Jérémi 37 - Kazambale lé Sebe Sauunu 1979

Sédésias we laa Jérémi lee

¹ Jozias be Sédésias pla munu nwiin Jojakim be Jékonia pa gi. Babilɔn nwiinzan blɛn Nébukanɛsaa a dɔ minwiinzan blɛn nya Juda tɛrɛ la.

² Yee koo, é wuozannu koo, ana tɛrɛlamunu koo, wo ’ka tɔné dɔ lɛ Gakelebale dére lé balelayezan Jérémi a fe, a lɛ lo.

³ Minwiinzan blɛn Sédésias Sélémia be Jukal valé Balebanzan Maaséja be Sofoni pa zia balelayezan Jérémi va a fele nya ’bɛ lɛ léé: Ko Gakelebale kolé Bale muun pa i ta.

⁴ Yé Jérémi éé goo ’té éé dan munu va. ’Té wo ’ka tan a vɔ lɛ bokɔn gi lo.

⁵ Faraɔn lé sunyanu si Éjipiti tɛrɛ la. Kaldé munu lé wo ke Jérusalɛm mabɛnna, wo we ’ko ’ma aan wo, wo si Jérusalɛm zi.

⁶ Yé Gakelebale we fe balelayezan Jérémi lɛ yé é léma:

⁷ Gakelebale, Izraɛl lé Bale léma: ’Ka fe Juda nwiinzan blɛn lé é ka nwunvɔ an va ’ko, a lɛ léé: Bé ye, Faraɔn lé sunyanu lé wo ke dana bɔna ka va bɛ, wo dan nɔla lɛ wo pa gi Éjipiti tɛrɛ la;

⁸ yé Kaldé munu é dan da lɛ wo pa gi é ziin; wo dan guli dan lɛ fla ’ko va; wo dan a si lɛ yé wa kyɛ ble.

⁹ Gakelebale léma: Té ka gi kɛlɛ kabo lɛ a fele nya léé, Kaldé munu é dan vlanburu lɛ ’wo ’lɛ baa, lo. Naa, wo ’ka dan fwi lɛ ka ’lɛ lo.

¹⁰ Yé dé ka Kaldé sunyanu faa gyɛoo, dé tuomunu saa ɛ vo ana, wo faa é dan nwa lɛ wolé sɔkɔnnu gi do do yé wo dan fla ’ko kyɛ ble lɛ.

Wo Jérémi vɔ bokɔn gi

¹¹ Kaldé sunyanu si Jérusalɛm bléyian va, Faraɔn lé sunyanu lé we ma,

¹² é sɔ Jérémi lɛ léé, é si Jérusalɛm yé é go Bɛnjamɛn tɛrɛ la, sile munu méléna we ma.

¹³ É bɔ aan wo flagɔrɔ ’léé lé wa laama Bɛnjamɛn, ana, ’té flatabin sunyanu ’lɛzan lé wa laama Aanania be Sélémia be Jiréija, é ana bɛ, é balelayezan Jérémi kun, yé é lé a lɛ léé: I a i péli vɔna Kaldé munu va.

¹⁴ Jérémi lé a lɛ léé: Vié bɛ. Maa ’ka an péli vɔna Kaldé munu va lo. Naa, Jiréija ’ka a nyi si lɛ lo, yé é go Jérémi nya minwiinzannu va.

¹⁵ Minwiinzannu bli fli Jérémi ma, yé wa bla yé wa vɔ bokɔn gi, sɛbɛgyɛzan Jonatan lé kɔn gi. Naa, wo ’bɛna kɛlɛ bokɔn nya.

¹⁶ ’Bɛ zo lé wo Jérémi vɔ bokɔn gi, bwati gi. Yé é mɔn ana.

¹⁷ Minwiinzan blɛn Sédésias mi pa zia Jérémi sina bokɔn gi, yé é we laa a lee kyeen gi élé kɔn gi léé: Gakelebale we do fee? Jérémi a zi pa léé: Iin. É léma: Wo dan i pa lɛ Babilɔn munu nwiinzan blɛn lee.

¹⁸ Yé Jérémi lé minwiinzan blɛn Sédésias lɛ léé: Mɛ wenyané lé maa a kɛlɛ bii koo, i wuozannu koo, ilé munu koo, ka lɛ yé ka an vɔ bokɔn gii?

¹⁹ Yé balelayezannu lé wo balelawe fe ka lɛ léé, Babilɔn nwiinzan blɛn ’ka dan da lɛ ka valé kalé tɛrɛ ma lo, wa kyɛɛn?

²⁰ Sin, anzan minwiinzan, ilé zanté, ’i tɔné dɔ an lɛ. ’I anlé dunuvɔmadére nyi si. Té i an pa zia sɛbɛgyɛzan Jonatan lé kɔn gi é ziin lo, dé an da ga ’bɛna.

²¹ Sédésias a fe munu lɛ léé, Jérémi ’é vo bokɔn gɔrɔ gi yé ’wo vo buru nɔna a lɛ fɔɔ yé buru é nyaa a zo fla. ’Bɛ zo lé Jérémi nyana bokɔn gɔrɔ gi.