Jérémi 48 - Kazambale lé Sebe Sauunu 1979

Moab munu kulu gale

¹ Moab mawe lo. Lai sunyanu lé Gakelebale, Izraɛl lé Bale léma: We tɔntɔn kɛlɛ Nébo lɛ, naa, wo ’wii a ta. Kiijataim a é dɔle é gane ta; wa si. Misigab bɔ gyɛ, wa sɛrɛ.

² Moab lé fuatɔ ’ka é dɛrɛ lo, Woo bɔn‐in bɔrɔan a sanle ma Esibɔn; Kaa go, kaa a kulu ga bɛnnu méléna, Bii é ziin, Madamɛn, wo dan i sɛrɛ lɛ tata, Wa i zuo binna gwɔun nya.

³ Koronaim munu a siaana; Wo ’wii a ta, yé kleblele blɛn bɔ a ma.

⁴ Moab sɛrɛ, Woo nénu siaalenu maan ana.

⁵ Munu Lusit gɔ gié wuvɔle nya, Yé munu lé wa Koronaim gɔ zunna, wolé kleblele siaalenu zuo gi a wena.

⁶ ’Ka fwi, ’ka si we gi. ’Ka kɛlɛ bélé nyanaizénlazan lé é ke bwi gi, a zo.

⁷ Naa, bii, i pale a i kɛlɛwenu valé ilé fɛwezannu ta; Amalé bii é ziin, wo dan i si lɛ, Yé wo dan kalé bale Kémɔs si lɛ Yé wo dan go lɛ a banzannu valé a nwiinzannu nya luu gi.

⁸ Fɛsɛrɛzan é dan bɔra lɛ fla do do ta, Fla do kpen ’ka dan so lɛ a ta lo; Gɔworona é dan sɛrɛ lɛ za ma, yé fɛna pɛblɛɛ é dan sɛrɛ lɛ, Gakelebale a fe fɛan zo, a zo.

⁹ ’Ka miané bɛa nɔ Moab lɛ, Yé é si a nya yé é go. Alé flanu é dan kɛlɛ lɛ bwi nya, Mi do ’ka dan nyana lɛ ana é dɛrɛ lo.

¹⁰ Mian éé Gakelebale lé nyanama paan yuɛgi blan nya, ’wo bale pa a ma ma; Mian é léé, té élé gwɔun é mi gyɛ lo, ’wo bale pa ’bɛzan ma ma.

¹¹ É sia a kiéné la bléyi va fɔɔ kyɔ Moab a é nyanale drɔɔ; é a nwɛ lé a bo pla a wuo, a zo. Wo ’ka a zén lɛ bɔ bɛ gi lo, é ’ka go lɛ luu gi lo. A néné vo é dɔbɛ gi, a gin ’ka nɔla lɛ lo.

¹² Gakelebale léma: Bɛwemalé, a yi é dan bɔ lɛ yé an munu pa a lɛ zia yé wo dan a zén lɛ bɔ bɛnu gi; wo dan nwɛ si lɛ a bɔnu gi yé wo dan alé bɔ ’wii lɛ.

¹³ Yara é dan Moab munu gyɛ lɛ wolé bale Kémɔs lé we ma, bélé fɛan zo lé Bétɛl bale lé, Izraɛl munu bli vo a lɛ, é wo gyɛ yara nya fɛan zo, a zo.

¹⁴ É kɛlɛ kaa yé ka léé: Ko a sunyanu lé ke nyanazannu nya, ’Té wo ma ke é ’lɛrɛle gulidanle we ma, wo nyaa?

¹⁵ Minwiinzan blɛn lé wa tɔ laama lagi sunyanu lé Gakelebale, é léma: Wo ’wii Moab ta, alé flanu kyɛ a blena; a goi a nwana, Wo alé pɛniɛ zimanu bɔrɔ bo,

¹⁶ Moab é dan kɛlɛ lɛ é ’bin nya lao, We tɔntɔn é dan bɔ lɛ a ma é kele.

¹⁷ Ka faa lé ka a zi lɛ sɔɔ, Yé ka a tɔ dɔɔ, ’Ka wuvɔ a ta, ’Ka fe léé: É kɛlɛ kaa yé alé plaminwiin soowoli vwii plɛplɛ lé, a tɔ ke é bɔle, yé é yélii?

¹⁸ Dibɔnzan, blɛnzan, ’I si ilé fua nyanana, ’i zun, ’i nyana tɛrɛ gale ta. Naa, Moab sɛrɛzan nwa i ma, É a i yɔɔna plɛplɛ sɛrɛna.

¹⁹ Aroɛɛzan, ’i dɔ zi ta yé bé nagini, ’I we laa vɔfliizan valé sowegizan lee, Léé, dé mɛ we ɛ bɔɔ?

²⁰ Moab a é dɔle é gane ta, naa, é a é sɛrɛle. ’Ka dunnu, ’ka siaa, ’Ka zana dɔɔ Aanɔn yuu gɔnu la, Léé, wo ’wii Moab ta.

²¹ Wo we lɛdɔ fɛna pɛblɛɛna tɛrɛlamunu gi; Olɔn koo, Jaas koo, Méfaa koo,

²² Dibɔn koo, Nébo koo, Bɛt‐Diblataim koo,

²³ Kiijataim koo, Bɛt‐Gamul koo, Bɛt‐Méɔn koo,

²⁴ Kérijɔt koo, Bozra koo, Moab tɛrɛ la flanu faa koo, dé wa baaoo, dé wa é puoo, woo lé.

