Jérémi 46 - Kazambale lé Sebe Sauunu 1979

Wo Éjipitinu kele Kaakémis

¹ Dére lé Gakelebale a fe balelayezan Jérémi lɛ bɛnnu mawe nya, yee lé ke ’ko:

² Éjipiti mawe lo: Éjipiti nwiinzan blɛn Faraɔn Néko lé é ke é nyanale Kaakémis, Yufrat yuu sɔnɔ bɛ, ’té Babilɔn nwiinzan blɛn Nébukanɛsaa a gyɛ Juda nwiinzan blɛn Jozias be Jojakim plale mi nwiin lɛɛ ziɛnzan gi bɛ, alé sunyanu mawe lé ke ’ko:

³ ’Ka botakuunfɛ kiéné valé a blɛn ma’lɛrɛ Yé ’ka dɔ gulibale la.

⁴ ’Ka wisoonu ma’lɛrɛ, ’Kaa wisoonu ta sunyanu, ’ka vɔ wisoonu ta. ’Ka bɔra a gi kalé gulidankoronu nya ka ’wuo ma, ’Kalé dinnu ma gɔrɔla, ’Kalé golɛtayɔɔfɛnu zén ka ta.

⁵ Mɛ lé maa a yé bɛɛ? Wa kanana, ’té woo goo ’wo zuo; Wo wolé nyanazannu gyɛ, Wo fwi, yé wo ’ka nɔlaan é ziin lo. Wo zuru va nyɛ kini nuu. Maa Gakelebale ɛ ke a fena.

⁶ Dé mi bɛn ’ka looo, ’bɛ ’ka sié we gi lo, Dé mi a nyanazan nyaoo, ’bɛ ’ka so a lee lo. Wo sɔné éé saan, yé woo diaan Yufrat yuu gɔɔn ma, yirinwana bɛbolazia.

⁷ Mi kyɛn ɛ goo é gi gyɛle nya bélé Nil yuu zo, ’Té a ’yinu éé nanoan bélé ’yiyoro plɛplɛ zoo?

⁸ Éjipiti lé. Éé goo é gi gyɛle nya bélé Nil yuu zo, Yé a ’yinu éé nanoan bélé ’yiyoro plɛplɛ zo. É léma: Maa dan nwa lɛ, maa dan tɛrɛ la sɔɔla lɛ. Maa dan alé flanu valé wo tamunu sɛrɛ lɛ.

⁹ ’Kaa wisootamunu, ’ka go tuo. ’Kaa gulidangoro vɔzannu, ’ka vɔ kelekele. ’Ka kɛlɛ nyanazannu nya ma. Étiopi munu valé Puti munu lé, botakuunfɛ ke wo lee, ’Wo valé Ludi munu lé wo sa vulile ma we dɔɔ, wo nya.

¹⁰ Yi ’ko a Mizan, lai sunyanu lé Gakelebale lé yi nya, We lɛgi payi lé, we lɛgi payi nya Gakelebale nyanézannu ma. Gwɔun é dan fɛ ble lɛ, é dan kan lɛ, Yé wo nyɛ é dan gwɔun gyɛ lɛ bélé nwɛ zo. Naa, Mizan lai sunyanu lé Gakelebale, éé saraka boo Yirinwana bɛbolazia tɛrɛ la, Yufrat yuu gɔ la.

¹¹ Éjipiti lu, blɛnzan, ’I go bomélia nagini Galaad tɛrɛ la; Ilé lia kiɛre ginile a we pla nya, ’Bɛ ’ka dan i béli lɛ lo.

¹² Bɛnnu é dan ilé yaragyɛle ’ma lɛ, Tun é dan dɔ lɛ tɛrɛ gi ilé siaalenu nya. Gulidan sunyanu sɔné é dan san lɛ ’wo ke ma, Yé wo faa é dan dia lɛ ékeva.

Nébukanɛsaa da

¹³ Dére lé Gakelebale a fe balelayezan Jérémi lɛ, Babilɔn nwiinzan blɛn Nébukanɛsaa lé é sɔ a lɛ léé, é Éjipiti tɛrɛlamunu gyɛ, a bɔle ’bɛna we ma, yee lé ke ’ko: É léma:

¹⁴ ’Ka a zuo fe Éjipiti tɛrɛ la, ’Ka a zana dɔɔ Migidɔl, Yé ’ka a zana dɔɔ Nofa valé Tapanɛs, Léé, ’i nwa, ’i ma’lɛrɛ, Naa, gwɔun a mi gyɛna i zi.

