Jérémi 31 - Kazambale lé Sebe Sauunu 1979

Izraɛl munu dale ’wo pa gi

¹ Gakelebale léma: ’Bɛ yi ’ko la, maa dan, kɛlɛ lɛ Izraɛl lele faa lé Bale nya, yé wo dan kɛlɛ lɛ anlé munu nya.

² Gakelebale léma: Wo zin ye an va bwi gi, munu lé wo so gwɔun ’léé, woo lé; Izraɛl munu a gona ’wo flinna.

³ Gakelebale a é sile an ma baa, naa, ébo nagɔɔn an lɛ; i sɔ an lɛ sɔlɛle lé a glɛ ’ka lo, a nya, bɛwemalé anlé zin ana tan kazé nya.

⁴ Izraɛl, blɛnzan, maa dan i dɔ lɛ gligli é ziin, yé i dan dɔ lɛ kil. Ilé flinnu é dan kɛlɛ lɛ i ’lɛrɛfɛ nya é ziin, yé munu lé wo ke nɛnɛ bona ginanale nya, i dan pa lɛ wo va.

⁵ I dan dɔrɔféinu pa lɛ Samari tɛrɛ la gɔnu nwiin é ziin; féipazannu é dan wo suru lɛ yé wo dan wo poro so lɛ.

⁶ Naa, a yi é dan bɔ lɛ yé mi tagini‐zannu é dan siaa lɛ Éfraim gɔ nwiin léé: ’Ka nwa, kaa go Siɔn, Gakelebale kolé Bale vazia.

⁷ Naa, Gakelebale léma: ’Ka siaa ginanale nya Jakɔb lé we ma, Ka lé ka ke bɛnnu ’lɛ, ’ka siaa ginanale blɛn nya; ’Ka dére nwa, ’ka Bale tɔmagyɛ‐lɛrɛ vɔ, yé ’ka fe léma: Gakelebale, ’ilé munu si we gi, Izraɛl munu lé wo vo, wo lé.

⁸ Ka ye, maa dan munu si lɛ yiri‐nwanazia tɛrɛ la, yé an da wo nya, Maa dan wo si lɛ tɛrɛ glɛ sina yé maa wo zén ékeva; Yuɛwiizannu valé ganesuruzannu a wo va, Bɔnlomu valé néyaalomu a wo va. Migu blɛn lé é ke dana ’ko é ziin, yee lé.

⁹ Woo dan wuvɔle nya, naa, woo bazoroan bléyian va, ’té an goo wo nya; Maa goo wo nya ’yi yoronmu vazia, Zi do lé mi ’ka vɔa a ’léé danké danké lo, ana. Naa, maa a Izraɛl munu ti nya, Yé Éfraim a anlé né vininzan nya.

¹⁰ ’Kaa bɛnnu, ’ka tɔné dɔ Gakelebale dére lɛ, Yé ’ka a zana dɔɔ wɛyi worona tɛrɛ baanu ta, ’Ka fe léé: Mian é Izraɛl munu kini ékema, é dan wo zén lɛ ékema é ziin, Yé é dan wo tabin lɛ bélé ’blata‐binzan élé ’blanu tabin‐é fɛan zo, a zo.

¹¹ Naa, Gakelebale Jakɔb tabo, Yé mi lé ’bɛ plɛplɛ mini a lɛ, é a si ’bɛzan lee.

¹² Wo dan da lɛ, wo dan siaa lɛ ginanale nya Siɔn gɔ nwiin; Wo dan vlanburu lɛ Gakelebale lé fɛ zinnu zuo, ’Sa koo, dɔrɔ dɛrɛ koo, nyɔnɔ koo, ’Blanu koo, dirinu koo, wo zuo; Wo boennu é dan kɛlɛ lɛ bélé féi lé woo ’yi zén‐é a ta, a zo, Yé wo ’ka dan nyané ble lɛ é dɛrɛ lo.

¹³ Yé leboronénu é dan nɛnɛ bo lɛ gi nanale nya, Pɛniɛnu valé mi kwanu gi é dan nana lɛ é ziin; Maa dan wolé gyɛbole nɔla lɛ gi‐nandale baba nya, yé maa dan wo tɔrɔ paa lɛ; Yé maa dan ginanale nɔ lɛ wo lɛ wo bli kyɛdɔle pa gi.

