Jérémi 41 - Kazambale lé Sebe Sauunu 1979

¹ Élisama be Nétania be Ismaɛl a minwiinzan blɛn gɔnɔlazan nya. Moné sɔrafiézan nya é da Asikam be Gédalia va Misipa, ’té minwiinzan blɛn lé mi blɛnblɛnnu valé mi vu a a va, yé wo fɛ ble ékeva Misipa.

² Yé Nétania be Ismaɛl valé mi vu lé wo da wo nya bɛ, wo nwa yé wo Safan be Asikam be Gédalia gyɛ gwɔun nya. Mi lé Babilɔn nwiinzan blɛn a dɔ Juda tɛrɛ nwiinzan nya, wa gyɛ a zo, yé é ga.

³ Juifinu lé wo ke Gédalia va Misipa, ’é valé Kaldé munu lé wo ke gulidanzannu nya ana bɛ, Ismaɛl wo faa gyɛ é ziin.

⁴ Zamaga lé Gédalia a wo, é yi kɛlɛ fié, ’té mi do kpen ’ka tan we do dɔɔ lɛ a gi lo,

⁵ mi yɔ ziɛn lé wo si Sisɛm koo, Silo koo, Samari koo, wona, wo da ana, ’té wo puomagun a é bole yé wolé sɔnu a é fiale, ’té wo kɔlɛ ma a é mianle. Wo da blannu valé lasikɔrɔpo nya a plale Gakelebale lé kɔn gi we ma.

⁶ Nétania be Ismaɛl si Misipa yé é gié wo ’lɛzia, ’té éé goo dabli wuvɔle nya. Wo kee aan wo ’bɛnu nya, é lé wo lɛ léé: ’Ka da Asikam be Gédalia va.

⁷ Wo bɔ aan wo fla méléna, Nétania be Ismaɛl wo bɔrɔ bo yé é wo vuli ’yiguru gi, ’té munu lé wo da a pa lɛ, wo bɔa a va.

⁸ Naa, wo va mi vu lé Ismaɛl lɛ léé: Té i ko gyɛ lo. Naa, blefɛ a ko lee é yɔɔle bwi gi, buruwɔlɛ koo, sɔnmlén koo, nyɔnɔ koo, zɔrɔnyɔnɔ koo, woo lé. Yé é wo vo yé é ’ka ’bɛnu gyɛ lɛ wo bwenu va lo.

⁹ Munu lé Ismaɛl wo gyɛ Gédalia sɔnɔ bɛ, é wo galenu faa vɔ ’yiguru do gi. Aza yee ’yiguru ’ko bo bléyian va lé é ke kana Izraɛl munu nwiinzan blɛn Baésa lee, a bléyi va. Yee ’yiguru lé Nétania be Ismaɛl a fan migalenu nya.

¹⁰ Yé munu faa lé wo vo Misipa, Ismaɛl wo si luu nya; minwiinzan blɛn lunu koo, munu lé wo vo ana, ’té sunyanu ’lɛzan Nébuzaradan wo bɛ pa Asikam be Gédalia lee, wo koo, Nétania be Ismaɛl go wo nya luu gi, yé é go wo nya Amɔn munu va.

¹¹ Wenaané faa lé Nétania be Ismaɛl a kɛlɛ, wa fe Karéak be Jokanan lɛ, yee valé sunyanu ’lɛzannu faa lé ke a va, wo lɛ.

¹² Wo mi ’konu faa si yé wo nwa léé, ’wo go guli dan Nétania be Ismaɛl va. Yé wo bɔ a ma Gabaɔn lé ’yi blɛnnu sɔnɔ.

¹³ Munu faa lé é ke Ismaɛl va, wo Karéak be Jokanan ye, é valé sunyanu ’lɛzannu faa lé wo ke a va, wo nya, tɔɔn, wo gi nana,

¹⁴ yé munu faa lé Ismaɛl wo si Misipa, wo nɔla yé wo da wo péli vɔ lɛ Karéak be Jokanan va.

¹⁵ Naa, Nétania be Ismaɛl vɔ fli gi Jokanan lee, ’é valé mi sɔraa nya, yé wo go Amɔn munu va.

¹⁶ Nétania be Ismaɛl lé Asikam be Gédalia gyɛle zuo Misipa, é a gona mi pɔnénu lé wo vo ana mi, wo nya tɔɔn, Karéak be Jokanan valé sunyanu ’lɛzannu faa lé wo ke a va bɛ, wo munu ’ko si Ismaɛl lee. Sunyanu koo, lomu koo, nénu koo, miblalenu koo, Jokanan wo si Gabaɔn,

¹⁷ yé é zi sia wo nya yé wo da yé wo bɔ Kimam lé otɛli lé ke Bɛtléɛm sɔnɔ, ana. É sɔ wo lɛ léé, wo go Éjipiti tɛrɛ la,

¹⁸ sile Kaldé munu ma baa we ma. Asikam be Gédalia lé Babilɔn nwiinzan blɛn a dɔ munu nwiinzan nya, Nétania be Ismaɛl a gyɛ, amalé wa kanana Kaldé munu lee.