léma: Mi ’ka dan kɛlɛ lɛ ana é dɛrɛ lo; mi do kpen ’ka dan nyana lɛ ana lo. É dan kɛlɛ lɛ bélé Sɔdɔm valé Gɔmɔɔ valé wo sɔnɔ flanu lé maa wo sɛrɛ tata, wo zo.

¹⁹ Bé ye, é si Juudɛn yuu tɔbɔle gɔɔn ma yé é nwa nyanana plɛplɛ ma bélé golizra zo. Kele tɔɔn, maa kɛlɛ léé, Édom munu é fwi, yé mi lé maa a si a va, maa dan ’bɛzan dɔ lɛ ana. Naa, de ɛ ke bélé maa zoo? De ɛ dan an béli dɔ lɛɛ? Yé minwiinzan lé é dan dɔ lɛ an ma, é a kyɛɛn?

²⁰ Bɛwemalé, we lé é dɔ Gakelebale gi léé, é dan a kɛlɛ lɛ Édom munu lɛ, ’bɛ valé we lé é a é bɔn‐in bɔrɔna léé, ’é a kɛlɛ Téman munu lɛ, ’ka tɔné dɔ wo lɛ. Webozen lé, wo dan wo gana lɛ bélé ’bla lé plɛplɛ ’ka a lee lo, a zo. Wo dan ’wii lɛ wo nyanana ta webozen nya.

²¹ Wo diale vun é dan we lɛ, yé é dan tɛrɛ manyɔɔn lɛ. Wo dan wo siaalenu ’ma lɛ fɔɔ Wɛyi Sɔɔn ba gi.

²² Bé ye, é dan go lɛ bélé gola lé éé sié, a zo. É dan é bɛanu soi lɛ Bozra ta, yé ’bɛ yi nya Édom nyanazannu bli é dan kɛlɛ lɛ bélé né yaa le bli zo.

²³ Damas munu mawe lo. Amat valé Aapad, wa é dɔle ’wo gane la. Naa, wo wenaané ’ma; wo ma nyɔɔn, bélé wɛyi nanole lé é ’ka bɔa nyanale lɛ drɔɔ lo, a zo.

²⁴ Damas fuu si é ta, é nɔla fwile we ma, di kini a gi. Nyanéblele valé kleblele bɔ a ma bélé né yaa le zo.

²⁵ Éé! fla tɔbɔle lé éé an gi nanama, mi ’ka a ta é dɛrɛ loo?

²⁶ Bɛwemalé pɛniɛnu dia alé fla zinu ta, yé alé gulidanmunu faa é dan zamaga wo lɛ ’bɛ yi ’ko nya. A zo lé lai sunyanu lé Gakelebale a fe.

²⁷ Maa dan kyɛ vɔ lɛ Damas lé kɔnnu va, yé é dan Bɛn‐Adad lé fuakɔnnu kyɛ ble lɛ.

²⁸ Kédaa tɛrɛ valé Asɔɔ tɛrɛ lé Babilɔn nwiinzan blɛn Nébukanɛsaa wo kele guli nya, wo ma we lé Bale a fe, yee lo. Gakelebale léma: ’Ka nwa, ’ka go Kédaa ma; ’ka yirinwanazia munu kulu ga.

²⁹ Wo dan wolé sɔkɔnnu valé wolé trubɛnu si lɛ, yé wolé sɔkɔnnu koo, wolé nyɔgɔménu koo, wo dan wo si lɛ yé wo dan siaa lɛ wo zi fɛfaana, yé siaalenu ’ko é dan wo zuru va nyɛ kini lɛ.

³⁰ Gakelebale léma: ’Kaa Asɔɔ munu, ’ka fwioo, ’ka fwi! Ka faa fwi ka bli faa nya; ’ka nyanana gini fɛ bɛna. Naa, we do dɔ Babilɔn nwiinzan blɛn Nébukanɛsaa gi kalé we ma; é a ka mawe bɔrɔna é bɔn‐in.

³¹ ’Ka nwa, ’ka nwa bɛn drɔɔ do lé éé nyanaan fɛna gligli na, a ma; maa Gakelebale ɛ ke a fena. Alé flagɔrɔ ’léé duoli ’ka lo, yé foliɛwɔlɛ ’ka a ta lo; éé nyanaan é do.

³² Wolé nyɔgɔménu é dan kɛlɛ lɛ gulizara nya, yé wolé trubɛ kiɛrenu é dan kɛlɛ lɛ ’wiiatafɛ nya. Munu lé woo puomagun boo é sun nya, maa dan wo faa kini lɛ ékema, yé maa dan wo nyanézannu bɔra lɛ wo zi fɛfaana, yé wo dan wolé fla vo lɛ é ’bin nya. Maa Gakelebale ɛ ke a fena.

³³ Asɔɔ é dan kɛlɛ lɛ gwe nyanana nya, é dan vo lɛ bwi nya yifaama. Mi do ’ka dan nyana lɛ ana lo, mi do kpen ’ka dan yii lɛ ana lo.

³⁴ Gakelebale we fe balelayezan Jérémi lɛ Élam mawe nya, Juda nwiinzan blɛn Sédésias plale munu nwiin pélisia bléyi va. É léma:

³⁵ Lai sunyanu lé Gakelebale léma: Ka ye, Élam munu lé sa lé woo baama a gi gulidanfɛ plɛplɛ nya, maa dan a yéli lɛ.

³⁶ Fu ziɛn lé woo sié la glɛ sina ziɛnna, maa dan wo laa lɛ Élam munu ma. Maa dan wo faa kini lɛ ékema fu ’konu nya, yé Élam munu lé wo fwi, bɛn lé wo ’ka dan bɔ lɛ a gi lo, ’bɛ bɛn ’ka lo.

³⁷ Yé maa dan Élam munu ma nyɔɔn lɛ wo nyanézannu lé, é sɔ ’bɛnu lɛ léé, ’wo wolé tɛrɛla nyaa, ’bɛnu ’lɛ. Yé Gakelebale léé: Maa dan we tɔntɔnnu bɔ lɛ wo ma, an bli flile baba we ma. Yé maa dan wo zuo bin lɛ gwɔun nya fɔɔ yé maa wo kulu ga.

³⁸ Maa dan anlé webleblin dɔra lɛ Élam, yé maa dan a nwiinzan blɛn valé minwiinzannu gyɛ lɛ. Maa Gakelebale ɛ ke a fena.

³⁹ Naa, é voéla, Élam munu lé wo ke luu gi, maa dan da lɛ wo nya. Maa Gakelebale ɛ ke a fena.