¹⁴ Maa dan Balebanzannu kan lɛ balebanfɛ nyɔnɔ nya, Yé anlé munu é dan kan lɛ anlé fɛ zinnu nya. Maa Gakelebale ɛ ke a fena.

Bale nyanai zén Izraɛl ta

¹⁵ Naa, Gakelebale léma: Wo siaalenu ’ma Rama, Dunnu blɛn wolenu valé nyanai‐nya wuvɔlenu nya; Rasɛl a élé nénu wuvɔna; Alé nénu ’ka ana é dɛrɛ lo, Amalé é ’ka a nyi si lɛ léé, wo ’é tɔrɔ paa lo.

¹⁶ Gakelebale léma: ’Ilé wuvɔle sɔ, ’I yuɛyi si; Naa, Gakelebale léé, wo dan i kɛlɛwenu ma banwo lɛ; Munu é dan si lɛ wo nyanézannu lé tɛrɛ la yé ’wo da.

¹⁷ Gakelebale léé: I bli ’é vo bléyi voéla lɛ, Ilé nénu é dan da lɛ wolé tɛrɛ la é ziin.

¹⁸ Maa Éfraim dére ’ma, ’té éé dunnuan; I we lɛdɔ an gi, yé a lɛ a é dɔle an gi weboen nya, Bélé diriné lé wo ’ka pla lɛ a nwiin lo, a zo; Bii ɛ da an nya an pa gi, amalé an da, Naa, i a Gakelebale, anlé Bale nya.

¹⁹ An yara si i ta, naa, ’bɛ zuo an bli nɔla; Dé maa an saanna ye, an vo an bin gyɛna; Yara an gyɛ yé an ’yibo, Naa, wenu lé maa wo kɛlɛ an boro‐né la bléyi va, wo tɔ a an ma.

²⁰ Éfraim a an be wezan nyaa? É a anlé ginanama né nyaa? Naa, dé maa a a mawe fena bléyio‐bléyian va, A sele éé dɔa an gi léé, an be lé. Yé é ziin, a lɔrɔ an gya; An nyanai é dan zén lɛ a ta. Maa Gakelebale ɛ ke a fena.

²¹ Zi lé i dan tawo lɛ a ta, ’i yuɛ vɔ ana é zima, ’I tɔmasenu kɛlɛ ana, ’i yilinu suru; Blɛnzan Izraɛl, ’i da i pa gi, Flanu lé wo ke izé nya, ’i da wo ta.

²² Bii blɛnzan lé i si zi zima ta, I dn si lɛ ilé saanzi ta mɛ yi laa? Naa, Gkelebale we dɛrɛ kɛlɛ tɛrɛ la; Le é dan é zana fɛɛ bo lɛ.

Bale lé munu é dan vɔ lɛ a ma

²³ Lai sunyanu lé Gakelebale, Izraɛl lé Bale léma: Dé an da luugi‐munu nya wo pa gi, we lé munu é dan a fe lɛ Juda tɛrɛ valé é ta flanu ta, yee lé ke ’ko: Wetegele nyanana, gɔ sauun, Gakelebale i drɔɔ vo ma.

²⁴ Juda valé élé fla blɛnnu koo, féipa‐munu valé trubɛ tabinmunu koo, wo dan nyana lɛ ana é ziin.

²⁵ Naa, munu lé ’yiminilɔrɔ wo vo tɔɔtɔɔ, maa dan ’yiminilɔrɔ si lɛ wo ma, yé munu lé lɔrɔ blɛn wo fuu si wo ta, maa dan wo kan lɛ.

²⁶ ’Bɛna tɔɔn, a vuo, yé an yuɛ fuo; anlé yigyɛle ’ko nana an lee.

²⁷ Gakelebale léma: Ka ye, a yi é dan bɔ lɛ, yé maa dan Izraɛl munu valé Juda munu fan lɛ; maa dan munu valé winu fan lɛ.

²⁸ Yé fɛan zo lé maa yara pa wo sile wo dɔna koo, wo gyɛle koo, wo sɛrɛle tata koo, wo guru zanale a gi valé we tɔntɔn bɔle wo ma koo, wo ta, a zo duo lé sin, maa dan yara pa lɛ wo nyanale valé wolé fla pale ta. Maa Gakelebale ɛ ke a fena.

