Jérémi 33 - Kazambale lé Sebe Sauunu 1979

Blivolɛdére do lé é ziin

¹ Gakelebale we fe Jérémi lɛ a gɔnɔ fiézan nya, bléyian va lé é a tan bokɔn gi, a bléyi va, yé é léma:

² Gakelebale lé é we ’konu kɛla, é léma: Gakelebale lé éé wenu bɔrɔan é ’wuo gi, ’té éé wo kɛla, yee lé a tɔ ke Gakelebale bɛ, é léma:

³ ’I an tɔ laa yé an dan we lɛ; we blɛnblɛnnu valé weyɔɔlenu lé i ’ka wo dɔɔa lo, maa dan wo lɛ kini lɛ i lɛ.

⁴ Fla ’ko ta kɔnnu valé Izraɛl munu nwiinzan blɛnnu lé kɔnnu lé wo dan wo ’wii lɛ yé wo ’bin gyɛ wo nya guli lé we ma, Gakelebale Izraɛl lé Bale wo ma we fe léma:

⁵ Dé wo bié gulidanle Kaldémunu va we ma, yee kɔnnu é dan fan lɛ munu lé maa dan wo gyɛ lɛ anlé bliflile valé an wɛwɛ nya, wo galenu nya, munuan maa dan an yara yɔɔ lɛ wo ma, wolé wenyanénu lé we ma, woo lé.

⁶ Ka ye, maa dan wo manɔn paa lɛ, maa dan wo fuu dɔ lɛ wo ta, yé maa dan wo béli lɛ, yé maa dan vole drɔɔ valé yara pale we la ’wuo nɔ lɛ wo lɛ.

⁷ Juda valé Izraɛl munu lé wo ke luu gi, maa dan da lɛ wo nya ’wo pa gi; maa dan wo nyana lɛ ’wo pa gi bélé é vinin zo.

⁸ Weplenu faa lé wa kɛlɛ an lɛ, maa dan wo zuru lɛ ’bɛ we ma, yé weplenu lé wa kɛlɛ an ’namawe nya, yé wo nwa an ma wo nya, maa dan wo ma we vo lɛ ’bɛ we ma.

⁹ Fla ’ko é dan kɛlɛ lɛ anlé ginanalafla koo, an tɔbɔla fla koo, anlé fua tɔbɔla fla koo, wo nya, tɛrɛla bɛnnu faa va. We zinnu faa lé maa dan a kɛlɛ lɛ wo lɛ, bɛnnu é dan a ’ma lɛ; dé wo an ye bɛ ma wolowolozan nya Izraɛl munu vazia, wo gi é dan vuru lɛ, ’té éé kɔɔan wo bli gi.

¹⁰ Gakelebale léma: Ka fe fɛkona ma léé, é a bwi nya yé mi do kpen ’ka ana lo, yé wi do kpen ’ka ana lo, ’bɛ a weboen nya, naa, Juda tɛrɛla flanu valé Jérusalɛm zinu lé wo ke é sɛrɛle tata, ’té mi ’ka ana lo, ’té munu ’ka nyanaan ana lo, ’té winu ’ka ana lo bɛ,

¹¹ ’bɛna lé wo dan ginana siaalenu ’ma lɛ yé wo dan ginana blɛn siaalenu ’ma lɛ. Wo dan ledɛrɛsizan valé bodɛrɛsizan lé lɛrɛvɔle ’ma lɛ; munu lé wa fé léé, ’ka lai sunyanu lé Gakelebale tɔ zin fe, naa, Gakelebale a é zin yé a nyanai éé zén‐é yifaama, wo dan ’bɛnu dére ’ma lɛ. Munu lé woo bɔvɔ sarakanu boo Gakelebale lé kɔn gi, wo dan ’bɛnu dére ’ma lɛ. Naa, maa dan da lɛ luugimunu nya wo pa gi; maa dan wo nyana lɛ ana bélé é vinin zé zo. Maa Gakelebale ɛ ke a fena.

¹² Lai sunyanu lé Gakelebale léma: Fɛkona lé ke bwi nya, ’té munu valé winu ’ka ana lo, ’blatabinzannu nyanananu é dan kɛlɛ lɛ ana fla faa la, ’té woo wolé trubɛnu yiaan ana.

