Jérémi 29 - Kazambale lé Sebe Sauunu 1979

Jérémi sɛbɛ pa Babilɔn luugimunu lɛ zia

¹ Munu faa lé Nébukanɛsaa wo si Jérusalɛm yé é go wo nya luu gi Babilɔn, balelayezan Jérémi lɛtrɛ do gyɛ Jérusalɛm yé é a pa wo lɛ zia; mi segelenu koo, Balebanzannu koo, mi bɛnu koo, woo lé.

² Minwiinzan blɛn Jékonia koo, a na koo, mi blalenu koo, Juda tɛrɛ la valé Jérusalɛm munu nwiinzannu koo, yilinyaazannu valé laklé kɛlɛzannu koo, wo sile Jérusalɛm zuo lé we ’ko bɔ.

³ Juda nwiinzan blɛn Sédésias é Safan be Éléazaa valé Ilkija be Gémaria nwunvɔ Babilɔn nwiinzan Nébukanɛsaa va yé Jérémi yee lɛtrɛ bɛ pa wo lee. Wean wa gyɛ yee sɛbɛ gi, yee lé ke ’ko:

⁴ Lai sunyanu lé Gakelebale, Izraɛl lé Bale léma: ’Kaa faa lé maa ka si Jérusalɛm yé an go ka nya luu gi Babilɔn, maa lé ka lɛ léma:

⁵ ’Ka kɔnnu dɔ yé ’ka nyana wo gi. ’Ka féinu pa yé ’ka ana fɛ ble.

⁶ ’Ka le si yé ’ka nénu yaa; ’ka le pa ka benu lee, yé ’ka lunu nɔ bo lɛ léé, ’bɛnu é ziin, ’bɛnu é nénu yaa, yé fɛ lé ka ke ana bɛ, yé ka fan ana, té ka ke é so a ’léé lo.

⁷ Fla lé maa go ka nya luu gi ana bɛ, ’ka kwa kuli léé, fla ’ko lé we ’é kɛlɛ é zin, naa, fla ’ko ta lé kalé ginanale éé sié, amalé ka bazoro a tɔ ma.

⁸ Naa, lai sunyanu lé Gakelebale, Izraɛl lé Bale léma: Kalé balelayezannu lé wo ke ka va koo, kalé ’monédɔzannu koo, té ka zi nɔ wo lɛ léé, wo dabli kɛlɛ ka lɛ lo, yé nyɛgyɛzannu lé woo nyɛ gya kalé we nya, té ka tɔné dɔ wo lɛ lo.

⁹ Naa, woo balelawe fé ka lɛ vié nya an tɔ gi. Maa ’ka wo nwunvɔ lɛ monomono lo. Maa Gakelebale ɛ ke a fena.

¹⁰ Naa, we lé Gakelebale a fe, yee lé ke ’kɔ: Dé Babilɔn plale ka nwiin lɛɛ yɔ yaa wɔlɛ vu lɛ sɔɔ tɔɔn, ka sele é dan dɔ lɛ an gi, yé dére zima lé maa a fe kazé nya bɛ, maa dan a lɛ sɔɔ lɛ yé an da ka nya é ziin fɛkona.

¹¹ Naa, Gakelebale léma: We lé ke an gi kazé nya, maa a dɔɔ. Ka vole drɔɔ we lé, we tɔntɔn kaan lo, léé, tɛlɛ tɛlama yé ka vo ana, yé ka bli é vo we lɛ.

¹² Ka dan we laa lɛ an lee yé ka dan go lɛ; ka dan bazoro lɛ an lɛ yé maa dan ka dére ’ma lɛ.

¹³ Ka dan an nagini lɛ, yé ka dan an ye lɛ, ’té dé ka an nagini ka bli faa nya.

¹⁴ Gakelebale léé: Maa ’ka dan an yele yi ga lɛ ka lee lo, yé maa dan da lɛ kalé luugimunu nya é ziin; maa dan ka si lɛ bɛnnu faa va, fɛna faa lé maa ka bin yé ka go ana, maa dan ka si lɛ wona yé an da ka nya é ziin, fɛana lé maa ka si yé an go ka nya luu gi, ana.

¹⁵ Naa, ka a fena léé: Bale ’wozé balelayezannu nwa ’wo lɛ Babilɔn.

¹⁶ Minwiinzan blɛn lé éé nyanaan David lé webleblin ta koo, munu faa lé woo nyanaan fla ’ko la koo, ka bwenu lé wo ’ka go lɛ ka va luu gi lo, wo koo, Gakelebale we fe wo ma yé é léma:

¹⁷ Ka ye, gwɔun koo, lɔrɔ koo, migyɛgyɛ koo, maa dan wo pa lɛ wo lɛ zia yé munu ’ko é dan kɛlɛ lɛ é naané bélé bɔrɔyiliporonu lé wa naané é baba yé mi ’ka bɔa wo blele lɛ lo, wo zo.

