Jérémi 3 - Kazambale lé Sebe Sauunu 1979

Izraɛl a bélé gɔnégini le zo

¹ Gakelebale léé: Dé mi do é na bɔra, yé é si a va yé é kɛlɛ gɔné bɛ na nya, yee mi ’ko, éé bɔa le ’ko sile lɛ é ziin é na nyaa? Yee we ’ko, é ’ka dan tɛrɛ boen tiri dɔ lɛ loo? Yé ’kaa, ka go bale kiɛre zuo bélé gɔnégini le éé goo é bwɛnu zuo fɛan zo, a zo, yé ka dan an va é ziin? Maa Gakelebale ɛ ke a fena.

² ’Ka yara nwa fɛna lorunu na yé ’ka nagini. Fɛ kyɛnna lé ka ’ka go lɛ bélé gɔnégini le zo loo? Ka a é dɔle zinu ’léé bélé Arabunu zo nyéné saa lé fɛna, yé ka tɛrɛ tiri dɔ kalé gɔnéginiwe valé kalé wenyané kɛlɛle nya.

³ Amalé lɛɛné ’ka da lɛ lo yé lɛɛné vininnu vuru ka ma. Yé ka kɛlɛ yuɛmaplɛplɛ?-?zannu nya bélé gɔnégini le zo, yé yara ’ka ka gyɛ lɛ lo.

⁴ Yé sin, ka a siaana léé: Ko ti, i kɛlɛ kolé pɛniɛla béé nya. A zoan ka ke a fena loo?

⁵ A bli é dan vo lɛ flina yifaamaa? A bli ’ka daan flile ma monomono loo? Ka ’bɛ fe, yé ka vo kalé weple kɛlɛna duowo.

É a lé Izraɛl valé Judanu ’wo bli nɔla

⁶ Minwiinzan blɛn Jozias bléyi va Gakelebale lé an lɛ léé: Izraɛlnu ’ka plaan an wuo lo. I a yé loo? Wo go gɔ torole faa nwiin, yé wo go yili drɔɔdrɔɔnu faa wuo, yé ’bɛna lé wo go bale bɛnu zuo bélé gɔnégini le zo.

⁷ Yé maa léé: We ’konu faa kɛlɛle zuo, Izraɛl é dan da lɛ an va. Naa, é ’ka da lɛ lo. Yé a buru Juda lé ke gilawe kɛlɛzan nya, é ana ye.

⁸ Izraɛl lé é ’ka vo an wuo lo, maa a bɔra élé gɔnéginile faa lé we ma, yé maa a bɔrasɛbɛ nɔ a lɛ. Naa, duowo, maa a ye léé, a buru Juda lé éé gilawe kɛla, é ’ka kana lɛ monomono lo, naa, é go gɔné gini lɛ é ziin bélé Izraɛl zé zo.

⁹ Alé pɛnpɛnné gyɛlenu lé wo tɔ bɔ fɛfaana, wo nya lé é tɛrɛ tiri dɔ; é gɔlɛ valé yili kɛlɛ é zana nya.

¹⁰ Naa duowo, a buru Juda lé éé we kɛla gi la, é ’ka da lɛ an va é bli faa nya lo. É a kɛlɛ dabli nya. Maa Gakelebale ɛ ke a fena.

¹¹ Gakelebale lé an lɛ léé: Izraɛl lé é ’ka plaan an wuo lo, dé maa alé we dan gilawe kɛlɛzan Juda ma, ’té we ’ka Izraɛl nwiin lo.

¹² ’I go, ’i siaa dére ’konu nya yirinwana bɛbolazia, yé bé fe léma: Gakelebale léma: Izraɛl, bii lé i ’ka plaan an wuo lo, ’i da i pa gi. Maa ’ka dan yara nwɛɛn?-?nwɛɛnné gyɛ lɛ ka ta lo. Naa, maa a nyanaizénzan nya, an bli ’ka dan vo lɛ flina yifaama lo. Maa Gakelebale ɛ ke a fena.

