Jérémi 44 - Kazambale lé Sebe Sauunu 1979

Bale we fe Izraɛl munu lé wo ke Éjipiti tɛrɛ la, wo lɛ

¹ Juifinu faa lé wo ke Éjipiti tɛrɛ la, Migidɔl koo, Tapanɛs koo, Nofa koo, Patrɔs tɛrɛ koo, wona, Gakelebale we fe Jérémi lɛ wozé nya yé é léma:

² Lai sunyanu lé Gakelebale, Izraɛl lé Bale léma: Wenaanénu faa lé maa a bɔ Jérusalɛm valé Juda flanu faa ma, ka a ye; kyɔ wo vo é ’bin nya, ’té mi do ’ka ana é dɛrɛ lo.

³ Naa, wo wenyané kɛlɛ an bli flile we ma. Wo lasikɔrɔpo kyɛ ble bale bɛnu lé wo ’ka wo dɔɔa lo, yé ka ’ka wo dɔɔa lo, yé wo tranu ’ka wo dɔɔa lo, wo lɛ, yé wo wo bɔ, amalé an bli fli.

⁴ Maa an wuozannu balelayezannu faa pa ka lɛ zia, yé an ’ka daan lɛ wo pale ma ka lɛ zia lo, a fele ka lɛ we ma léé, bozowe ’konu lé wo za ke an gi, té ka wo kɛlɛ lo.

⁵ Naa, wo ’ka wo tɔné dɔ lɛ an lɛ lo, wo ’ka an ban lɛ wo tɔné nya lo, wo ’ka daan lɛ wolé we lɛrɛlɛrɛ kɛlɛle ma lo, yé wo ’ka daan lɛ lasikɔrɔpo kyɛ blele ma bale bɛnu lɛ lo.

⁶ An bli fli yé an wɛwɛ nwa yé wo Juda flanu valé Jérusalɛm kyɛ ble, yé wo kɛlɛ é ’bin valé bwi nya, ka a ye kyɔ fɛan zo, a zo.

⁷ Sin, Gakelebale, lai sunyanu lé Bale, Izraɛl lé Bale léma: Mɛmalé ka wenaané blɛn kɛlɛ kabozen lɛ yé gɔnénu koo, lomu koo, nénu koo, nyɔmanénu koo, ka wenaané ’ko kɛlɛ wo kulugawe nya Juda munu méléna fɔɔ yé ka va mi do kpen ’ka voo ana é dɛrɛ loo?

⁸ Mɛmalé ka an bli fli ka bɛ panyanama nyaa? Ka da nyana lɛ Éjipiti tɛrɛ la yé ka lasikɔrɔpo kyɛ ble ’bɛna bale bɛnu lɛ. Mɛmalé ka kabo bɔra kulu gale lɛ yé wo bale pa ka ma yé wo ka kɛlɛ serele bomazannu nya tɛrɛ la bɛnnu faa mélénaa?

⁹ Ka tranu lé weple kɛlɛle koo, Juda nwiinzan blɛnnu lé weplenu kɛlɛle koo, wo nanu lé weplenu kɛlɛle koo, weplenu lé ka valé ka nanu wo kɛlɛ Juda tɛrɛ la valé Jérusalɛm zinu ta bɛ, wo sele saan ka gii?

¹⁰ Fɔɔ yi ’ko nya wo ’ka wobo kɛlɛ lɛ kiéné lo, wo ’ka kana lɛ an lee lo, yé anlé bélidɔwe sɔnnénu lé maa wo fe ka valé ka tranu lɛ, ka ’ka wo pa lɛ lo.

¹¹ Bɛwemalé lai sunyanu lé Gakelebale, Izraɛl lé Bale léma: Ka ye, an nwunzi dɔ ka ta wenaané kɛlɛle ka lɛ we ma, yee valé Juda munu faa kulu gale we gi.

