Jérémi 35 - Kazambale lé Sebe Sauunu 1979

Jérémi valé Rékab gɔnɔlamunu

¹ Gakelebale we fe Jérémi lɛ Juda nwiinzan blɛn Jozias be Jojakim plale mi nwiin bléyi va, yé é léma:

² ’I go Rékab munu lé kɔn ’léé yé ’i we fe wo lɛ. ’I go wo nya Gakelebale lé kɔn gi, kɔnmi zi do na, yé ’i dɔrɔ nɔ wo lɛ ’wa mini.

³ Yé Abazinia be Jérémi be Jaazania koo, a bwenu koo, a benu koo, Rékab gɔnɔlamunu faa koo, maa wo si

⁴ yé maa go wo nya Gakelebale lé kɔn gi fɛdona, Bale lé mi Jigidalia be Aanan benu zé na, minwiinzannu lé kɔnmi zinu sɔnɔ, Salum be Maaséja lé ke kɔntabinzan nya, azé kɔn nwiin loru.

⁵ Kuonu lé ke é fanle dɔrɔ nya, ’bɛ valé kananu koo, maa wo dɔra Rékab gɔnɔlamunu ’lɛ yé maa lé wo lɛ léé: ’Ka dɔrɔ mini.

⁶ Naa, wa zi pa an lɛ léé: Ko ’ka dɔrɔ minian lo, naa, ko tra Rékab be Jonadab ko béli dɔ léé, té ko dɔrɔ mini monomono lo; ko koo, kolé nénu koo, té ko a mini lo,

⁷ té ko kɔn dɔ monomono lo, té ko fɛwɔlɛ do kpen vɔ lo, té ko dɔrɔféi pa lo, té dɔrɔféi é kɛlɛ ko lee lo, naa, ’ko nyana sɔkɔnnu gi kolé tɛrɛla faa gi, léé, tɛrɛ lé ko ke a ta bɛn nya, yé ko mɔn ana.

⁸ We faa lé ko tra Rékab be Jonadab a fe ko lɛ, ko a lɛdɔma; ko koo, ko nanu koo, kolé négɔnénu koo, kolé nélomu koo, ko ’ka dɔrɔ minian kolé tɛrɛla faa gi lo.

⁹ Ko ’ka kɔn dɔa ko nyanana nya monomono lo, yé dɔrɔféi koo, féi pla koo, fɛwɔlɛ vɔna koo, é ’ka ko lee lo;

¹⁰ ko nyanaan sɔkɔn wuo, yé we faa lé ko tra Jonadab a fe ko lɛ, ko tawoo a ta yé ko a tawenu kɛla.

¹¹ Bléyian va lé Babilɔn munu nwiinzan blɛn Nébukanɛsaa nwa tɛrɛ ’ko ma, ko léé, kaa go Jérusalɛm; kaa si Kaldé munu valé Siri munu lé sunyanu ma baa. ’Bɛ zo lé ko nyanaan Jérusalɛm.

¹² Yé Gakelebale we fe Jérémi lɛ yé é léma:

¹³ Lai sunyanu lé Gakelebale, Izraɛl munu lé Bale léma: ’I go, bé fe Juda munu valé Jérusalɛm munu lɛ léé, ka ’ka we paale ka gi nyi sié loo? Ka ’ka an dére lɛdɔa a ma loo? Maa Gakelebale ɛ ke a fena.

¹⁴ Dére lé Rékab bé Jonadab a fe é benu lɛ léé, té wo dɔrɔ mini lo, wa tawe kɛlɛ, yé wo ’ka a minian lo fɔɔ kyɔ; naa, wo dɔ wo tra dére ta, azama. Yé maa, an wefele sia ka lɛ bladi yé an ’ka daanma a ma lo, yé ka ’ka tɔné dɔ lɛ an lɛ lo.

¹⁵ Maa an wuozannu balelayemunu faa paan ka lɛ zia bladi nyanadi, a fele ka lɛ we gi léé: Ka faa do do, ’ka si kalé tawobɛ naané zuo, ’ka ka kɛlɛwenu nɔla, té ka go bale bɛnu zuo wo bɔle we gi lo, yé tɛrɛ lé maa a nɔ ka valé ka tranu lɛ, yé ka dan vo lɛ ana. Naa, ka ’ka an ban lɛ ka tɔné nya lo, yé ka ’ka tɔné dɔ lɛ an lɛ lo.

¹⁶ Weboen lé, Rékab be Jonadab we fe é benu lɛ yé wa tawe kɛlɛ, naa, munu ’ko ’ka wo tɔné dɔa an lɛ lo.

¹⁷ Amalé Gakelebale lai sunyanu lé Bale, Izraɛl munu lé Bale léma: Ka ye, we tɔntɔnnu faa lé maa wo lɛ kini Juda munu koo, Jérusalɛm munu koo, wo lɛ, maa dan wo kɛlɛ lɛ wo lɛ. An wo laa, yé wo ’ka we lɛ lo, azama.

¹⁸ Yé Jérémi lé Rékab munu lɛ léé: Lai sunyanu lé Gakelebale, Izraɛl munu lé Bale léma: Ka ka ti Jonadab lɛdɔma, yé bélidɔwenu lé é a fe ka lɛ, ’bɛ valé wenu lé é a pla ka lɛ, ka wo kɛlɛ,

¹⁹ amalé lai sunyanu lé Gakelebale, Izraɛl munu lé Bale léma: Rékab be Jonadab kulu ’ka dan vuru lɛ dɔle ma an ’lɛ lo.