Jérémi 28 - Kazambale lé Sebe Sauunu 1979

Jérémi valé viébalelayezan Aanania

¹ ’Bɛ lɛɛ duo gi, Juda nwiinzan blɛn Sédésias plale mi nwiin pélisiana, a lɛɛ ziɛzan lé moné soruzan nya, Gabaɔnzan Azuu be Aanania lé ke balelayezan nya, é we fe an lɛ Gakelebale lé kɔn gi, Balebanmunu valé munu faa yuɛ va yé é léma:

² Lai sunyanu lé Gakelebale, Izraɛl lé Bale léma: Maa Babilɔn nwiinzan blɛn lé luubale kini.

³ É vo lɛɛ fié yé Gakelebale lé kɔn gi nyanamapafɛnu faa lé Babilɔn nwiinzan Nébukanɛsaa a si fɛkona yé é go wo nya Babilɔn, maa dan da lɛ wo nya wo pa gi fɛkona.

⁴ Yé maa dan da lɛ Juda nwiinzan blɛn Jojakim be Jékonia nya fɛkona, yee valé Juda munu faa lé wo go wo nya luu gi Babilɔn, wo nya, naa, luubale lé Babilɔn nwiinzan a vɔ wo bɔrɔ ma, maa dan a kini lɛ. A zo lé Gakelebale a fe.

⁵ Balelayezan Jérémi a zi pa balelayezan Aanania lɛ, Balebanmunu valé munu faa lé wo ke é dɔle Gakelebale lé kɔn gi, wo yuɛ va.

⁶ Balelayezan Jérémi léma: Amɛɛn. Gakelebale a kɛlɛ ’bɛ zo ma. Dérenu lé bé fe balelawefele nya bɛ, Gakelebale ’é a lɛ sɔɔ ma. Gakelebale lé kcn gi nyanamapafɛnu valé luugimunu faa lé wo ke Babilɔn bɛ, ’é da wo nya é ziin fɛkona ma.

⁷ Naa, dére lé maa a fena ka valé munu faa tɔné gi ’ko, ’ka ’ma ma:

⁸ Balelayezannu lé wo bɔra bii valé maa ’lɛ, kaa tranu bléyi va, wo balelawe fe tɛrɛ plɛplɛnu valé bɛngɔnɔ blɛnnu ma léé, gulidanle koo, we tɔntɔn valé migyɛgyɛ koo, wo dan bɔ lɛ wo ma;

⁹ naa, dé balelayezan do balelawe fe léé, wo dan vo lɛ drɔɔ, é wean fe bɛ, a lɛsɔɔle nya lé wo dan a gi dɔɔ lɛ léé, Gakelebale ɛ pa zia webozen nya.

¹⁰ Yé balelayezan Aanania luubale kini balelayezan Jérémi bɔrɔ ma.

¹¹ Yé Aanania we fe munu faa yuɛ va léé: Gakelebale léma: É vo lɛɛ fié yé luubale lé Babilɔn nwiinzan blɛn Nébukanɛsaa a vɔ bɛnnu faa bɔrɔ ma, maa dan a kini lɛ. Yé balelayezan Jérémi go.

¹² Balelayezan Aanania lé luubale kinile balelayezan Jérémi bɔrɔ ma zuo, Gakelebale we fe Jérémi lɛ yé é léma:

¹³ ’I go, bé fe Aanania lɛ léma: Gakelebale léma: I luubale kini bɛ, wo dan foliɛwɔlɛ bale vɔ lɛ a pa gi.

¹⁴ Naa, lai sunyanu lé Gakelebale, Izraɛl lé Bale léma: Maa foliɛwɔlɛ vɔ bɛn ’konu faa bɔrɔ ma, wo plale Babilɔn nwiinzan blɛn Nébukanɛsaa wuo we gi; yé wo dan pla lɛ a wuo webozen nya; yé an bwigiwinu nɔ a lɛ é ziin.

¹⁵ Yé balelayezan Jérémi lé balelayezan Aanania lɛ léé: Aanania, ’i tɔné dɔ. Gakelebale ’ka i pa lɛ zia monomono lo. Yé munu pa ilé viéwe fele ’ko ta.

¹⁶ Amalé Gakelebale léma: Bé ye, maa i sié tɛrɛ ’ko la. I dan ga lɛ lɛɛ ’ko gi. Naa, i dérenu a nwa Bale ma dérenu nya.

¹⁷ Yé balelayezan Aanania ga ’bɛ lɛɛ ’ko lé moné sɔrafiézan nya.