Jérémi 32 - Kazambale lé Sebe Sauunu 1979

Jérémi féi do lɔ

¹ Gakelebale we fe Jérémi lɛ Juda nwiinzan blɛn Sédésias plale mi nwiin lɛɛ vuzan nya. ’Bɛ a Nébukanɛsaa plale munu nwiin lɛɛ vu ta sɔraazan nya.

² Babilɔn nwiinzan blɛn lé sunyanu diri Jérusalɛm zi, ’té balelayezan Jérémi a bokɔn lé é ke Juda nwiinzan lé kɔn gi bɛ, a gɔrɔ gi.

³ Juda nwiinzan blɛn Sédésias Jérémi vɔ bokɔn gi a fele nya léé: Mɛmalé i balelawe fe léé: Gakelebale léma: Bé ye, maa fla ’ko pa Babilɔn nwiinzan blɛn lee, yé é dan a si lɛ;

⁴ Juda nwiinzan blɛn Sédésias ’ka dan so lɛ Kaldé munu lee lo, naa, wo dan a pa lɛ Babilɔn nwiinzan blɛn lee; wo dan we fe lɛ a nya wo ke yara, yé wo fiénu é dan wo ke yuɛ wɔlɛ ye lɛ;

⁵ Babilɔn nwiinzan blɛn é dan go lɛ Sédésias nya Babilɔn, yé é dan vo lɛ ’bɛna fɔɔ yé a sele é dɔ an gi. Maa Gakelebale ɛ ke a fena. Dé ka guli dan Kaldé munu va, é ’ka dan nana lɛ ka lee lo. Mɛmalé i balelawe fe ’bɛ zoo?

⁶ Jérémi léma: Gakelebale we fe an lɛ yé é léma:

⁷ Bé ye, i bu bwe Salum be Anaméɛl bɛ, é dan da lɛ i va, yé é dan a fe lɛ i lɛ léma: Anlé féi lé ke Anatɔt bɛ, bé lɔ, naa, a tabo se a i lɛ, yé ’é kɛlɛ izé nya.

⁸ Yé an bu bwe be Anaméɛl da an va bokɔn lé gɔrɔ gi, Gakelebale dére yɛrama, yé é lé an lɛ léé: Anlé féi lé ke Anatɔt, Bɛnjamɛn tɛrɛ la bɛ, bé lɔ, naa, a tabo se a bii ɛ lɛ. Bé lɔ. Dé é a fe a zo, maa a ye léé, dére ’ko a Gakelebale dére nya.

⁹ Féi lé ke Anatɔt, maa a lɔ an bu bwe be Anaméɛl lee, yé maa a ma gɔɔli dan kilo la gɔɔlifu sikla vu ta sɔrafié.

¹⁰ Maa féilɔsɛbɛ gyɛ, yé an tɔmase dɔra a ta tanpɔn nya; maa wenayezannu dɔ, yé an gɔɔlifu dan kilo ta.

¹¹ ’Bɛ zuo maa féilɔsɛbɛ gyɛ fié, maa a do lɛ tan fɛkuafɛ nya, bélidɔwe valé kozé we kɛlɛbɛ yɛrama, yé a do lɛ vo é sole.

¹² Yé an yee féilɔsɛbɛ vininzan ’ko nɔ Maséja be Nérija be Baruk lɛ, an bu bwe be Anaméɛl koo, wenayemunu lé wo wo tɔ gyɛ féilɔsɛbɛ ta koo, Juifinu faa lé wo ke bokɔn gɔrɔ gi koo, wo faa yuɛ va.

¹³ Yé maa we fe Baruk lɛ wo yuɛ va yé maa léé:

¹⁴ Lai sunyanu lé Gakelebale, Izraɛl lé Bale léma: ’I sɛbɛ ’konu si, yee féilɔsɛbɛ lé a lɛ ke é tanle koo, a koɛ lé ’bɛ ke é pla koo, ’i wo pa bɔ gi wo mɔnle ana we ma.

¹⁵ Naa, lai sunyanu lé Gakelebale, Izraɛl lé Bale léma: Kɔnnu koo, féinu koo, dɔrɔféinu koo, wo dan wo lɔ lɛ tɛrɛ ’ko la é ziin.