²⁹ ’Bɛ yinu la, wo ’ka dan a fe lɛ é dɛrɛ léé: Né tinu dɔrɔporo tukuru ble Yé nénu suiɛ ’lɛ bo a nya, lo.

³⁰ Naa, mi faa do do é dan ga lɛ ébo‐zin lé weplenu ma; munu faa lé wo dan dɔrɔporo tukurunu ble lɛ, wo ɛ suiɛ ’lɛ é dn bo lɛ.

³¹ Gakelebale léma: Ka ye, a yi é dan bɔ lɛ, yé maa dan gipawe dɛrɛ do kɛlɛ lɛ Izraɛl valé Juda munu va.

³² Gipawe lé maa a kɛlɛ wo tinu va, yian nya lé maa wo kun ’wo bɛ ma wo sile Éjipiti tɛrɛ la we ma, ’té wa sɛrɛ bɛ, dɔlé ’té maa a wozan nya, é ’ka dan kɛlɛ lɛ bélé ’bɛ gipawe zo lo. Maa Gakelebale ɛ ke a fena.

³³ Naa, Gakelebale léé: Gipawe lé maa dan a kɛlɛ lɛ Izraɛl munu va yi ’konu giéle zuo, yee lé ke ’ko: Maa dan anlé bélidɔwe pa lɛ wo bli gi; maa dan a gyɛ lɛ wo bli gi; yé an dan kɛlɛ lɛ wolé Bale nya, yé wo dan kɛlɛ lɛ anlé munu nya.

³⁴ Mi do kpen ’ka dan we paa lɛ é bɔluzan gi lo, yé mi do kpen ’ka dan we paa lɛ é bwe gi a fele nya léé, ’ka Gakelebale dɔɔ, lo. Naa, é sia né kiénénu ma, fɔɔ yé é bɔ mi kwakwanu ma, munu faa é dan an dɔɔ lɛ. Naa, maa dan wo ma we vo lɛ wolé weplenu ma, yé wolé wenyanénu sele ’ka dan dɔ lɛ an gi é dɛrɛ lo. Maa Gakelebale ɛ ke a fena.

³⁵ Gakelebale lé, é yiri kɛlɛ yiéyi va‐kinifɛ nya, Yé é moné valé monénénu kɛlɛ léé, ’wo béli va kini bɛ, ’Té éé wɛyi nwaan yé ’té éé wɛyi nwalenu vun wé bɛ, Yee lé a tɔ ke lai sunyanu lé Gakelebale, é we fe.

³⁶ É léma: Dé é kɛlɛ léé, bélidɔwenu ’ko nyaa an ’lɛ, ’Té Izraɛl kɛlɛle bɛngɔnɔ do nya é dan nyaa lɛ an ’lɛ yifaama zé nya.

³⁷ Gakelebale léma: Dé wo bɔalɛ léé, wo lanu dan, Dé wo bɔalɛ léé, wo tɛrɛ gane vɔnanu dan, ’Té maa dan sɔn vɔ lɛ Izraɛl bɛn faa ma, We faa lé wa kɛlɛ, a we ma. Maa Gakelebale ɛ ke a fena.

³⁸ Gakelebale léé: Ka ye, a yinu é dan bɔ lɛ yé wo dan fla ’ko pa lɛ é ziin Gakelebale tɔ bɔle we ma, é sia Ananéɛl lé dɔtafɛ ma fɔɔ yé é bɔ flagɔrɔ sun ’léé ma.

³⁹ A glɛ é dan gié lɛ fɔɔ yé é bɔ Garɛb gɔpané ma, yé ’bɛ zuo é dan plin lɛ Goat san bɛ do la.

⁴⁰ Gɔ worona lé ke fɛ galenu valé kyɛyee vulina, ’bɛ faa koo, féinu faa lé woo goo fɔɔ yé wo bɔ Sédrɔn ’yiyoro ma, fɔɔ yé é bɔ flagɔrɔ ’léé lé wa laama wisoonu, a ma, yirinwanazia, ’bɛ faa koo, wo dan fɛkonanu kɛlɛ lɛ Gakelebale zé nya, yé wo ’ka dan wo sɛrɛ lɛ lo; wo ’ka dan wo guru zana lɛ a gi lo.