¹⁸ Maa dan wo zuo bin lɛ gwɔun koo, lɔrɔ koo, migyɛgyɛ koo, wo nya, yé maa dan wo kɛlɛ lɛ kanaleefɛ nya tɛrɛ la bɛnnu faa lɛ; maa dan wo kɛlɛ lɛ balepamazannu koo, kwavɔmitazannu koo, wenanamazannu koo, serelebomafɛnu koo, wo nya, bɛnnu faa lé maa wo pa zia wo va bɛ, wo lɛ.

¹⁹ Wo ’ka ’wo tɔné dɔ lɛ an dére lɛ lo, yé an wuozannu lé wo ke balelayezannu nya, ’té maa wo paan wo lɛ zia yifaama bɛ, wo ’ka ’wo tɔné dɔ lɛ ’bɛnu lɛ lo, amalé maa dan a kɛlɛ lɛ a zo. Maa Gakelebale ɛ ke a fena.

²⁰ Naa, ’kaa luugimunu faa lé maa ka nwa Jérusalɛm yé an ka pa zia Babilɔn tɛrɛ la, ’ka tɔné dɔ Gakelebale dére lɛ.

²¹ Kolaja be Akab valé Maaséja be Sédésias lé woo balelawe fé ka lɛ vié nya Bale tɔ gi, lai sunyanu lé Gakelebale, Izraɛl lé Bale we fe wo ma yé é léma: Ka ye, maa wo pa Babilɔn nwiinzan blɛn Nébukanɛsaa lee, yé é dan wo gyɛ lɛ ka yuɛ va.

²² Wo dan bale pa lɛ mi ma wo tɔ nya Judanu faa lé wo ke luu gi Babilɔn, wo va. Wo dan a fe lɛ léé: Fɛan zo lé Babilɔn nwiinzan blɛn Sédésias valé Akab vɔ kyɛ va é yuɛma, Gakelebale ’é izé kɛlɛ a zo ma.

²³ Wo tɛrɛgyɛwe kɛlɛ Izraɛl tɛrɛ la; wo ’wo bɔlu bɛ na gini, yé wo vié wo an tɔ gi, dɔlé ’té maa ’ka wo béli dɔ lɛ ’bɛ nya lo, amalé we ’konu é dan bɔ lɛ. Maa a gi dɔɔ yé maa a anayezan nya. Maa Gakelebale ɛ ke a fena.

Sémaéja sɛbɛ pa zia

²⁴ Bé fe Nésélamizan Sémaéja lɛ léma:

²⁵ Lai sunyanu lé Gakelebale, Izraɛl lé Bale léma: I lɛtrɛ pa zia ibo tɔ gi Jérusalɛm munu faa koo, Balebanzan Maaséja be Sofoni koo, Balebanzannu faa koo, wo lɛ zia; bé gyɛ yee sɛbɛ gi léé:

²⁶ Gakelebale i dɔ Balebanzan nya Balebanzan Jéojada pa gi léé, i munu dɔ Gakelebale lé kɔ taginile we ma, léé, ’wuosɛrɛzannu faa lé wo ke a fena léé, ’wa balelayezannu nya, ’wo wo kun, yé ’i wo vɔ bokɔn gi yé ’i foliɛwɔlɛ vɔ wo ma.

²⁷ Yé sin, Anatɔt zan Jérémi lé éé balelawe fé ka méléna,

²⁸ ’té éé mi paan ka lɛ zia Babilɔn a fele ka lɛ we ma léé, ka dan mɔn lɛ luu gi; ’ka kɔn dɔ yé ka nyana a gi, ’ka féi pa, ’ka ana fɛ ble, mɛmalé i ’ka we pla lɛ a lɛ yara tɔntɔn nya loo?

²⁹ Balebanzan Sofoni sɛbɛ ’ko ta fe balelayezan Jérémi yuɛ va.

³⁰ Yé Gakelebale we fe Jérémi lɛ yé é léma:

³¹ Bé fe luugimunu faa lɛ léé: Gakelebale we fe Nésélamizan Sémaéja ma yé é léma: Sémaéja balelawe fe ka lɛ ’té an ’ka a pa lɛ zia lo, yé ka pa alé viéwe ’ko ta,

³² amalé Gakelebale léma: Maa dan we lɛdɔ lɛ Nésélamizan Sémaéja gi, yee valé é kulunu nya; a kulu do kpen ’ka dan nyana lɛ munu ’ko va lo, yé we zin lé an dan a kɛlɛ lɛ anlé munu lɛ, wo ’ka dan ana ye lɛ lo. Naa, é nwa Gakelebale ma é dérenu nya. Maa Gakelebale ɛ ke a fena.