¹² Juda munu pɔnénu lé wo yara nɔla léé, ’wo go nyana lɛ Éjipiti tɛrɛ la, maa dan wo kulu ga lɛ. Wo dan ga lɛ Éjipiti tɛrɛ la gwɔun valé lɔrɔ nya, a péli sia né kiénénu ma fɔɔ yé é bɔ mi kwanu ma; wo dan zamaga wo lɛ gwɔun valé lɔrɔ nya; yé wo dan kɛlɛ lɛ dunuzénmitazannu koo, munu gi nyɛkinizannu koo, bale pamazannu koo, serele bomazannu koo, wo nya.

¹³ Munu lé woo nyanaan Éjipiti tɛrɛ la, maa dan we lɛdɔ lɛ wo gi bélé fɛan zo lé an we lɛdɔ Jérusalɛm munu gi, gwɔun koo, lɔrɔ koo, bawuruma gyɛ koo, wo nya, a zo.

¹⁴ Juda munu pɔnénu lé wo go nyana lɛ Éjipiti tɛrɛ la, ’té é a wo gi léé, wo dan go lɛ ’wo pa gi Juda tɛrɛ la, fɛana lé wa a va léé, wo nyana kli, ana, wo va mi do kpen ’ka dan fwi lɛ lo, mi do kpen ’ka dan so lɛ a ta lo, mi do kpen ’ka dan go lɛ Juda tɛrɛ la é dɛrɛ lo, ’té dé é ’ka mi kenu lé ’bɛnu é dan vɔ lɛ fli gi, wo saa nya lo.

¹⁵ Gɔnénu faa lé wa gi dɔɔ léé, ’wo nanu lasikɔrɔpo kyɛ ble bale bɛnu lɛ koo, lomu kiɛre lé wo ke ’bɛna, wo faa koo, munu faa lé woo nyanaan Patrɔs, Éjipiti tɛrɛ la, wo koo, wa zi pa Jérémi lɛ léé:

¹⁶ We faa lé bé fe ko lɛ Gakelebale tɔ gi, ko ’ka dan i lɛdɔ lɛ a ma a gɔ do kpen gi lo.

¹⁷ Naa, dé ko wean fe, ko kɛla; é sɔ ko lɛ léé, ko lasikɔrɔpo kyɛ ble lagi fuale lɛ yé ko ’yi zana a lɛ, ko valé ko tranu koo, ko nwiinzan blɛnnu valé ko nwiinzannu koo, ko kɛla turu fɛan zo Juda tɛrɛ la flanu valé Jérusalɛm zinu ta, a zo. ’Bɛ bléyi va ko fɛ blé yé ko kaan, ko gi éé nanaan, ’té wenaané do kpen ’ka bɔa ko ma lo.

¹⁸ Naa, ko daan aan wo lasikɔrɔpo kyɛblele valé ’yi zanale ma lagi fuale lɛ, fɛ faa vuru ko ma yé gwɔun valé lɔrɔ ko gyɛ.

¹⁹ Yé é ziin, bléyian va lé ko lasikɔrɔpo kyɛ blé, ’té ko ’yi zanaan lagi fuale lɛ, ’té ko gato kɛla a lɛ a tɔ bɔle we ma ’naan, ko zananu ma trɔnné va lé ko kɛlɛɛ?

²⁰ Yé Jérémi we fe munu faa lɛ, gɔnénu valé lomu faa lé wa zi pa ’bɛ zo, wo lɛ yé é léé:

²¹ Lasikɔrɔpo lé ka kyɛ ble Juda tɛrɛ la flanu valé Jérusalɛm zinu ta bɛ, ka koo, ka tranu koo, ka nwiinzan blɛnnu valé ka nwiinzannu koo, tɛrɛlamunu koo, a sele ’ka dɔ lɛ Gakelebale gi loo? É ’ka é bɔn‐in bɔrɔ lɛ ’bɛ ma loo?

