Jérémi 38 - Kazambale lé Sebe Sauunu 1979

Wo Jérémi vɔ ’yiguru gi

¹ Dére lé Jérémi a fe munu faa lɛ, Matan be Séfatia koo, Pasuu be Gédalia koo, Sélémia be Jukal koo, Malkija be Pasuu koo, wa ’ma. Jérémi lé wo lɛ léé:

² Gakelebale léma: Mian é vo fla ’ko ta, é dan ga lɛ, dé gwɔun léé, dé lɔrɔ léé, dé bawurumagyɛ léé, a nya; naa, mian é dan si lɛ ana yé é go Kaldé munu va, é dan so lɛ we lee, é dan vo lɛ é yuɛma, é dan béli lɛ.

³ Gakelebale léma: Maa dan fla ’ko pa lɛ Babilɔn nwiinzan blɛn lé sunyanu lee, yé wo dan a si lɛ.

⁴ Yé minwiinzannu lé minwiinzan blɛn lɛ léé: ’Wo mi ’ko gyɛ ma. Naa, gulidanmunu lé wo ke fla ’ko la, é valé munu faa, éé wo fuu sié wo ta ’bɛ zoɛ wefele nya. Mi ’ko ’ka we zin ginina munu ’ko zé nya lo; é a we tɔntɔn ɛ va wozé nya.

⁵ Minwiinzan blɛn Sédésias a zi pa léé: Ka ye, é a ka lee; naa, minwiinzan blɛn ’ka bɔa we do kɛlɛle lɛ ka lɛ lo.

⁶ Yé wo Jérémi si yé wa zun minwiinzan blɛn be Malkija lé ’yiguru lé é ke bokɔn gɔrɔ gi, a gi; wo Jérémi zun a gi bawɔrɔ nya. ’Yi do kpen ’ka ’yiguru gi lo, naa, voli ɛ ke ana, yé Jérémi vɔ voli gi.

⁷ Étiopi mi blale do lé wa laama Ébɛd‐Mélɛk, ’té é ke nyanamapazan nya minwiinzan blɛn lé kɔn gi bɛ, é a ’ma léé, wo Jérémi vɔ ’yiguru gi. ’Té minwiinzan blɛn a é nyanale flagɔrɔ ’léé lé, wa laama Bɛnjamɛn, ana.

⁸ Ébɛd‐Mélɛk si minwiinzan blɛn lé kɔn gi yé é we fe a lɛ yé é léé:

⁹ Oo, minwiinzan blɛn, anzan, munu lé wo ’bɛ zoɛ we kɛlɛ balelayezan Jérémi lɛ yé wa vɔ ’yiguru gi bɛ, wo wenaané kɛlɛ. É dan ga lɛ lɔrɔ nya ’bɛna, naa, buru do ’ka vo lɛ é dɛrɛ fla lo,

¹⁰ minwiinzan blɛn lé Étiopi mi Ébɛd‐Mélɛk lɛ léé: ’I mi yɔ dɔ wɔlɛ vu si yé wo pa i va yé ka balelayezan Jérémi si ’yiguru gi; té é ga lo.

¹¹ Ébɛd‐Mélɛk munu pa é va, yé wo go minwiinzan blɛn lé kɔn gi, alé gɔɔli tadɔna wuo, yé wo sɔwulinu valé varɔ vulinu si ’bɛna yé wo wo zun Jérémi va ’yiguru gi, é valé bawɔrɔnu nya.

¹² Étiopi mi Ébɛd‐Mélɛk lé Jérémi lɛ léé: ’I sɔwulinu valé varɔ wulinu ’ko pa i bla wuo yé ’i bawɔrɔ vɔ i bla wuo. Yé Jérémi a kɛlɛ a zo.

¹³ Wo Jérémi gana bawɔrɔnu nya, yé é si ’yiguru gi, yé é vo bɔkɔn gɔrɔ gi.

Sédésias we laa Jérémi lee é ziin

¹⁴ Minwiinzan blɛn Sédésias munu pa zia balelayezan Jérémi laana, yé wo da a nya a va Gakelebale lé kɔn ’léé yaazan na. Yé minwiinzan blɛn lé Jérémi lɛ léé: Maa dan we do laa lɛ i lee; té i we do kpen yɔɔ an ma lo.