¹³ Gɔ ma flanu koo, fɛna pɛblɛɛ flanu koo, yirinwana bɛyilazia flanu koo, Bɛnjamɛn tɛrɛla valé Jérusalɛm zi flanu koo, Juda tɛrɛla flanu koo, ’blanu é dan gié lɛ ’wo nɔnɔzan wuo wona. Maa Gakelebale ɛ ke a fena.

¹⁴ Gakelebale léma: Ka ye, a yinu é dan bɔ lɛ yé dére zinnu lé maa a fe Izraɛl munu valé Judamunu ma, maa dan wo lɛ sɔɔ lɛ.

¹⁵ ’Bɛ yinu la, yé ’bɛ bléyi va, David punla é dan nɛɛ lɛ mi tegele do nya. É dan we tegele valé we drɔle kɛlɛ lɛ tɛrɛ la.

¹⁶ ’Bɛ yinu la Juda munu é dan si lɛ we gi, yé Jérusalɛm munu é dan nyana lɛ kli wo nyanana; tɔ lé wo dan a laa lɛ a nya, yee lé ke ’ko: Gakelebale, kolé wetegele.

¹⁷ Naa, Gakelebale léma: David kululazan lé éé nyanaan Izraɛl munu lé webleblin ta, é ’ka dan vuru lɛ a ma lilo;

¹⁸ Balebanmunu lé ke Lévinu nya, wo kululazannu lé woo Bale baan, wo ’ka dan vuru lɛ a ma lo; wo dan Bale ban lɛ wi lé wa kyɛ blé, a nya; wo dan lasikɔrɔpo kyɛ ble lɛ, é valé blɛfɛnu nya, yé wo dan saraka bo lɛ yifaama, wo ’ka dan a kɛlɛle yi ga lɛ lo.

¹⁹ Gakelebale we fe Jérémi lɛ yé é léma:

²⁰ Gakelebale léma: We lé maa a fe yiéyi lɛ, é valé we lé maa a fe béli lɛ, dé ka bɔa ’bɛ sɛrɛle lɛ, yé té yiéyi valé béli ’ka kɛla é dɛrɛ lo,

²¹ ’té gipawe lé maa a kɛlɛ an wuozan David va, ’té é sɛrɛ, ’té a kululazan ’ka nyanaan alé webleblin ta é dɛrɛ lo, yé anlé gipawe lé maa a kɛlɛ Balebanmunu Lévinu lé woo an va nyanama paan bɛ, wo va, ’té é dan sɛrɛ lɛ.

²² Fɛan zo lé wo ’ka bɔa lagi monénénu nɔnɔle lɛ lo yé wo ’ka bɔa wɛyi gɔɔn ma nyéné nɔnɔle lɛ lo, a zo duo lé an wuozan David valé Lévinu lé woo an va nyanama paan, maa dan wo kulunu gi gyɛ lɛ.

²³ Gakelebale lé Jérémi lɛ léma:

²⁴ We lé munu ’ko ke a fena, i ’ka a gi dɔɔa loo? Wo léé: Migɔnɔ fié lé Gakelebale wo si a va, é sɔn vɔ wo ma. ’Bɛ zo lé wo ke serele bona anlé munu ma, fɔɔ ’té wo ’ka wo yé é dɛrɛ bɛngɔnɔ do nya lo.

²⁵ Gakelebale léma: Dé é a kɔɔn lé maa ’ka we fe lɛ yiéyi valé béli lɛ lo, dé é a kɔɔn lé an ’ka lanu valé tɛrɛ béli dɔ lɛ lo,

²⁶ ’té an dan sɔn vɔ lɛ Jakɔb valé an wuozan David kulunu ma, yé munu lé wo dan pla lɛ Abraam koo, Izak koo, Jakɔb koo, wo kulunu nwiin, maa ’ka dan wo si lɛ David kulunu va lo. Naa, maa dan da lɛ wolé luugimunu nya wo pa gi, yé an nyanai é dan zén lɛ wo ta, azama.