²² Gakelebale ’ka bɔa dɔle lɛ ka kɛlɛwe naanénu valé kalé bozowenu kɛlɛle nyi wuo é dɛrɛ lo, amalé kalé flanu vo é ’bin nya, bwi zo, balepamafɛ nya, ka a yé kyɔ fɛan zo, a zo.

²³ Ka lasikɔrɔpo kyɛ ble, yé ka wenyané kɛlɛ Gakelebale ma; ka ’ka ka tɔné dɔ lɛ Gakelebale dére lɛ lo; ka ’ka tawo lɛ alé bélidɔwenu koo, a déretawenu koo, alé weplalenu koo, wo ta lo, amalé we tɔntɔn ’konu bɔ ka ma, ka a yé kyɔ fɛan zo, a zo.

²⁴ Jérémi we fe é ziin munu faa valé lomu faa lɛ léé: ’Kaa Juda munu faa lé ka ke Éjipiti tɛrɛ la, ’ka tɔné dɔ Gakelebale dére lɛ.

²⁵ Lai sunyanu lé Gakelebale, Izraɛl lé Bale léma: Ka valé ka nanu, we lé é bɔra ka ’léé, ka kɛlɛ. Ka léé, balekundére lé ’wa fe, ’wo dan a lɛ sɔɔ lɛ; ’wo dan lasikɔrɔpo kyɛ ble lɛ lagi fuale lɛ yé ’wo dan ’yi zana lɛ a lɛ. Yé sin, ka kalé balekundére lɛ sɔɔ, yé we lé ka fe, ka kɛlɛ.

²⁶ ’Kaa Juda munu faa lé ka ke é nyanale Éjipiti tɛrɛ la, ’ka tɔné dɔ Gakelebale dére lɛ. Gakelebale léma: Ka ye, maa anbo ’nyɔɔn an tɔ blɛn nya léé, Juda mi do kpen ’ka dan an tɔ laa lɛ é dɛrɛ lo. Yé Éjipiti tɛrɛ faa la, mi do kpen ’ka dan a fe lɛ léé, Mizan Gakelebale a é yuɛma, lo.

²⁷ Ka ye, maa dan an yara dɔ lɛ ka ta wenaané kɛlɛle ka lɛ we ma; wezin kɛlɛle kaan lo, yé Juda munu faa lé wo ke Éjipiti tɛrɛ la, wo kulu é dan ga lɛ gwɔun valé lɔrɔ nya fɔɔ yé wo bɛ do ’ka vo lo.

²⁸ Mi ’léé kiéné lé wo so gwɔun lee, wo dan si lɛ Éjipiti tɛrɛ la yé wo dan go lɛ Juda tɛrɛ la. Naa, Juda munu faa lé wo da nyana lɛ Éjipiti tɛrɛ la, dé an dére lɛ é dan sɔɔ lɛɛ? ɛɛ, dé wozé lɛ é dan sɔɔ lɛɛ? wo dan a ye lɛ.

²⁹ Yé Gakelebale léé: Tɔmase do é dan kɛlɛ lɛ, ’bɛ nya lé ka dan a gi dɔɔ lɛ léé, maa dan we lɛdɔ lɛ ’wo gi fɛkona, kalé a dɔɔle we ma léé, an dére lɛ é dan sɔɔ lɛ wenaané bɔle ka ma nya.

³⁰ Gakelebale léma: Ka ye, maa dan Éjipitinu nwiinzan blɛn Faraɔn Ofra pa lɛ a nyanézannu lee, munu lé é sɔ wo lɛ léé, ’walé tɛrɛla nyaa, wo lee, fɛan zo lé maa Juda nwiinzan blɛn Sédésias pa a nyanézan Babilɔn nwiinzan blɛn Nébukanɛsaa lee, a zo, ’té é sɔ ’bɛ lɛ léé, ’bɛ a gyɛ.