Jérémi 27 - Kazambale lé Sebe Sauunu 1979

Jérémi luubalenu vɔ ’é bɔrɔ ma

¹ Juda munu nwiinzan blɛn Jozias be Jojakim plale munu nwiin pélisia bléyi va, Gakelebale we fe Jérémi lɛ léma:

² Gakelebale lé an lɛ léma: ’I luubalenu kɛlɛ, yé ’i wo vɔ i bɔrɔ ma.

³ Édom koo, Moab koo, Amɔn koo, Tii koo, Sidɔn koo, i yee luubalenu pa wo nwiinzannu blɛn lɛ zia. Munu lé wo ’bɛnu nwunvɔ turu Jérusalɛm, Juda nwiinzan blɛn Sédésias va, bé nɔ wo lɛ yé wo goan wozannu lɛ.

⁴ Yé i we pa wo ’léé, léé, ’wa fe wozannu lɛ léma: Lai sunyanu lé Gakelebale, Izraɛl lé Bale léma: ’Ka fe kazannu lɛ léma:

⁵ Maa ɛ tɛrɛ kɛlɛ. Tɛrɛlamunu koo, tɛrɛlawinu koo, an wo kɛlɛ anlé plɛplɛ blɛn valé an bɛ plɛplɛ nya, yé dé mian é sɔ an lɛ léé, maa tɛrɛ nɔ a lɛ, a lɛ lé maa a no.

⁶ Sin, an tɛrɛnu faa ’ko bɛ pa an wuozan Babilɔn nwiinzan blɛn Nébukanɛsaa lee, yé maa bwigiwinu bɛ pa a lee é ziin, léé, wo pla a wuo.

⁷ Bɛnnu faa é dan pla lɛ a wuo, yee koo, a be koo, a néné koo, wo dan pla lɛ wo wuo fɔɔ yé wozé bléyi é nyaa, ’bɛ zuo yee Babilɔn tɛrɛ é dan pla lɛ bɛn plɛplɛ bɛnu valé minwiinzan blɛn bɛnu wuo.

⁸ Dé bɛn do léé, dé bɛntɛrɛ do léé, dé é ’ka pla lɛ yee Babilɔn nwiinzan Nébukanɛsaa wuo lo, yé dé é ’ka a nyi si lɛ léé, é kɛlɛ alé luu nya lo, maa dan we lɛdɔ lɛ ’bɛ bɛn ’ko gi, gwɔun koo, lɔrɔ koo, migyɛgyɛ koo, wo nya fɔɔ yé maa a kulu ga yee Nébukanɛsaa bɛ nya. Maa Gakelebale ɛ ke a fena.

⁹ Yé kalé balelayezannu koo, kalé ’monédɔzannu koo, kalé nyɛgyɛzannu koo, kalé monénénu va ’monédɔzannu koo, kalé yokɛlɛzannu koo, we lé wa fena ka lɛ léé, ka ’ka dan pla lɛ Babilɔn nwiinzan blɛn wuo lo, té ka tɔné dɔ wo lɛ lo.

¹⁰ Naa, woo balelawe fé ka lɛ vié nya, léé, ka si kalé tɛrɛ la baa yé maa ka bin yé ka zamaga wo.

¹¹ Naa, bɛn lé é kɛlɛ Babilɔn nwiinzan blɛn lé luu nya yé é a plale é nwiin nyi si, maa dan ’bɛzan vo lɛ alé tɛrɛ la, féi pale valé nyanale ana we ma. Maa Gakelebale ɛ ke a fena.

¹² Maa yee we duo fe Juda nwiinzan blɛn Sédésias lɛ léé, ’i kɛlɛ Babilɔn nwiinzan blɛn lé luu nya. ’I pla yee valé alé munu wuo yé i dan vo lɛ é yuɛma.

¹³ Mɛmalé bii valé ilé munu é dan ga lɛ gwɔun koo, lɔrɔ koo, migyɛgyɛ koo, wo lee? Gakelebale léé, dé bɛn‐an ’ka pla lɛ Babilɔn nwiinzan blɛn wuo lo, é dan ga lɛ, yee kaan loo?

¹⁴ Balelayezannu lé wa fé ka lɛ léé: Ka ’ka dan kɛlɛ lɛ Babilɔn nwiinzan blɛn wuozannu nya monomono lo, té ka tɔné dɔ wo lɛ lo. Naa, woo balelawe fé ka lɛ vié nya.

¹⁵ Maa ’ka wo nwunvɔ lɛ monomono lo, yé woo balelawe fé ka lɛ vié nya an tɔ gi, léé, maa ka bin yé ka ga zama, ka valé balelayezannu lé woo balelawe fé ka lɛ bɛ, wo nya. Maa Gakelebale ɛ ke a fena.

¹⁶ Maa lé Balebanzannu valé munu faa ’ko lɛ léé: Gakelebale léma: Kalé balelayezannu lé woo balelawe fé ka lɛ léé: É vo sɛ yé wo dan Gakelebale lé kɔn gi nyanamapafɛnu si lɛ Babilɔn yé wo da wo nya é ziin, té ka tɔné dɔ wo lɛ lo. Naa, wa balelawe fena ka lɛ vié nya.

¹⁷ Té ka tɔné dɔ wo lɛ lo; ’ka ’wuo dɔ Babilɔn nwiinzan blɛn wuo yé ka dan vo lɛ é yuɛma. Mɛmalé é a lé fla ’ko é kɛlɛ é ’bin nyaa?

¹⁸ Dé wa balelayezannu nya webozen nya, yé dé Gakelebale dére a wo ’léé webozen nya, ’wo muun pa lai sunyanu lé Gakelebale la léé, nyanamapafɛnu lé woo voo Gakelebale lé kɔn valé Juda nwiinzan blɛn lé kɔn gi valé Jérusalɛm, té ’wo go wo nya Babilɔn lo.

^19-20 Juda nwiinzan Jojakim be Jékonia koo, Juda valé Jérusalɛm lé mi blɛnnu koo, bléyian va lé Babilɔn nwiinzan blɛn Nébukanɛsaa wo kun Jérusalɛm yé é go wo nya luu gi Babilɔn, é Gakelebale lé kɔn gi nyanamapafɛ kenu vo é pa gi Jérusalɛm. Zénéwɛyili koo, zéné’wolikana blɛn koo, wo ganevɔgifɛnu koo, nyanamapafɛ bɛnu koo, wo ɛ vo Nébukanɛsaa pa gi Jérusalɛm yé Gakelebale wo ma we fe.

²¹ Nyanamapafɛnu lé wo vo Gakelebale lé kɔn valé Juda nwiinzan blɛn lé kɔn gi Jérusalɛm, lai sunyanu lé Gakelebale, Izraɛl lé Bale wo mawe fe léma:

²² Wo dan go lɛ wo nya Babilɔn, yé wo dan vo lɛ ’bɛna fɔɔ yé yian nya lé an dan go lɛ wo si lɛ yé maa da wo nya é ziin fɛkona, yé ’bɛ yi é bɔ. Maa Gakelebale ɛ ke a fena.