Jérémi 39 - Kazambale lé Sebe Sauunu 1979

Wo Jérusalɛm si — wo daan Jérémi ma

^1-3 Juda munu nwiinzan blɛn Sédésias plale mi nwiin lɛɛ sɔraziɛnzan nya, a moné vuzan nya, Babilɔn nwiinzan blɛn Nébukanɛsaa da élé sunyanu faa nya yé wo diri Jérusalɛm zi; Sédésias plale mi nwiin lɛɛ vu ta dozan nya, a moné ziɛnzan lé yi sɔraziɛnzan nya, wo flagɔrɔ ’wii. Wo Jérusalɛm si aan wo, Babilɔn nwiinzan blɛn lé sunyanu faa wɔra fla, yé a gɔrɔ ’léé lé ke a méléna, wa si wozé nya; Nɛɛgal‐Sarɛsɛɛ koo, Samgaa‐Nébu koo, mi blalenu ’lɛzan Saasékim koo, ’monédɔmunu faa zilɛzan Nɛɛgal‐Saarɛsɛɛ koo, Babilɔn nwiinzan blɛn lé mi segelenu faa koo, woo lé.

⁴ Juda nwiinzan blɛn Sédésias valé gulidanzannu faa we ’ko ye aan wo, wo fwi é kele yé wo si fla é béli. Minwiinzan blɛn lé zianféi zi lé éé wɔraan flagɔrɔ fiénu méléna, wo ’bɛ zi sia, yé wo go fɛna pɛblɛɛ nazia.

⁵ Naa, Kaldé sunyanu go wo zuo yé wo bɔ Sédésias ma Jériko lé fɛna pɛblɛɛ na. Wa kun yé wo go a nya Babilɔn nwiinzan blɛn Nébukanɛsaa va, Amat tɛrɛ la fla lé wa laama Ribla, a ta. Yé Nébukanɛsaa wolé we ble é nya do.

⁶ Babilɔn nwiinzan blɛn Sédésias benu bɔrɔ bo ’wo ti yuɛ va Ribla; yé Babilɔn nwiinzan blɛn Juda mi blɛnblɛnnu faa bɔrɔ bo.

⁷ ’Bɛ zuo wo Sédésias yuɛ si é koro gi yé wo zéné gɔgɔbalenu vɔ a ma yé wo go a nya Babilɔn.

⁸ Kaldé munu minwiinzan blɛn lé kɔn kyɛ ble, yee valé munu lé kɔnnu nya, yé wo Jérusalɛm zi gɔrɔnu faa zana a gi.

⁹ Munu lé wo vo fla koo, munu lé wo yɔfalo fu vɔ wo bɔrɔ ma koo, mi pɔnénu koo, sunyanu nwiinzan Nébuzaradan go wo nya luu gi Babilɔn.

¹⁰ Naa, munu lé wo ke nyanégyɛzannu nya, ’té fɛ do kpen ’ka wo lee lo, sunyanu nwiinzan Nébuzaradan bɛnu vo ana yé é dɔrɔféinu valé féinu nɔ wo lɛ.

¹¹ Babilɔn nwiinzan blɛn Nébukanɛsaa we fe sunyanu nwiinzan Nébuzaradan lɛ Jérémi lé we nya yé é léé:

¹² Bé si, ’i yuɛ pa a va. Té i wenaané do kɛlɛ a lɛ lo; naa, we faa lé éé a laan i lee, bé kɛlɛ a lɛ ma.

¹³ Sunyanu nwiinzan Nébuzaradan koo, mi blalenu ’lɛzan Nébusazban koo, ’monédɔzannu ’lɛzan Nɛɛgal‐Sarɛsɛɛ koo, Babilɔn nwiinzan blɛn lé mi blɛnblɛnnu faa koo,

¹⁴ wo munu pa zia léé, ’wo Jérémi si bokɔn gɔrɔ gi; yé wa bɛ pa Safan be Asikam be Gédalia lee, léé, ’bɛ é go a nya élé kɔn ’léé. Yé é vo munu méléna.

Ébɛd‐Mélɛk é dan so lɛ we lee

¹⁵ Jérémi a bokɔn gɔrɔ gi bléyian va, Gakelebale we fe a lɛ yé é léé:

¹⁶ ’I go bé fe Étiopi mi Ébɛd‐Mélɛk lɛ léé: Lai sunyanu lé Gakelebale, Izraɛl lé Bale léma: Bé ye, wenu lé maa wo bɔle fla ’ko ma zuo fe, ’té wa wenaanénu nya, wo ’ka wezinnu nya lo, wo dan bɔ lɛ yi ’ko nya i yuɛ va.

¹⁷ Naa, ’bɛ yi ’ko nya, maa dan i si lɛ wo lee; munu lé i kanaan wo lee, wo ’ka dan i pa lɛ wo lee lo, yee lé Gakelebale a fe.

¹⁸ Maa dan i si lɛ we gi, wo ’ka dan i gyɛ lɛ gwɔun nya lo; i dan vo lɛ é yuɛma. I pa an ta, azama. Maa Gakelebale ɛ ke a fena.