Jérémi lé bazorole

¹⁶ Maa féilɔsɛbɛ nɔ aan wo Nérija be Baruk lɛ, maa bazoro Gakelebale lɛ yé maa léé:

¹⁷ Aa, Mizan Gakelebale, bé ye, i lanu valé tɛrɛ kɛlɛ ilé plɛplɛ blɛn valé i bɛ plɛplɛ nya; i givuruwe do kpen ’ka lo.

¹⁸ I nyanai éé zén‐é fɔɔ mi kulu wuru é wuru ta, yé weplenu lé né tinu a kɛlɛ, bé ma we lɛdɔa wolé nénu gi. Bii ɛ ke Bale blɛn lé é ke plɛplɛ, a nya, ’té a tɔ ke lai sunyanu lé Gakelebale bɛ, a nya.

¹⁹ I we plaan mi lɛ i zua, yé i a plɛplɛ we kɛlɛle gi; i yuɛ a é fuole blami kɛlɛwe yele we ma, léé, i wo faa do do banwo wolé tawobɛ yɛrama, wolé we kɛlɛbɛ yɛrama.

²⁰ I gyɛzorowenu valé we blɛnnu kɛlɛ Éjipiti tɛrɛ la fɔɔ kyɔ, yé bé kɛlɛ Izraɛl tɛrɛla valé munu méléna. I tɔ kɛlɛ blɛn bélé fɛan zo lé é ke kyɔ, a zo.

²¹ Ilé munu Izraɛl si Éjipiti tɛrɛ la, gyɛzorowenu valé we blɛnblɛnnu kɛlɛle nya, i bɛ plɛplɛ soile nya, é valé kana blɛn zénle nya wo gi.

²² I tɛrɛ ’ko nɔ wo lɛ, tɛrɛ lé ibo ’nyɔɔn léé, i dan a nɔ lɛ wo tranu lɛ, yee lé, tɛrɛ nyɔnɔzan lé.

²³ Wo da, yé wo tɛrɛ ’ko si wozé nya, naa, wo ’ka i dére lɛdɔ lɛ a ma lo, yé wo ’ka ilé bélidɔwe tawe kɛlɛ lɛ monomono lo; we faa lé i wo béli dɔ a nya léé, ’wa kɛlɛ, wo ’ka a kɛlɛ lɛ lo. Amalé i we tɔntɔnnu faa ’ko bɔ wo ma.

²⁴ Bé ye, wa tɛrɛ ’bin gyɛna fla ma yé wa bon‐ɛnna a nya; Kaldé munu lé wo nwa fla ’ko ma bɛ, wo dan fla ’ko si lɛ, gwɔun koo, lɔrɔ koo, migyɛgyɛ koo, ’té wo Izraɛl kele é wo bɛ. I wean fe, é bɔ, yé bé ye.

²⁵ Naa, Mizan Gakelebale, duowo, bé fe an lɛ léé, ’an féi do lɔ gɔɔli nya, an wenayezannu dɔ, ’té Kaldé munu fla si.

²⁶ Gakelebale we fe Jérémi lɛ yé é léma:

²⁷ Bé ye, maa a Gakelebale, munu faa lé Bale nya; an kelewe aa?

²⁸ Bɛwemalé Gakelebale léma: Bé ye, maa fla ’ko paan Kaldé munu lee, maa a paan Babilɔn nwiinzan blɛn Nébukanɛsaa lee, yé é dan a si lɛ.

²⁹ Kaldé munu lé wo nwa fla ’ko ma, wo dan wɔra lɛ fla; wo dan a kyɛ vɔ lɛ, yé kyɛ é dan a ble lɛ, yee valé kɔnnu lé wo lasikɔrɔ kyɛ ble Baal lɛ wo nwiin, ’té woo baleban’yi zanaan ana bale bɛnu lɛ an bli flile we ma bɛ, wo nya.

³⁰ Naa, é sia wo kiéné la bléyi va fɔɔ kyɔ, Izraɛl munu valé Juda munu an ’namawe saa ɛ kɛlɛ. Izraɛl munu an bli fli wo bɛ panyanama nya. Maa Gakelebale ɛ ke a fena.

³¹ Naa, fla ’ko an bli fli yé an wɛwɛ dɔ, é sia a pabléyi va fɔɔ kyɔ, amalé é sɔ an lɛ léé, maa a si an yuɛ gi.