¹⁵ Mɛmalé woo goo ilé nyanazannu nyaa? Wo ’ka é dɔle gligli lo; naa, Gakelebale wo zana a gi, azama.

¹⁶ É a kɛlɛ léé, mi kiɛre sɔné é san Yé wo dia ’wo ke ta, yé wo léé: Kaa go, kaa nɔla kaalé munu va, Kaa yaatɛrɛ la é ziin, Kaa si migyɛgwɔun ma baa.

¹⁷ ’Bɛna mi, woo siaan léé: Éjipiti nwiinzan blɛn Faraɔn, É a fɛvun wele pla nya; alé bléyi zin gié a ta.

¹⁸ Minwiinzan blɛn lé a tɔ ke lai sunyanu lé Gakelebale, é léma: Maa a é yuɛma! É dan da lɛ bélé Tabɔɔ gɔ lé ke gɔnu méléna, a zo, Bélé Kaamɛl gɔ lé é ke wɛyi sɔnɔ, a zo.

¹⁹ Éjipiti tɛrɛ la mi, blɛnzan, ’Ilé kɔné pa gole luu gi we ma. Naa, Nofa é dan kɛlɛ lɛ bwi nya, Wo dan ’wii lɛ a ta, yé mi ’ka dan kɛlɛ lɛ ana é dɛrɛ lo.

²⁰ Éjipiti a bélé dirida boroné zima zo, (Misɛrɛzan éé sié yirinwana bɛbolazia, é a dana.)

²¹ Éjipitinu lé nyanamapamunu é ziin, wa Éjipitinu méléna bélé diriné bualenu zo. Yé wo é ziin, wo ’wo lala dɔa yee misɛrɛzan lɛ, wo faa fwila ’bɛnu ’lɛ; Wo ’ka guli vɔ lɛ ’bɛnu lɛ lo. Naa, wolé yi nyané é dan bɔ lɛ wo ma, Bléyi lé woo we lɛdɔa wo gi, yee lé.

²² Wa dére maan bélé ménésan vun wele zo; Naa, wo nyanézannu é biéan gulidanfɛnu nya wo lee; Woo siaan wo ma Bélé yili vɔzannu zo.

²³ Gakelebale léma: Wa alé pɔrɔ gi yilinu vɔna, Dɔlé ’té a gi gunu a; Naa, wo ’léé éé giéan gangannu ta, Wo ’ka bɔa wo nɔnɔle lɛ lo.

²⁴ Yaragyɛwe bɔ Éjipiti munu ma. Wo wo pa yirinwana bɛbolazia munu lee.

²⁵ Lai sunyanu lé Gakelebale, Izraɛl lé Bale léma: Ka ye, wolé bale lé ke Nofla, ’té wa laama Amon, yee koo, Faraɔn koo, Éjipiti munu koo, wolé balenu koo, wolé mi blɛnblɛnnu koo, Faraɔn valé munu lé woo paan a ta koo, maa dan we lɛdɔ lɛ wo gi.

²⁶ Yé maa dan wo pa lɛ munu lé é sɔ ’bɛnu lɛ léé, ’wo wolé tɛrɛla nyaa, ’bɛnu lee; an dan wo pa lɛ Babilɔn nwiinzan blɛn Nébukanɛsaa lee, yee valé a wuozannu lee. Yé ’bɛ zuo, munu é dan kɛlɛ lɛ Éjipiti tɛrɛ la bélé fɛan zo lé wo kɛlɛ ana é vinin, a zo. Maa Gakelebale ɛ ke a fena.

²⁷ Yé bii, an wuozan Jakɔb, té i kana lo; Izraɛl munu, té kana é zén ka gi lo. Naa, maa dan ka si lɛ tɛrɛ baa ta, Yé i kulunu lé wo ke luu gi tɛrɛ bɛ ta, maa dan wo si lɛ ’bɛna; Jakɔb é dan da lɛ, é dan flin lɛ drɔɔ ginanale nya, Yé mi lé é dan gibɔrɔ pa lɛ a ma, ’bɛzan ’ka lo.

²⁸ Gakelebale léma: Bii, an wuozan Jakɔb, té i kana lo, Maa a i va. Bɛnnu faa lé maa ka sɔɔla wo méléna bɛ, maa dan wo kulu ga lɛ, Naa, bii, maa ’ka dan i kulu ga lɛ lo; Maa dan we lɛdɔ lɛ i gi i kɛlɛwe yɛrama, Maa ’ka bɔa i vole lɛ é pla lo, an dan we lɛdɔ lɛ i gi.