Jérémi 34 - Kazambale lé Sebe Sauunu 1979

Wo we pa Sédésias lɛ zia

¹ Bléyian va lé Babilɔn nwiinzan blɛn Nébukanɛsaa valé alé sunyanu faa koo, bɛntɛrɛnu lé wo ke é plale a wuo koo, munu faa koo, ’té woo guli daan Jérusalɛm valé é zi flanu va bɛ, ’bɛ bléyi va Gakelebale we fe Jérémi lɛ yé é léma:

² Gakelebale Izraɛlnu lé Bale léma: ’I go, bé fe Juda nwiinzan blɛn Sédésias lɛ léma: Gakelebale léma: Bé ye, maa fla ’ko pa Babilɔn nwiinzan blɛn lee. É dan a kyɛ ble lɛ.

³ Yé bii, wo dan i kun lɛ, yé wo dan i pa lɛ Babilɔn nwiinzan blɛn lee, i ’ka dan so lɛ a lee lo; ka dan ka ke ye lɛ a nya yé ka dan we fe lɛ ka ke yara a nya, yé é dan go lɛ i nya Babilɔn.

⁴ Naa, Juda nwiinzan blɛn Sédésias, ’i tɔné dɔ é wo Gakelebale dére lɛ. Gakelebale i mawe fe léé, i ’ka dan ga lɛ gwɔun lee lo.

⁵ I dan ga lɛ drɔɔ, yé fɛan zo lé wo lasikɔrɔ kyɛ ble i tranu, minwiinzan blɛnnu lé wo ke i ’lɛ, wo lɛ bɛ, a zo lé wo dan izé kɛlɛ lɛ, yé wo dan i wuvɔ lɛ a fele nya léé: Yuu! Mizan! Naa, maa ɛ fe, azama. Maa Gakelebale ɛ ke a fena.

⁶ Balelayezan Jérémi dére ’konu faa fe Juda nwiinzan blɛn Sédésias lɛ Jérusalɛm.

⁷ Yé Babilɔn nwiinzan blɛn lé sunyanu guli dan Jérusalɛm koo, Lakis valé Azéka koo, wolé munu va. Naa, Juda tɛrɛla flanu lé wo vo, wo lé ke bɛ. Wa fla plɛplɛnu nya.

Wo dabli kɛlɛ luugimunu lɛ

⁸ Minwiinzan blɛn Sédésias dére pale Jérusalɛm munu va do zuo, Gakelebale we fe Jérémi lɛ. Dére lé wa pa do, yee lé ke léé, ’wa zana dɔɔ léé, munu faa ’é vo wobo ma.

⁹ Munu faa wolé luugɔné valé luudané vo wobo ma; dé é a Ébru gɔné nyaoo, dé é a Ébru gɔné na nyaoo, ’wo vo wobo ma, yé té mi do kpen é bwe Juifi mi vo ézé luu nya lo.

¹⁰ Minwiinzannu valé munu faa lé wo dére pa do we ’ko gi, wa nyi si léé, wo faa do do ’wolé luugɔné valé luudané vo wobo ma, léé, té wa vo é dɛrɛ luu gi lo we gi. Wo dɔ dére ’ko ta yé wo daan wo ma.

¹¹ Naa, ’bɛ zuo wo bli nɔla; luugɔnénu valé luudanénu lé wo daan wo ma bɛ, wo wo kɛlɛ luunu valé wo wuozannu nya wo pa gi, gla nya.

¹² ’Bɛ zuo Gakelebale we fe Jérémi lɛ léma:

¹³ Gakelebale, Izraɛl munu lé Bale léma: Yian nya lé maa ka tranu si Éjipiti tɛrɛ la luubale gi, maa gipawe do kɛlɛ wo va, yé maa lé wo lɛ léma:

¹⁴ Lɛɛ sɔrafié giéle zuo, ka faa do do, ka bwe Ébrunu lé wo wobo dan ka lee, ’ka wo vo wobo ma. ’Wo nyanama pa i va lɛɛ suiɛdo, ’bɛ zuo yé bé si ilé kɔn ’léé, yé ’é vo ébo ma. Naa, ka tranu ’ka wo tɔné dɔ lɛ an dére lɛ lo, wo ’ka an ban lɛ wo tɔné nya lilo.

¹⁵ Naa, ’kaa, yi do nya ka ka dɔbɛ nɔla. We lé ke an yuɛ gi tegele, ka a kɛlɛ, yé ka a zana dɔɔ léé, ’ka ka bɔluzannu vo wobo ma; ka dére pa do an ’lɛ, kɔn lé wo an tɔ pa a ma bɛ, a gi.

¹⁶ Naa, ka dére nɔla sin yé ka an tɔ sɛrɛ; yé luugɔnénu valé luudanénu lé ka zi nɔ wo lɛ yé ka wo vo wobo ma bɛ, ka wo si é ziin, yé ka wo kɛlɛ luunu valé ka wuozannu nya wo pa gi gla nya.

¹⁷ Amalé Gakelebale léma: Ka ’ka an lɛ dɔ lɛ a ma lo, ka ’ka zi nɔ lɛ ka bwenu valé ka bɔluzannu lɛ léé, wo vo wobo ma lo. Amalé maa dan zi nɔ lɛ gwɔun koo, migyɛgyɛ koo, lɔrɔ koo, wo lɛ yé di é dan kini lɛ tɛrɛ blɛnnu faa gi kalé we ma.

¹⁸ Munu lé wo anlé gipawe sɔnné sɛrɛ, ’té dére lé ko pa do wo nya, giéle nya diriboroné bɔile fié méléna bɛ, yé wo ’ka yee déretawenu kɛlɛ lɛ lo bɛ, maa dan wo pa lɛ munu lee.

¹⁹ Munu nwiinzannu koo, Jérusalɛm munu nwiinzannu koo, mi blalenu koo, Balebanmunu koo, tɛrɛ ’ko tamunu faa koo, ’té wo gié diriboroné méléna bɛ, maa dan wo pa lɛ munu lee;

²⁰ maa dan wo pa lɛ wo nyanézannu lé é sɔ ’bɛnu lɛ turu léé, ’wo wo gya, ’bɛnu lee, yé wo galenu é dan kɛlɛ lɛ lagi mianénu valé tɛrɛlawinu blefɛ nya.

²¹ Maa dan Juda munu nwiinzan blɛn Sédésias valé élé minwiinzannu pa lɛ wo nyanézannu lé é sɔ ’bɛnu lɛ turu léé, ’wo wo gya, ’bɛnu lee. Maa dan wo pa lɛ Babilɔn nwiinzan blɛn lé sunyanu palu lé wo si ka ma sɛ bɛ, wo lee.

²² Gakelebale léé: Ka ye, maa dan we fe lɛ yé maa dan da lɛ wo nya fla ’ko ma, yé wo dan guli dan lɛ a va; wo dan a si lɛ yé wo dan a kyɛ ble lɛ. Yé maa dan Juda tɛrɛla flanu kɛlɛ lɛ bwi lé mi do ’kpen ’ka nyanaan ana lo, a nya.