Jérémi 4 - Kazambale lé Sebe Sauunu 1979

Bale munu laa léé, ’wo bli nɔla

¹ Gakelebale léma: Izraɛlmunu, dé ka da an va, dé ka da an va ka pa gi, dé kalé bozowenu si an yuɛ gi, ka ’ka dan vo lɛ nɔɔna lo.

² Dé ka bale ’nyɔɔn léé, Gakelebale a é yuɛma, dé ka a ’nyɔɔn webozen koo, wedrɔle koo, we tegele koo, wo nya, ’té bɛnnu drɔɔ é dan vo lɛ Bale gi, ’té wo dan ’wo tɔ bɔ lɛ a gi.

³ Naa, Gakelebale we fe Juda munu valé Jérusalɛm munu lɛ léma: ’Ka féi dɛrɛ na wo, yé té ka fɛ vɔ lélinu méléna lo.

⁴ Juda munu valé Jérusalɛm munu, ka kɛlɛle Gakelebale zé nya lé tɔmase ’é kɛlɛ ka ma ma, ’ka daan ka kɛlɛwe kyɛn ma, dé anlé bliflile é da ble bélé kyɛ zo, dé é da nwa bélé kyɛnɛnɛ zo, ’té mi do kpen ’ka bɔa a dirile lɛ lo, ka kɛlɛwe naané lé we ma.

Bɛn bɛnu ’wii Izraɛl ta

⁵ ’Ka we lɛ kini Juda tɛrɛ la, yé ’ka a zana dɔɔ Jérusalɛm, léé: ’Ka béli fɛn tɛrɛ la, ’Ka siaa dére plɛplɛ nya léma: ’Ka zén ékeva yé kaa go nyanamunu lé fla.

⁶ ’Ka drapo do dun Siɔn vazia, ’Ka vɔ fli gi, té ka dɔ lo. Naa, an dan we tɔntɔn valé dunuzénmita we si lɛ Yirinwana bɛbolazia, yé wo da.

⁷ Golizra éé soo é yɛrɛ gi, Bɛngɔnɔnu sɛrɛzan a zia, é si é nyanana, Kalé tɛrɛ sɛrɛle we ma. É dan kalé flanu ’wii lɛ, yé munu ’ka dan kɛlɛ lɛ ana é dɛrɛ lo.

⁸ Amalé, ’ka bɔlɔ zén ka ta, ’ka wuvɔ yé ’ka dunnu; Naa, Gakelebale lé bliflile blɛn ’ka dan vuru lɛ ka ma lo.

⁹ Gakelebale léé: ’Bɛ yi la, minwiinzan blɛn valé flazannu fuu é dan si lɛ wo ta, yé Balebanmunu gi é dan vuru lɛ, yé balelayezannu ’léé é dan ma lɛ wo ma.

¹⁰ Yé maa léé: Mizan, Gakelebale, i dabli kɛlɛ munu ’ko valé Jérusalɛm munu lɛ, a fele nya léé: Ka dan vo lɛ drɔɔ, yé sin bléyi ’ko va, gwɔun a bon‐ɛnna wolé tɛrɛla nya.

¹¹ ’Bɛ bléyi va, wo dan a fe lɛ munu ’ko valé Jérusalɛm munu lɛ léé: Funé éé sié fɛna lorunu na nyéné saa lé fɛna yé éé giéan anlé munu lé zi ’léé. Fu zin kaan lo, fɛwɔlɛ vasi fu kaan lo,

¹² naa, funé lé é si mi, yé é bɔ an va ’ko, yee lé. Sin, maa dan wolé we ’wuo dɔ lɛ.

¹³ Ka ye, fɛsɛrɛzan a biéna bélé lafunu zo; alé gulidangoronu a bélé barikoko zo; alé wisoonu éé vlan sié é mini gola sile ta; we tɔntɔn bɔ ko ma, naa, wo ko sɛrɛ tata.

¹⁴ Jérusalɛm munu, ’ka kalé wenaanénu si ka bli gi, léé, ka si we gi. Ka dan vo lɛ ka gi bɔrɔna weple ma bléyi faa vaa?

¹⁵ Naa, dére do si Dan tɛrɛ la yé é dirikinié milɛwe lɛ kini; é a zana dɔɔle sia Éfraim gɔ nwiin.