²⁵ Gakelebale léma: Moab lé plɛplɛ nyaa, yé a bɛ yéli.

Wo dan Moab zun lɛ

²⁶ ’Ka a gyɛ nwɛ nya, naa, é nwa Gakelebale ma; Moab ’é burula é féé va, yé ’é kɛlɛ é ziin yérisiémazan nya ma.

²⁷ Izraɛl ’ka kɛlɛ lɛ yérisiémazan nya i yuɛ gi loo? Wo bɔ a ma kyeenwozannu va, amalé dé i a alé we fena, ’té i ’wuo nyɔɔn‐aan?

²⁸ ’Kaa Moab munu, ’ka sɔn vɔ flanu ma, yé ’ka nyana gɔlɛnu méléna; ’ka kɛlɛ bélé plalanu lé, woo ’wolé kɔnnu dɔa gɔlɛ worona gɔ ma, wo zo.

²⁹ Moab lé boblɛn lé é gié é glɛ la, ko dɔɔ. A nwale koo, abo bɔle koo, abo bliile koo, alé mi ginile é yuɛ zuo koo, ko dɔɔ.

³⁰ Gakelebale léma: Maa alé ébo bɔle dɔɔ. Alé boadére blɛnnu valé a kɛlɛwe boanu, maa wo dɔɔ.

³¹ Bɛwemalé an dunnuan Moab tɛrɛ lé we ma. An dunnuan Moab tɛrɛ faa lé we ma. Woo bamaflin woo Kii‐Érɛs munu lé we ma.

³² Sibima dɔrɔféi, an wuvɔa ilé we ma, ’bɛ mini Jaézɛɛ zé ta; i bɛnu bɔ wɛyi zi, wo soi fɔɔ yé wo bɔ Jaézɛɛ lé wɛyi ma. Fɛsɛrɛzan ’wii ilé dɔrɔ sole ta, yee valé a wɔlɛnu ta.

³³ Ginanale valé gi drɔɔ san ilé féinu ta, é san Moab tɛrɛ faa la. An dɔrɔ béli kana blɛnnu gi; wo ’ka dɔrɔ zɔn‐o é dɛrɛ ginanale nya lo; guli dan siaalenu lé, gi nana siaalenu kaan lo.

³⁴ Esibɔn munu lé siaalenu zuogi éé wé fɔɔ Éléalé; woo wo dére maan fɔɔ Jaas; a péli sia Zoaa yé é bɔ Koronaim, fɔɔ yé é bɔ Églat‐Sélisija; naa, wo Nimrim ’yinu sɛrɛ é ziin.

³⁵ Gakelebale léé: É sɔ an lɛ léé, an Moab zé nyaa. Mi lé é gié alé gɔ nwiin yobannanu na, ’té éé lasikɔrɔpo kyɛ blé alé bale lɛ, té ’bɛzan é kɛlɛ ana é dɛrɛ lo.

³⁶ Ma a dunnuna an gi Moab lé we ma; maa a dunnuna an gi, Kii‐Érɛs lé munu lé we ma, alé fɛ zinnu faa lé wo wo zun dɔ, wo san wo lee, azama.

³⁷ Naa, wo nwin faa a é puiɛle; wo puoma gun faa a é bole; wo wo bɛnu faa ma mian, yé bɔlɔ a é dɔle wo gyɛn.

³⁸ Moab kɔn nwiinnu faa valé alé vuunnu faa la, wa wu saa vɔna. Naa, maa Moab ’wii bélé bɔ lé é ’ka we do nya lo, wa ’wiié fɛan zo, a zo, azama. Maa Gakelebale ɛ ke a fena.

³⁹ É a é ’wiile, ’ka siaa dunnule nya; yara Moab gyɛ yé é lala dɔ. A zi munu faa éé Moab yé yérisiémazan valé di kinié mi gi fɛ nya.

⁴⁰ Naa, Gakelebale léma: Ka ye, Moab nyanézan éé sié bélé gola zo, yé é bɛa soi Moab tɛrɛ ta.

⁴¹ Wo Kérijɔt si, wa yɔɔna plɛplɛnu si, yé ’bɛ yi nya Moab nyanazannu bli é dan kɛlɛ lɛ bélé né yaa le bli zo.

⁴² Moab zé é dan nyaa lɛ; é ’ka dan kɛlɛ lɛ bɛn nya é ziin lo, naa, é nwa Gakelebale ma, azama.

⁴³ Moab munu, kanale blɛn koo, guru koo, séli koo, wa ka lɛbɛnna. Maa Gakelebale ɛ ke a fena.

⁴⁴ Mian é fwi kanale lee é dan vɔ lɛ guru gi, yé mian é si guru gi, é dan vɔ lɛ séli gi. Naa, Gakelebale léma: Moab, lɛɛ ’ko gi maa dan we lɛdɔ lɛ i gi.

⁴⁵ Vɔfligimunu fuu si wo ta yé wo dɔ Esibɔn, tɔɔn, kyɛ bi Esibɔn; kyɛnɛnɛ nwa Sioni méléna yé é Moab munu lɛ do ble; é wolé mi blɛnblɛnnu ble.

⁴⁶ Moab munu, we tɔntɔn ’é kɛlɛ ka lɛ ma. Kémɔs banmunu san. Naa, wo go ka benu nya luu gi, é valé ka lunu nya.

⁴⁷ Naa, bléyi voéla gi, maa dan Moab munu si lɛ luu gi, maa Gakelebale ɛ ke a fena. A zo lé maa dan Moab zé we ’wuo dɔ lɛ.