Jérémi 43 - Kazambale lé Sebe Sauunu 1979

Wo go Jérémi nya Éjipiti tɛrɛ la

¹ Dérenu faa lé Gakelebale wolé Bale a pa Jérémi ’léé léé, ’é a fe munu lɛ, Jérémi nyaa aan wo wo fele nya wo faa lɛ.

² Oozé be Azaria koo, Karéak be Jokanan koo, boblɛnmunu faa koo, wo lé Jérémi lɛ léé: I a vié wona. Gakelebale kolé Bale ’ka a fe lɛ i lɛ léé, té ko go nyana Éjipiti tɛrɛ la lo lo.

³ Naa, Nérija be Baruk ɛ i bli nwa ko ma léé, wo ko nɔ Kaldé munu lɛ yé wo ko gyɛ; dé ’bɛ kaan lo, wo go ko nya luu gi Babilɔn tɛrɛ la.

⁴ Karéak be Jokanan koo, sunyanu ’lɛzannu faa koo, munu faa koo, Gakelebale wo béli dɔ léé, ’wo vo Juda tɛrɛ la, naa, wo ’ka a nyi si lɛ lo.

⁵ Yé Karéak be Jokanan valé sunyanu ’lɛzannu faa, wo munu ’ko si yé wo go wo nya Éjipiti tɛrɛ la. Munu lé wo kini ékema yé wo sɔɔla bɛn bɛnu suiɛ gi, wo pɔnénu lé wo vo yé wo da wo pa gi yé wo nyana Juda tɛrɛ la é ziin,

⁶ gɔnénu koo, lomu koo, nénu koo, minwiinzan blɛn lunu koo, munu faa lé sunyanu nwiinzan Nébuzaradan wo vo Safan be Asikam be Gédalia lee, wo koo, balelayezan Jérémi koo, Nérija be Baruk koo, woo lé wo wo si.

⁷ Wo go Éjipiti tɛrɛ la. Naa, wo ’ka Gakelebale lɛdɔ lɛ a ma lo, yé wo bɔ Tapanɛs.

⁸ Gakelebale we fe Jérémi lɛ Tapanɛs yé é léma:

⁹ ’I gɔlɛ blɛnnu sia yé ’i wo yɔɔ karonu wuo Faraɔn lé kɔn lé ke Tapanɛs, a ’léé. Bé kɛlɛ Juifinu yuɛ va.

¹⁰ Yé bé fe Juifinu lɛ léé: Lai sunyanu lé Gakelebale, Izraɛl lé Bale léma: Ka ye, maa dan mi pa lɛ zia an wuozan Babilɔn nwiinzan blɛn Nébukanɛsaa laana, yé maa dan alé plaminwiin blin dɔra lɛ gɔlɛnu lé maa wo yɔɔ bɛ, wo ta, yé é dan é ganedɔrala tapi fwila lɛ wo ta.

¹¹ É dan da lɛ yé é dan Éjipiti munu bla lɛ; munu lé wozé ke ga nya, ’wo ga ma, munu lé wozé ke luubale nya, ’wo kɛlɛ luubale gi ma, yé munu lé wozé ke gwɔun nya, ’wo wo gyɛ gwɔun nya ma.

¹² An dan kyɛ vɔ lɛ Éjipiti munu lé balenu lé kɔnnu va. Nébukanɛsaa é dan wo kyɛ ble lɛ, é dan go lɛ miyilinu nya é lee. É dan Éjipiti tɛrɛ zén lɛ é ta bélé ’blatabinzan lé varɔ zo yé é dan si lɛ ana drɔɔ.

¹³ Yiribangikɔn lé wa laama Bɛt‐Sémɛs, é dan a sɛrɛ lɛ Éjipiti tɛrɛ la, yé é dan Éjipiti munu lé balenu lé kɔnnu kyɛ ble lɛ.