Jérémi 40 - Kazambale lé Sebe Sauunu 1979

Jérémi vo Gédalia va

¹ Sunyanu ’lɛzan Nébuzaradan Jérusalɛm valé Juda tɛrɛ la munu si luu nya yé é gɔgɔbale vɔ wo ma yé é a gona wo nya Babilɔn tɛrɛ la. ’Té Jérémi a wo va mi do nya. Yé sunyanu ’lɛzan daan Jérémi ma, ’é si Rama. ’Bɛ zuo Gakelebale we fe Jérémi lɛ.

² ’Té sunyanu ’lɛzan we fe kɔɔn Jérémi lɛ yé é léé: Gakelebale, ilé Bale we tɔntɔn ’konu fe tɛrɛ ’ko ma,

³ yé é ’é dére lɛ sɔɔ. É wean fe, é a kɛlɛ. Naa, ka wenyané kɛlɛ Gakelebale ma, yé ka ’ka a dére lɛdɔ lɛ a ma lo, amalé we ’konu faa bɔ ka ma.

⁴ Sin, gɔgɔbalenu lé ke é vɔle i bɛ ma bɛ, maa wo kini i ma kyɔ. Dé é sɔ i lɛ léé, i go an va Babilɔn, ’ko go yé ’i vo an bɛ la. Dé é ’ka sɔ lɛ i lɛ léé, i go an va Babilɔn tɛrɛ la lo, ’i vo ’ko; bé ye, tɛrɛ faa a i ’lɛ; dé fɛofɛana sɔ i lɛ yé bé ye fɛna zima nya, ’i nyana ana.

⁵ Jérémi mɔn a zi pana fɛan zo, yé sunyanu ’lɛzan lé a lɛ léé: ’I go Safan be Asikam be Gédalia lé, Babilɔn nwiinzan blɛn a dɔ Juda flanu nwiinzan nya bɛ, a va, yé ’i vo alé munu va. Dé ’bɛ kaan lo, dé fɛofɛana sɔ i lɛ, ’i nyana ana. Yé sunyanu nwiinzan fɛblele nɔ a lɛ yé é blɛ kɛlɛ a lɛ, yé é a yai vɔ.

⁶ Yé Jérémi go Asikam be Gédalia va Misipa yé é vo a va, munu lé wo vo ana tɛrɛ la, wo va.

Gédalia kɛlɛ gbɔrɔnama nya

⁷ Juda sunyanu lé wo ke tɛrɛ tabinna, wo valé wo ’lɛzannu a ’ma léé, Babilɔn nwiinzan blɛn Asikam be Gédalia dɔ wolé tɛrɛ nwiinzan nya, ’té munu koo, lomu valé nunukénénénu koo, é wo bɛ pa a lee, ’bɛ valé tɛrɛ la nyanégyɛzannu lé wo ’ka go lɛ wo nya luu gi Babilɔn tɛrɛ la lo, wo nya.

⁸ ’Bɛ zuo wo go Gédalia va Misipa. Munu lé wo go ana, wo tɔ lé ke ’ko: Nétania be Ismaɛl koo, Karéak benu Jokanan valé Jonatan koo, Tanumɛt be Séraja koo, Nétofazan Éfai benu koo, Maa?-?katizan Jézania koo, ’wo valé ’wolé munu lé.

⁹ Safan be Asikam be Gédalia bale ’nyɔɔn wo lɛ yé é léé: ’Ka pla Kaldé munu wuo, té ka kana lo; ’ka nyana tɛrɛ ’ko la, yé ’ka vo Babilɔn nwiinzan blɛn wuo, yé ka dan zin ye lɛ.

¹⁰ Ka ye, maa dan vo lɛ Misipa, Kaldé munu lé wo dan da lɛ ko va, wo lɛbɛnle we ma, yé ’kaa, ’ka dɔrɔporo valé yɛrɛgabléyi va fɛ poro so, yé ka wo nyɔnɔ kɛlɛ yé ka wo zén bɔnu gi. Yé flanu lé ka nyana wo ta, ’ka vo ana.

¹¹ Juifinu faa lé wo ke Moab valé Édom tɛrɛ la koo, wo lé wo ke Amɔn munu va koo, wo lé wo ke tɛrɛ bɛnu ta koo, wa ’ma léé, Babilɔn nwiinzan blɛn mi kenu vo Juda tɛrɛ la, yé é Safan be Asikam be Gédalia dɔ wo nwiinzan nya.

¹² Yé Juifinu si tɛrɛnu faa lé wo go ana, wo ta, yé wo da Juda tɛrɛ la é ziin Gédalia va, Misipa, yé wo dɔrɔporo so di, yé wo yɛrɛgabléyi va fɛ poronu so di.

Wo Gédalia gyɛ

¹³ Karéak be Jokanan valé tɛrɛ tabin sunyanu nwiinzannu faa da Gédalia va Misipa

¹⁴ yé wo lé a lɛ léé: Bé gi dɔɔ léé, Amɔn munu nwiinzan blɛn Baalis a fe Nétania be Ismaɛl lɛ léé, ’é ilé tɛrɛla nyaa? Naa, Asikam be Gédalia ’ka é bli vo lɛ wo dére lɛ lo.

¹⁵ Yé Karéak be Jokanan we fe Gédalia lɛ kyeen gi Misipa yé é léé: ’I zi nɔ an lɛ an Nétania be Ismaɛl gyɛ. Mi do kpen ’ka dan a we ’ma lɛ lo. Mɛmalé é a a va léé, é i gyɛɛ? Judanu faa lé wo zén ékeva i punma bɛ, mɛmalé é a lé wo kini ékema yé Juda munu pɔnénu é zamaga woo?

¹⁶ Asikam be Gédalia a zi pa Karéak be Jokanan lɛ léé: Té i we ’ko kɛlɛ lo; naa, we lé bé fe Ismaɛl ma, vié lé.