Jérémi 42 - Kazambale lé Sebe Sauunu 1979

Munu léé, Jérémi ’é bazoro ’wo tɔ ma

¹ Sunyanu ’lɛzannu faa koo, Karéak be Jokanan koo, Oozé be Jézania koo, munu faa koo, é sia mi kiénénu ma fɔɔ yé é bɔ mi segelenu ma, wo da balelayezan Jérémi va yé wo léé:

² ’I kolé dunuvɔmadére nyi si. Ko faa lé ko vo ’ko, ’i go kolé muun nya Gakelebale ilé Bale va. Sin, i ’ka ko yé loo? Ko a é vinin kiɛre, yé sin, ko ’léé vo sɛné.

³ Yé zi lé é a lé ko tawo a ta, Gakelebale ilé Bale ’é a gɔɔn ko lɛ, yé wean é a lé ko a kɛlɛ, ’é a gɔɔn ko lɛ.

⁴ Balelayezan Jérémi lé wo lɛ léé: Maa ’ma; maa dan go lɛ bazoro lɛ Gakelebale kalé Bale lɛ, kalé we laale yɛrama; yé Gakelebale é dan a zi pa lɛ fɛan zo, maa dan a faa fe lɛ ka lɛ. Maa ’ka dan a gɔ do kpen yɔɔ lɛ ka ma lo.

⁵ Yé wo lé Jérémi lɛ léé: We faa lé Gakelebale ilé Bale é dan a fe lɛ i lɛ kolé we nya, dé ko ’ka a faa kɛlɛ lɛ lo, Gakelebale ’é ana ye.

⁶ Gakelebale kolé Bale lé ko i pa zia a va bɛ, dé é wezin feoo, dé é wenyané feoo, ko dan a lɛdɔ lɛ a ma, yé ko gi ’é nana, ’té dé ko Gakelebale kolé Bale dére lɛdɔma.

Bale Jérémi lé bazoro dére nyi si

⁷ ’Bɛ zuo yi vu, Gakelebale we fe Jérémi lɛ.

⁸ Yé Karéak be Jokanan koo, a va sunyanu ’lɛzannu faa koo, munu faa koo, é sia mi kiénénu ma fɔɔ yé é bɔ mi segelenu ma, Jérémi wo laa.

⁹ É lé wo lɛ léé: Gakelebale, Izraɛl munu lé Bale lé ka an nwunvɔ a va léé, an go kalé dunuvɔmadérenu fe a lɛ, é léma:

¹⁰ Dé ka vo tɛrɛ ’ko la, maa dan ka nyana lɛ ana kli, maa ’ka dan ka kulu ga lɛ lo; maa dan ka suni wɔra lɛ, maa ’ka dan ka dia lɛ lo, naa, wenaané lé maa a kɛlɛ ka lɛ, an bli si ’bɛ lɛ.

¹¹ Gakelebale léma: Té ka kana Babilɔn nwiinzan blɛn lee lo. É vinin ka kana a lee; té ka kana a lee sin lo. Naa, maa a ka va ka sile we gi we ma, ’é valé ka sile a lee we ma.

¹² Maa dan ka vazia nyanaizénbli nɔ lɛ a lɛ, yé a nyanai é dan zén lɛ ka ta, yé é dan zi nɔ lɛ ka lɛ léé, ka nyana kalé tɛrɛ la.

¹³ Naa, dé ka ’ka Gakelebale, kalé Bale dére lɛdɔ lɛ a ma lo,

¹⁴ yé dé ka léé: Gba, ko ’ka dan vo lɛ tɛrɛ ’ko la lo, ko dan go lɛ Éjipiti tɛrɛ la, fɛana lé wo ’ka guli daan lo, ’té woo ’ka béli dére maan ’bɛna lo, yé fɛ ’ka vuruan mi ma ’bɛna lo, ’bɛna lé ko dan nyana lɛ.

¹⁵ Dé ka fe a zo, ’kaa Juda munu lé ka vo, ’ka tɔné dɔ Gakelebale dére lɛ. Lai sunyanu lé Gakelebale, Izraɛl lé Bale léma: Dé ka yara nɔla gole we ma Éjipiti tɛrɛ la, dé ka go nyana lɛ ana,

¹⁶ gwɔun lé ka kanaan a lee, é dan bɔ lɛ ka ma Éjipiti tɛrɛ ’ko la. Lɔrɔ lé ka kanaan a lee, é dan bɔ lɛ ka ma Éjipiti tɛrɛ la, yé ka dan ga lɛ ’bɛna.

¹⁷ Munu faa lé wo yara nɔla yé wo go Éjipiti tɛrɛ la nyanale ’bɛna we ma, wo dan ga lɛ, dé gwɔun léé, dé lɔrɔ léé, dé bawurumagyɛ léé, a nya. We tɔntɔnnu lé maa dan a bɔ lɛ wo ma bɛ, wo va mi do kpen ’ka dan so lɛ a ta lo, wo ’ka dan fwi lɛ a ’lɛ lo.

¹⁸ Naa, lai sunyanu lé Gakelebale, Izraɛl lé Bale léma: Fɛan zo lé an bli fli Jérusalɛm munu ma yé an wɛwɛ dɔ wo ma, a zo duo lé an wɛwɛ é dan dɔ lɛ ka ma, ’té dé ka go Éjipiti tɛrɛ la; ka dan kɛlɛ lɛ dunuzénmitazannu koo, zuru va nyɛ kinizannu koo, bale pamazannu koo, serele bomazannu koo, wo nya, yé ka ’ka dan fɛkona ye lɛ é dɛrɛ lo.

¹⁹ ’Kaa Juda munu lé ka vo ana, Gakelebale lé ka lɛ léé: Té ka go Éjipiti tɛrɛ la lo. Ka gi dɔɔ léé, maa a yi ga ka lee kyɔ.

²⁰ Ka a gi kɛlɛna kabozen lɛ. Naa, ka an pa zia Gakelebale kalé Bale va, a fele nya léé: ’I go kolé muun nya Gakelebale kolé Bale va. We faa lé Gakelebale kolé Bale é dan a fe lɛ, bé fe ko lɛ yé ko dan a kɛlɛ lɛ.

²¹ Maa a fe ka lɛ kyɔ; naa, ka ’ka tɔné dɔa Gakelebale kalé Bale dére lɛ lo, yé we faa lé é a fe an lɛ léé, maa a fe ka lɛ, ka ’ka dan dɔ lɛ a ta lo.

²² Sin, ’ka we ’ko dɔɔ ma: Ka dan ga lɛ, dé gwɔun léé, dé lɔrɔ léé, dé bawurumagyɛ léé, a nya, tɛrɛ lé é sɔ ka lɛ léé, ’wo go nyana lɛ ana bɛ, a ta.