¹⁵ Jérémi a zi pa Sédésias lɛ léé: Dé é kɛlɛ léé, maa a fe i lɛ, i ’ka dan an gyɛ lɛ loo? yé dé maa we pla i lɛ, i ’ka dan i tɔné dɔ lɛ an lɛ lo.

¹⁶ Minwiinzan blɛn Sédésias bale ’nyɔɔn Jérémi lɛ kyeen gi yé é léé: Gakelebale a é yuɛma; yee ɛ vole é yuɛma nɔ ko lɛ. Maa ’ka dan i gyɛ lɛ lo yé munu lé é sɔ wo lɛ léé, wo i gyɛ, maa ’ka dan i pa lɛ wo lee lo.

¹⁷ Yé Jérémi lé Sédésias lɛ léé: Gakelebale, sunyanu lé Bale, Izraɛl lé Bale léma: Dé i yɔfalo fu vɔ i bɔrɔ ma yé i go ibo nya Babilɔn munu nwiinzan blɛn lé zilɛzannu lɛ, i dan vo lɛ é yuɛma, yé wo ’ka dan fla ’ko kyɛ ble lɛ lo; bii valé ilé munu é dan vo lɛ é yuɛma.

¹⁸ Naa, dé i ’ka go ibo nya Babilɔn nwiinzan blɛn lé zilɛzannu lɛ lo, maa dan fla ’ko pa lɛ Kaldé munu lee, yé wo dan a kyɛ ble lɛ, yé bii, i ’ka dan so lɛ wo lee lo.

¹⁹ Minwiinzan blɛn Sédésias lé Jérémi lɛ léé: An kanaan Juifinu lé wo péli vɔ Kaldé munu va, wo lee, dé wo da kle pa an ta.

²⁰ Jérémi a zi pa léé: Wo ’ka dan i pa lɛ wo lee lo. ’I tɔné dɔ Gakelebale dére lɛ, wean maa a fe i lɛ bɛ, a lɛ. I dan wezin ye lɛ yé i dan béli lɛ.

²¹ Naa, dé i ’ka a nyi si lɛ léé, i go ibo nya wo lɛ lo, we lé Gakelebale a gɔɔn an lɛ, yee lo:

²² Lomu faa lé wo vo Juda nwiinzan blɛn lé kɔn gi, wo dan go lɛ wo nya Babilɔn nwiinzan blɛn lé zilɛzannu va, yé yee lomu wo dan i tɔ vɔ lɛ lɛrɛ nya yé wo léé: Munu lé wo vole drɔɔ lé we fe i lɛ bɛ, wo dabli kɛlɛ i lɛ, wo pla i nwiin yé dé we bɔ i ma bléyian va, wo nwunzi dɔ i la.

²³ Wo dan go lɛ ilé lomu valé ilé nénu faa nya Kaldémunu va; yé bii, i ’ka dan so lɛ wo lee lo. Babilɔn nwiinzan blɛn é dan i kun lɛ, yé wo dan fla ’ko kyɛ ble lɛ.

²⁴ Sédésias lé Jérémi lɛ léé: Ko wean fe bɛ, té mi do kpen a ’ma lo yé i ’ka dan ga lɛ lo.

²⁵ Dé é kɛlɛ léé, mi ’lɛzannu a ’ma léé, an we fe i lɛ, yé dé wa fe i lɛ léé, i wean fe minwiinzan blɛn lɛ bɛ, bé fe ko lɛ, yé wean minwiinzan blɛn a fe i lɛ, té bé gɔ do kpen yɔɔ ko ma lo yé ko ’ka dan i gyɛ lɛ lo,

²⁶ bé zi pa wo lɛ léé, an zanté vɔ minwiinzan blɛn lɛ léé, té é an pa zia Jonatan lé kɔn gi é dɛrɛ lo, dé maa da ga ’bɛna.

²⁷ Mi ’lɛzannu faa da Jérémi va yé wo we laa a lee. É a zi pa wo lɛ fɛan zo lé minwiinzan blɛn a pa a ’léé, a zo ’kyɛ, yé wo tadɔ yé we ’ko ’ka bɔ lɛ baa lo.

²⁸ Jérémi vo bokɔn gɔrɔ gi fɔɔ yé Babilɔn munu Jérusalɛm si.