Jérémi 26 - Kazambale lé Sebe Sauunu 1979

Wo Jérémi lé we ble

¹ Juda munu nwiinzan blɛn Jozias be Jojakim plale mi nwiin pélisiana, Gakelebale léé, ’wo we ’ko fe:

² Gakelebale léma: ’I dɔ Gakelebale lé kɔn gɔrɔ gi yé munu lé wo si Juda flanu faa la yé wo dia ’wo bli la Gakelebale lé kɔn gi, dérenu faa lé maa i béli dɔ a nya, bé fe wo lɛ. Té i paa a do kpen zi lo.

³ Dé wo dan wo tɔné dɔ lɛɛ? Dé wo faa do do é dan si lɛ ’wo kɛlɛwe naanénu zuoo? Dé wa kɛlɛ, wenaané lé é a an gi léé, maa dan a bɔ lɛ wo ma wo kɛlɛwe naanénu lé we ma bɛ, maa dan an bli nɔla lɛ ’bɛ kɛlɛle ma.

⁴ Bé fe wo lɛ léma: Gakelebale léma: Anlé bélidɔwe lé maa a pla ka ’lɛ léé, ’ka a ta tawo, dé ka ’ka ka tɔné dɔ lɛ an lɛ lo,

⁵ dé ka ’ka ka tɔné dɔ lɛ anlé balelayezannu lé wo ke an wuozannu nya, ’té maa wo nwunvɔ ka va bɛ, wo lɛ lo, dɔlé ’té maa wo paan ka lɛ zia yifaama yé ka ’ka ka tɔné dɔ lɛ lo,

⁶ ’té wean maa kɛlɛ Silo lɛ, yee duo lé maa dan a kɛlɛ lɛ munu ’ko lɛ, yé maa dan fla ’ko kɛlɛ lɛ balepama fla nya tɛrɛla bɛnnu faa yuɛ gi.

⁷ Dére ’konu lé Jérémi a fe Gakelebale lé kɔn gi, Balebanzannu koo, balelayezannu koo, munu faa koo, wo wo ’ma.

⁸ We faa lé Gakelebale a pa Jérémi ’léé, léé, ’é a fe munu faa lɛ, é nyaa aan wo a faa fele nya, yé Balebanzannu koo, balelayezannu koo, munu faa koo, wa kun, yé wo léé: Ko i gya!

⁹ Mɛmalé i balelawe fe Gakelebale tɔ gi léé: Kɔn ’ko é dan kɛlɛ lɛ bélé Silo zoo? yé wo dan fla ’ko guru zana lɛ a gi, té mi do kpen ’ka dan vo lɛ ana loo? Munu faa zén ékeva Jérémi zi, Gakelebale lé kɔn gi.

¹⁰ Juda munu nwiinzannu we ’konu ’ma aan wo, wo si minwiinzan blɛn lé kɔn gi yé wo go Gakelebale lé kɔn ’léé yé wo nyana a ’léé dɛrɛ na.

¹¹ Yé Balebanzannu valé balelayezannu we fe minwiinzannu valé munu faa lɛ léé: Mi ’ko ga yara lé; é balelawe fe fla ’ko ma, azama. Kaboen a ’ma.

¹² Jérémi lé minwiinzannu faa valé munu faa lɛ léé: Wenu faa lé maa a fe munu ’ko valé fla ’ko ma, ’té ka a ’ma bɛ, Gakelebale ɛ an pa zia léé, ’maa wo fe.

¹³ Sin, ’ka ka kɛlɛwenu valé ka panyanama nɔla. ’Ka tɔné dɔ Gakelebale, kalé Bale dére lɛ. Yé wenaané lé Gakelebale a fe léé, é dan bɔ lɛ ka ma, é dan é bli nɔla lɛ a kɛlɛle ma.

¹⁴ Dé é a maa nya, maa lo; maa a ka lee. Wean ka a ye we zima valé we tegele nya, ’ka a kɛlɛ an lɛ ma.

¹⁵ Naa, é a lé ka gi dɔɔ léé, dé ka an gyɛ, ’té ka weanwiinlozan gyɛwe dɔ kabo nwiin; ka koo, fla ’ko valé a tamunu koo, ka an gyɛwe dɔ ka nwiin. Naa, webozen lé, Gakelebale an pa ka lɛ zia dére ’konu faa fele ka lɛ we ma, azama.

¹⁶ Mi segelenu valé munu faa we fe Balebanmunu valé balelayezannu lɛ léé: Mi ’ko ga yara kaan lo; naa, é we fe ko lɛ Gakelebale kolé Bale tɔ gi.

¹⁷ Yé ana mi kwakwa kenu nwa yé wo lé, munu faa lé wo ke é zénle ékeva, wo lɛ léé:

¹⁸ Juda nwiinzan Ézékia bléyi va, Morésɛt zan Misé balelawe fe Juda munu faa lɛ léé: Lai sunyanu lé Gakelebale léma: Wo dan Siɔn fun‐an lɛ bélé bwi zo, Jérusalɛm é dan kɛlɛ lɛ é ’bin nya, Yé gɔ blɛn lé wo Bale lé kɔn dɔ a nwiin bɛ, pɔrɔ é dan kɛlɛ lɛ ana.

¹⁹ Juda munu nwiinzan blɛn Ézékia valé Juda munu faa, wo Misé gyɛɛ? Ézékia ’ka kana lɛ Gakelebale lee loo? É ’ka zanté vɔ lɛ Gakelebale lɛ loo? Yé wenaané lé Gakelebale a fe léé, é dan bɔ lɛ wo ma, é bli si a kɛlɛle lɛ. Yé kaa, kaa a a va léé, kaa ’bɛ zoɛ weple blɛn dɔ kaa nwiin?

²⁰ Kiijat‐Jéarim zan do ana, a tɔ lé Sémaéja be Uri. Yee é ziin, é balelawe fe Gakelebale tɔ gi. Wenu lé Jérémi balelawe fe wo nya, yee wenu duo lé é a fe balelawefele nya fla ’ko valé tɛrɛ ’ko ma.

²¹ Minwiinzan blɛn Jojakim koo, a va nyanazannu koo, ana mi segelenu faa koo, wo a dérenu ’ma, yé minwiinzan blɛn vo kwa kulina léé, ’é a gya. Wa fe Uri lɛ, yé é kana. É vɔ fli gi yé é go Éjipiti tɛrɛ la.

²² Minwiinzan blɛn Jojakim munu nwunvɔ Éjipiti tɛrɛ la, Akabɔɔ be Elnatan valé a va mi kenu lé.

²³ Yé wo Uri si Éjipiti tɛrɛ la, yé wo da a nya minwiinzan blɛn Jojakim va. ’Bɛ a gyɛ gwɔun nya, yé é a gale vuli mipana.

²⁴ Naa, Safan be Asikam bɔ Jérémi va, yé é a ta béli dɔ léé, té wa pa munu lee, wolé a gyɛle we ma lo.