Jérémi 25 - Kazambale lé Sebe Sauunu 1979

Bale bɛnnu lé we ble

¹ Juda nwiinzan blɛn Jozias be Jojakim plale munu nwiin lɛɛ ziɛnzan nya, yee lé ke Babilɔn nwiinzan blɛn Nébukanɛsaa lɛɛ vininzan nya, Gakelebale we fe Jérémi lɛ Juda munu lé we ma.

² Yé Jérémi dére ’ko fe Judamunu faa valé Jérusalɛm munu faa lɛ, yé é léma:

³ A péli sia Amon be Jozias plale mi nwiin lɛɛ vu ta yaazan nya fɔɔ kyɔ, an Gakelebale dére fe ka lɛ, a lɛɛ yɔ do wɔlɛ yaa lo. Maa a fe ka lɛ, maa a fe ka lɛoo, yé ka ’ka a ’ma lɛ an lɛ lo.

⁴ Gakelebale é wuozannu balelayezannu faa nwunvɔ ka va yifaama, yé ka ’ka ka tɔné dɔ lɛ wo lɛ lo; ka ’ka wo ban lɛ ka tɔné nya lo.

⁵ Yee balelayezannu léma: ’Kaa faa do do, ’ka si ka kɛlɛwe naané valé ka kɛlɛwe nyanénu zuo, yé ka dan nyana lɛ tɛrɛ lé maa a nɔ ka valé ka tranu lɛ, a ta, ’té ’bɛ glɛ ’ka dɔa lo.

⁶ Té ka go bale bɛnu zuo, wo bɔle valé ka diale wo ’lɛ we ma lo, té ka an bli fli ka bɛ kɛlɛfɛnu nya lo, yé maa ’ka dan wenaané do kɛlɛ lɛ ka lɛ lo.

⁷ Naa, Gakelebale léma: Ka ’ka ka tɔné dɔ lɛ an lɛ lo, ka an bli fli ka bɛ kɛlɛfɛnu nya yé é nɔla ka ma we tɔntɔn nya.

⁸ Bɛwemalé lai sunyanu lé Gakelebale léma: Ka ’ka ka tɔné dɔ lɛ an dérenu lɛ monomono lo,

⁹ amalé Gakelebale léma: Munu faa lé wo ke yirinwana bɛbolazia, an dan munu nwunvɔ lɛ wo laana, léé, ’wo da. Maa dan mi nwunvɔ lɛ an wuozan Babilɔn nwiinzan blɛn Nébukanɛsaa va, yé maa dan da lɛ a nya léé, ’é nwa tɛrɛ ’ko koo, a tamunu koo, wo zi bɛnnu faa koo, wo ma, wo kulu gale we ma, yé wo wolé fla kɛlɛ é ’bin nya, wenanamafɛ nya, yé é dan vo lɛ é pla lɛɛfaama.

¹⁰ Ginana siaalenu koo, ginanale baba lé siaale koo, ledɛrɛsizannu valé bodɛrɛsizannu lé lɛrɛvɔle koo, ’woli vun wele valé kyɛbɔ san koo, maa dan wo yi ga lɛ wo méléna.

¹¹ Tɛrɛ ’ko faa é dan vo lɛ é pla, bwi gi nya; yé bɛnnu ’ko é dan pla lɛ Babilɔn nwiinzan blɛn wuo, lɛɛ yɔ yaa wɔlɛ vu.

¹² Naa, lɛɛ yɔ yaa wɔlɛ vu ’konu nyaale zuo, maa dan we lɛdɔ lɛ Babilɔn nwiinzan blɛn valé bɛn ’ko gi, wolé weplenu lé we ma. Maa dan we lɛdɔ lɛ Kaldé tɛrɛ la munu gi, yé maa dan wo sɛrɛ lɛ lɛɛ faa zé nya. Maa Gakelebale ɛ ke a fena.

¹³ We faa lé maa a fe tɛrɛ ’ko ma koo, we faa lé ke é gyɛle sɛbɛ ’ko gi koo, we faa lé Jérémi a fe balelawefele nya bɛnnu ’ko ma koo, maa dan a bɔ lɛ tɛrɛ ’ko ma.

¹⁴ Naa, Kaldé munu é ziin, wo dan kɛlɛ lɛ bɛn plɛplɛnu valé minwiinzan blɛnnu lé luunu nya, yé maa dan wozé lɛgi pa lɛ wo kɛlɛwe valé wo bɛ kɛlɛfɛnu yɛrama.

Bale bɛnnu zé we ble

¹⁵ Naa, Gakelebale Izraɛl lé Bale we fe an lɛ yé é léma: Kana lé é ke é fanle anlé bliflile nya bélé dɔrɔ zo, bé si an lee, yé bɛnnu faa lé maa i nwunvɔ wo va, bé nɔ wo lɛ ’wa mini.