³² Izraɛl munu valé Juda munu koo, wo nwiinzan blɛn koo, wozannu koo, wolé Balebanmunu valé wolé balelayemunu koo, Juda munu valé Jérusalɛm munu koo, wenyanénu lé wa kɛlɛ an bliflile we gi, aléwemalé é sɔ an lɛ léé, maa a si an yuɛ gi.

³³ Wo nwun zi dɔ an ta, wo ’ka an nagini lɛ lo; wo we paa wo gi yifaama, naa, wo ’ka wo tɔné dɔ lɛ léé, wo we paa ’wo gi lo.

³⁴ Wo ’wolé bozofɛnu dɔa, kɔn lé wo an tɔ laan a ta bɛ, a gi, yé wo ana tiri dɔ.

³⁵ Wo gɔ nwiin yobannanu dɔ Baal zé nya, Bɛn‐Inom gɔ worona, léé, wo ’wo benu valé wo lunu kɛlɛ Mɔlɔk banfɛ nya. Maa ’ka a fe lɛ wo lɛ léé, wo ’bɛ zoɛ we kɛlɛ lo; yé é ’ka boenwo dɔ lɛ an ’wuo gi léé, woo ’bɛ zo dunuzénmitawe kɛla yé wo Juda munu kɛla wenyanékɛlɛzannu nya lo.

Blivolɛdére

³⁶ Yé sin, Gakelebale, Izraɛl munu lé Bale léma: Fla lé bé mawe fe kɔɔn léé, wo dan a pa lɛ Babilɔn nwiinzan blɛn lee, gwɔun koo, lɔrɔ koo, migyɛgyɛ koo, ’té wo Izraɛl kele é wo bɛ,

³⁷ yee flamunu lé maa wo mawe fe i lɛ léé, maa wo bin yé wo go tɛrɛ faa‐an ta bɛ, an bli flile koo, an wɛwɛ koo, an bli nwale koo, wolé we ma bɛ, maa dan wo si lɛ ana yé maa wo zén ékeva yé an da wo nya wolé tɛrɛ la é ziin yé wo dan nyana lɛ ana duaa.

³⁸ Wo dan kɛlɛ lɛ anlé munu nya, yé maa dan kɛlɛ lɛ wolé Bale nya.

³⁹ Maa dan bli do vɔ lɛ wo gi, yé maa dan zi do gɔɔn lɛ wo lɛ, léé, ’wo kana an lee yifaama, wo valé wolé nénu lé we zin yele we ma.

⁴⁰ Gipawe lé é dan vo lɛ ana lɛɛfaama, maa dan a kɛlɛ lɛ wo va. Maa ’ka dan an yara si lɛ wo ta é dɛrɛ lo, maa dan we zin kɛlɛ lɛ wo lɛ. Yé an dan an lee kanale pa lɛ wo bli gi, léé, té wo si an va lo.

⁴¹ Wezin kɛlɛle wo lɛ é dan an gi nana lɛ, yé maa dan wo nyana lɛ kli tɛrɛ ’ko ta, an bli faa valé an boen faa nya.

⁴² Naa, Gakelebale léma: Fɛan zo lé an kleblele blɛn dia munu ’ko ta, a zo duo lé, wezinnu lé maa wo ma blivolɛ dére fe wo lɛ, maa dan wo kɛlɛ lɛ wo lɛ.

⁴³ Tɛrɛ lé ka a fe a ma léé, é a bwi nya, blaminu ’ka ana lo, yé wi do kpen ’ka ana lo, yé é a é pale Kaldé munu lee bɛ, wo dan féinu lɔ lɛ yee tɛrɛ ’ko ta.

⁴⁴ Wo dan féinu lɔ lɛ gɔɔli nya, wo dan woo féilɔsɛbɛnu gyɛ lɛ, wo dan tɔmasenu dɔra lɛ wo ta tanpɔn nya; wo dan anayemunu dɔ lɛ, Bɛnjamɛn tɛrɛ valé Jérusalɛm zi flanu koo, Juda tɛrɛ la flanu koo, gɔ ma flanu koo, fɛna pɛblɛɛ flanu koo, yirinwana bɛyilazia flanu koo, wona. Naa, maa dan da lɛ woo luugimunu nya wo pa gi. Maa Gakelebale ɛ ke a fena.