Jérémi 36 - Kazambale lé Sebe Sauunu 1979

Baruk sɛbɛ ta fe

¹ Juda munu nwiinzan blɛn Jozias be Jojakim plale mi nwiin lɛɛ ziɛnzan nya, Gakelebale we fe Jérémi lɛ yé é léma:

² ’I sɛbɛ si, yé we faa lé maa a fe i lɛ Izraɛl munu koo, Juda munu koo, bɛnnu faa koo, wolé we ma, a péli sia yian nya lé an we fe i lɛ Jozias bléyi va fɔɔ kyɔ, ’i wo faa gyɛ yee sɛbɛ ta.

³ Wenaané faa lé é a an bli gi léé, maa dan a kɛlɛ lɛ Juda munu lɛ, dé wa ’ma, dé wo faa do do é dan daan lɛ wo kɛlɛwe naanénu maa? Dé wa kɛlɛ, maa dan wo ma we vo lɛ wolé weplenu valé wolé wenyané ma.

⁴ Jérémi Nérija be Baruk laa, yé we faa lé Gakelebale a fe Jérémi lɛ, é a fe Baruk lɛ, yé ’bɛ a gyɛ sɛbɛ ta.

⁵ Yé Jérémi we fe Baruk lɛ léé: We do bɔ; an ’ka bɔa gole lɛ Gakelebale lé kɔn gi lo.

⁶ Biibozen é dan go lɛ yé Gakelebale dére lé maa fe yé bé gyɛ sɛbɛ ta, bé ta fe wo lɛ. Bé ta fe munu lɛ Gakelebale lé kɔn gi, lɔrɔ sɔn yi nya. Yé Juda munu faa lé wo si wolé flanu ta yé wo da bɛ, bé ta fe é ziin ’bɛnu lɛ.

⁷ Dé Gakelebale é dan é tɔné dɔ lɛ wolé dunuvɔmadére lɛɛ? Yé dé wo dan si lɛ wolé wekɛlɛbɛ naané zuoo? Naa, Gakelebale bli flile valé a wɛwɛ lé é glawe fe munu ’ko lɛ wo nya bɛ, wa blɛn.

⁸ We faa lé balelayezan Jérémi a fe Nérija be Baruk lɛ, é a kɛlɛ. É Gakelebale dére ta fe sɛbɛ gi Gakelebale lé kɔn gi.

⁹ Juda munu nwiinzan blɛn Jozias be Jojakim plale mi nwiin lɛɛ soruzan nya, a moné sɔraziɛnzan nya, wa zana dɔɔ léé, Jérusalɛm munu faa koo, Juda munu faa lé wo si ’wolé flanu ta yé wo da Jérusalɛm, wo koo, ’wo lɔrɔ sɔn Gakelebale lɛ.

¹⁰ Jérémi dére lé ke é gyɛle sɛbɛ gi, Baruk a ta fe munu faa lɛ Gakelebale lé kɔn gi, sɛbɛgyɛzan Safan be Gémaria zé fɛna, Gakelebale lé kɔngɔrɔ loru zia, kɔn ’léé dɛrɛ nazia.

¹¹ Gakelebale dére lé wo ke é gyɛle sɛbɛ gi, Safan be Gémaria be Misé a faa ’ma aan wo,

¹² é bɔra yé é go minwiinzan blɛn lé kɔn gi yé é wɔra ’bɛlé sɛbɛgyɛzan lé kɔnmi zi, fɛana lé minwiinzannu faa ke é nyanale, wo va; sɛbɛgyɛzan Élisama koo, Sémaéja be Délaja koo, Akabɔɔ be Elnatan koo, Safan be Gémaria koo, Aanania be Sédésias koo, minwiinzan bɛnu faa koo, woo lé.

¹³ Dére faa lé Baruk a ta fe munu faa lɛ, Misé a ’ma, yé é wo faa zuo fe munu ’konu lɛ.

¹⁴ Yé minwiinzannu faa Kusi be Sélémia be Nétania be Jéudi pa zia Baruk va léé, ’wa fe a lɛ léé: Sɛbɛ lé bé ta fe munu lɛ bɛ, bé si yé i da a nya. Nérija be Baruk yee sɛbɛ si, yé é da a nya wo lɛ.

¹⁵ Wo lé a lɛ léé: ’I nyana yé bé ta fe ko lɛ. Yé Baruk a ta fe wo lɛ.

¹⁶ Wo dére ’konu faa ’ma aan wo, wo vo wo ke yara ginina di kinile nya wo gi. Yé wo lé Baruk lɛ léé: Ko dan dére ’konu faa zuo fe lɛ minwiinzan blɛn lɛ.