¹⁶ ’Ka a fe bɛngɔnɔnu lɛ, yé ’ka a gi bɔra Jérusalɛm munu lɛ léé: Plaminwiinzannu si tɛrɛ baa do la; wo siaa guli?-?dére nya Juda tɛrɛ la flanu ma.

¹⁷ Gakelebale léé: Wo diri Jérusalɛm zi bélé féitabinzannu zo. Jérusalɛm nwa an ma, azama.

¹⁸ Kalé wekɛlɛbɛ valé kalé tawobɛ tɔnɔ lé ke bɛ; ka kɛlɛwe naané tɔnɔ lé ke bɛ. Iin, we ’ko é dan kɛlɛ lɛ ka ’léé nyanale fɔɔ yé é wɔra ka bli gi.

Jérémi bli kyɛ dɔ alé munu lé we ma

¹⁹ An bli loo! An bli loo! Maa a nyané blena an bli gi. An bli a an gyɛna. An ’ka bɔa tadɔle lɛ lo; Naa, an boen, ’i béli dére ’ma. ’I gulidanle vun ’ma.

²⁰ Woo we tɔntɔn na glewoo, ’té wa woo, Naa, wo ’wii tɛrɛ faa ta, Wo anlé sɔkɔnnu sɛrɛ bléyi do nya fiaa, Wo anlé yɔlaabannu zana yuɛlakɔné gyɛle do nya.

²¹ Maa dan drapo zunle ye lɛ mɛ bléyi vaa? Béli dére ta é dan dɔ lɛ bléyi kyɛn vaa?

²² Naa, weboen lé, anlé munu ’wuo ’ka wo ta lo, wo ’ka an dɔɔa lo, Wo ta a é vole, wo gi do kpen ’ka é kinile lo. Weple saa lé wa kɛla, Naa, wo ’ka bɔa wezin do kpen kɛlɛle lɛ lo.

Jérémi Jérusalɛm sɛrɛle ye yuɛzi gi

²³ Maa tɛrɛ nagini, ’té tɛrɛ a mlauun, ’té fɛ do kpen ’ka ana lo; Maa lanu nagini, ’té wo vakinifɛnu san.

²⁴ Maa gɔblɛnnu nagini, yé wo ma nyɔɔn, Yé gɔpanénu faa ma nyɔɔn.

²⁵ Maa nagini, yé mi do kpen ’ka ana lo, Yé lagi mianénu faa fwi.

²⁶ Maa nagini, yé Kaamɛl tɛrɛ zin kɛlɛ bwi saa nya, Yé ana fla faa ’wii Gakelebale ’lɛ. Gakelebale bli flile blɛn lé we ma lé we ’konu kɛlɛ.

²⁷ Naa, Gakelebale léma: Tɛrɛ ’ko faa é dan sɛrɛ lɛ; Naa, maa ’ka dan a sɛrɛ lɛ tata lo.

²⁸ Amalé tɛrɛ ’ko ta munu faa a gyɛ bona, Yé gunu dɔra la gi loru, Naa, maa a fe, yé an suni wɔra. Maa ’ka dan an bli nɔla lɛ lo; maa ’ka dan gyɛ lɛ an zuo lo.

²⁹ Dé flamunu wisootamunu valé savulimunu vun ’ma tɔɔn, wo fwi. Wo go pɔrɔ gi, yé wo vɔ gɔlɛnu nwiin; Wo sɔn vɔ flanu ma; mi do kpen ’ka wona lo.

³⁰ Yé bii, fla sɛrɛle, i dan mɛ kɛlɛ lɛɛ? I dan sɔ sɔɔn zén lɛ i ta yé i kyanfɛnu vɔ i ma, I dan kale pa lɛ i yuɛ ma; Naa, dé ibo kɛlɛ é nɔnɔmioo, ’té ’bɛ a é pla; I bwɛnu serele bo i ma; É sɔ wo lɛ léé, ’wo i gyɛ.

³¹ Naa, siaalenu lé maa wo ’ma, wa bélé néyaalomu lé siaalenu zo, Maa nyanéble siaalenu ’ma bélé blɛnzan lé né yaale lé nyanéblele zo. Siɔn munu lé ke bakinima flinna, ’té woo bɛnu soian, wo dére lé. Wo léé: Maa a we tɔntɔn bɔmazan nya. Maa a gana migyɛzannu lee.