¹³ I kɛlɛwe ple sele ’é dɔ i gi ma. A sele ’é dɔ i gi léé, i ’ka pla lɛ Gakelebale, ilé Bale wuo lo, yé i goo ’ko, yé i goo ’ko, bale bɛnu va yili drɔɔdrɔɔnu faa wuo, yé i ’ka i tɔné dɔ lɛ an dére lɛ lo. Maa Gakelebale ɛ ke a fena.

¹⁴ Gakelebale léma: ’Kaa nwamimazannu, ’ka da ka pa gi. Naa, maa a kazan nya. Maa dan mi do do si lɛ fla do do ta, yé an dan mi fié fié si lɛ ka nyanale gi do do yé maa da ka nya é ziin Siɔn.

¹⁵ Maa dan ka tabinzannu nɔ lɛ ka lɛ an bligiwe yɛrama, yé wo dan ka pa lɛ gikinile valé wedɔɔle nya.

¹⁶ Gakelebale léma: Dé ka fan yé ka kɛlɛ di tɛrɛ ’ko la, ’bɛ yinu la, wo ’ka dan Gakelebale lé gipawe pagikɛsu lé we fe lɛ é dɛrɛ lo; a we ’ka dan dɔ lɛ mi ’wuo gi é dɛrɛ lo; a sele ’ka dan dɔ lɛ mi gi é ziin lo, yé a sile ana ’ka dan dɔ lɛ mi gi é dɛrɛ lo, yé wo ’ka dan a bɛ kɛlɛ lɛ é dɛrɛ lo.

¹⁷ ’Be bléyi va, wo dan Jérusalɛm laa lɛ, Gakelebale lé webleblin; bɛngɔnɔ faa é dan zén lɛ ékeva Jérusalɛm Gakelebale tɔ nya yé wo ’ka dan tawo lɛ ’wolé blibɔmawe naané zuo é dɛrɛ lo.

Bale lé munu lé miyili banle

¹⁸ ’Bɛ yinu la, Juda munu valé Izraɛl munu wo dan tawo lɛ ékeva, Yé wo dan si lɛ ékeva yirinwana bɛbolazia tɛrɛ la, Yé wo da tɛrɛ lé maa ana nɔ wo tinu lɛ, ana.

¹⁹ Maa léé: Maa kɛla kaa yé maa i pa anlé nénu va, Yé an tɛrɛ nyɔnɔzan nɔ i lɛ, Tɔnɔfɛ lé é ke é nɔnɔmi é mini bɛn tɛrɛnu faa ta, yé maa a nɔ i lɛɛ? Maa léé, ka dan an laa lɛ, ka ti, Yé ka ’ka dan diéra lɛ an zuo lilo.

²⁰ Naa, fɛan zo lé le do ’ka voo é sɔlɛzan va lo, A zo lé Izraɛl ’ka vo lɛ an va lo. Maa Gakelebale ɛ ke a fena.

²¹ Munu dére a wena fɛna lorunu na, Izraɛlnu lé wuvɔdére valé wolé dunuvɔmadére lé; Naa, wo ’wolé zi sɛrɛ, Yé Gakelebale, wolé Bale sele saan wo gi.

²² ’Kaa nwamimazannu, ’ka da ka pa gi. Maa dan ka ma we vo lɛ ka yuɛgiblanle ma. Yé wa zi pa léé: Ko lo, ko da i va. Naa, i a Gakelebale kolé Bale nya.

²³ Iin, vunwelenu lé woo sié gɔpanénu valé gɔnu nwiin, wa vié nya. Iin, Gakelebale kolé Bale ɛ ke Izraɛl munu siéwegizan nya.

²⁴ Ko kiéné la bléyi va, miyilinu ko tinu panyanama tɔnɔ ble; wolé ’blanu koo, wolé dirinu koo, wo benu valé wo lunu koo, wo wo ble.

²⁵ Kolé yaragyɛwe kɛlɛ bélé yialafɛ zo, yé nyɔnmɛ wɔra ko ta bélé sɔ zo. Naa, ko wenyané kɛlɛ Gakelebale kolé Bale ma, ko koo, ko tinu koo, é sia ko kiéné la bléyi va fɔɔ kyɔ. Yé ko ’ka ko tɔné dɔ lɛ Gakelebale kolé Bale lɛ lo.