¹⁷ Yé wo we laa Baruk lee é ziin léé: I dére ’konu faa gyɛ a dére yɛrama fɛan zo, bé gi fe ko lɛ.

¹⁸ Baruk a zi pa wo lɛ léé: É we ’konu faa fe, yé maa wo gyɛ nankréyi nya sɛbɛ la.

¹⁹ Minwiinzannu lé Baruk lɛ léé: ’I go, bii valé Jérémi ’é yɔɔ. Té mi do kpen é ka yɔɔna ye lo.

Minwiinzan blɛn sɛbɛ kyɛ ble

²⁰ ’Bɛ zuo wo go minwiinzan blɛn va gɔrɔ gi, ’té wo sɛbɛ ’ko vo sɛbɛgyɛzan Élisama lé kɔnmi zi. Yé wo we ’konu faa fe minwiinzan blɛn lɛ.

²¹ Minwiinzan blɛn Jéudi nwunvɔ yee sɛbɛ sina. Jéudi a si sɛbɛgyɛzan Élisama lé fɛna yé é a ta fe minwiinzan blɛn valé minwiinzannu faa lé ke minwiinzan blɛn va bɛ, wo lɛ.

²² Minwiinzan blɛn a é nyanale dunu?-?kelekɔn gi moné sɔraziɛnzan nya, ’té kyɛ éé blé kyɛnyɛ zéngifɛ lé ke é dɔrale a ’lé, a gi.

²³ Jéudi sɛbɛ ta fe; dé é a laa yaa valé ziɛn ta fe tɔɔn, minwiinzan blɛn sɛbɛ bɔi sɛbɛgyɛzan lé sɛnnéné nya yé é a vɔ kyɛ lé é ke é nyanale a zi, a va; é kɛlɛ a zo fɔɔ yé a faa kyɛ ble.

²⁴ Minwiinzan blɛn valé é wuozannu faa lé wo we ’konu ’ma, é ’ka kana zén lɛ wo gi lo; wo ’ka wolé sɔnu fia lɛ lo.

²⁵ Elnatan koo, Délaja valé Gémaria koo, wo zanté vɔ a lɛ léé, té é sɛbɛ ’ko kyɛ ble lo, naa, é ’ka tɔné dɔ lɛ wo lɛ lo.

²⁶ Minwiinzan blɛn lé é be Jérasméɛl koo, Azriɛl be Séraja koo, Abudɛɛl be Sélémia koo, wo lɛ léé, ’wo sɛbɛgyɛzan Baruk valé balelayezan Jérémi kun. Naa, Gakelebale wo yɔɔ.

Jérémi sɛbɛ bɛ gyɛ é ziin

²⁷ Sɛbɛ lé Baruk a gyɛ Jérémi dére yɛrama, minwiinzan blɛn a kyɛ ble aan wo, Gakelebale we fe Jérémi lɛ léé:

²⁸ ’I sɛbɛ dɛrɛ bɛ si, yé dére faa lé é ke é gyɛle sɛbɛ vininzan lé Juda nwiinzan blɛn Jojakim a kyɛ ble bɛ, a gi, ’i yee dére duo gyɛ.

²⁹ I Juda nwiinzan blɛn Jojakim mawe fe ’ko zo léma: Gakelebale léma: I sɛbɛ ’ko kyɛ ble, yé i léé, mɛmalé bé gyɛ sɛbɛ la léé, Babilɔn nwiinzan blɛn é dan da lɛ yé é dan tɛrɛ ’ko sɛrɛ lɛ tata, yé a tamunu valé a tawinu ta é dan saan lɛɛ?

^30-31 Amalé Gakelebale Juda nwiinzan blɛn mawe fe léé, alé mi do kpen ’ka dan nyana lɛ David lé webleblin ta lo. Maa dan we lɛdɔ lɛ yee koo, a kulunu koo, a wuozannu koo, wo gi, wolé weple ma. Yé we tɔntɔnnu faa lé maa bon‐ɛnla a nya wo ma, ’té é ’ka sɔ lɛ wo lɛ léé, wo tɔné dɔ an lɛ bɛ lo, maa dan wo bɔ lɛ wo ma; wo koo, Jérusalɛm munu koo, Juda munu koo, wo ma. Yé yiri é dan a gale gyɛ lɛ é yiéyi yé dunu é dan a gale gyɛ lɛ é béli.

³² Jérémi sɛbɛ dɛrɛ bɛ si yé é a nɔ sɛbɛgyɛzan Nérija be Baruk lɛ. Dére faa lé é ke é gyɛle sɛbɛ lé Juda nwiinzan blɛn Jojakim a kyɛ ble bɛ, a gi, Baruk a dɛrɛ gyɛ Jérémi dére yɛrama. Yé wa taa pa ’bɛ zoɛ dére kiɛre nya é ziin.