¹⁶ Wo dan a mini lɛ yé wo dan vɔ lɛ danké danké bélé gwegyɛzan zo. Guli lé é dan nwa lɛ wo ma, dé wa ye, é dan vɔ lɛ wo ’wuo gi gwe nya.

¹⁷ Yé an kana si Gakelebale lee, yé bɛnnu faa lé Gakelebale an nwunvɔ wo va, maa a nɔ wo lɛ yé wa mini.

¹⁸ Jérusalɛm koo, Juda flanu koo, a nwiinzan blɛnnu koo, alé mi segelenu koo, maa a nɔ wo lɛ léé, ’wo kɛlɛ é ’bin nya; ana ’é vo é pla yé ’wo we nana a ma yé ’wo bale pa a ma, fɛan zo lé ka a yé kyɔ, a zo.

¹⁹ Wo faa lé maa kana ’ko nɔ wo lɛ yé wo ’yi mini a gi, wo lé ke ’ko: Éjipiti tɛrɛ nwiinzan blɛn Faraɔn, a wuozannu, alé mi segelenu, alé munu faa;

²⁰ Arabi munu faa, Usi tɛrɛ nwiinzan blɛnnu faa, Filisiti tɛrɛ nwiinzan blɛnnu faa, Azkalɔn, Gaza, Ékrɔn, wooan wo vo Azdɔd zé nya;

²¹ Édom, Moab, Amɔn munu;

²² Tii nwiinzan blɛnnu faa, Sidɔn nwiinzan blɛnnu faa, wɛyiworona tɛrɛ nwiinzan blɛnnu;

²³ Dédan, Téma, Buz, munu faa lé woo puomagun soro boo,

²⁴ Arabi munu nwiinzannu faa, Arabunu nwiinzan blɛnnu faa lé woo nyanaan nyéné saa lé fɛna;

²⁵ Zimri nwiinzan blɛnnu faa, Élam nwiinzan blɛnnu faa, Médi nwiinzan blɛnnu faa,

²⁶ yirinwana bɛyilazia nwiinzannu faa, wo lé wo ke é pu valé wo lé wo ke baa, wo faa lé, bɛnnu faa lé wo ke tɛrɛ yuɛ la; wo lé maa kana nɔ wo lɛ yé wo ’yi mini a gi, wo lé ke bɛ, yé Sésak nwiinzan blɛn, ’bɛ é dan a mini lɛ wo zuo.

²⁷ Bé fe wo lɛ léma: Lai sunyanu lé Gakelebale, Izraɛl lé Bale léma: ’Ka a mini, yé ’é ka gyɛ yé ka féé a nya, yé ’ka dia, té ka nwa é ziin lo, guli lé é dan nwa lɛ ka ma, a yele we ma.

²⁸ Yé dé wa fe léé, kana lé é ke i lee, ko ’ka a sina lo, bé fe wo lɛ léma: Lai sunyanu lé Gakelebale léma: ’Ka si, ’ka mini.

²⁹ Naa, ka ye, fla lé wo an tɔ laa ana, ana lé maa kun wenaané kɛlɛle ma, yé ’kaa, maa ’ka dan we lɛdɔ lɛ ka gi loo? We lɛdɔle ka gi ’ka dan vuru lɛ ka ma lo. Naa, maa dan tɛrɛlamunu faa gyɛ lɛ gwɔun nya. Maa, lai sunyanu lé Gakelebale ɛ ke a fena.

³⁰ Yé bii Jérémi, i dan we ’konu faa fe lɛ wo lɛ balelawefele nya; bé fe wo lɛ léma: Gakelebale é dan siaa lɛ la gi plɛplɛ, É dan siaa lɛ é nyanana sauun na, yé a dére zuogi é go wele nya; É dan siaa lɛ plɛplɛ é nyanana ma, É dan siaa lɛ tɛrɛlamunu faa ta, Bélé munu lé woo dɔrɔ zɔn‐o wo gane nya, wo zo.

³¹ A vun wele é dan go lɛ fɔɔ tɛrɛ glɛ sina; Naa, Gakelebale a we blena bɛnnu va, Éé munu faa lé we blé, Yé éé mi nyanénu dɔa gwɔun ’lɛ. Maa Gakelebale ɛ ke a fena.

³² Lai sunyanu lé Gakelebale léma: Ka ye, we tɔntɔn é dan bɔ lɛ bɛn ma bɛn ma, yé fu plɛplɛ é dan nwa lɛ tɛrɛ glɛ sina.

³³ Munu lé Gakelebale é dan wo gyɛ lɛ, ’bɛ yi ’ko la wo galenu é dan vo lɛ é zanale fɔɔ tɛrɛ glɛ sina. Wo ’ka dan wo wuvɔ lɛ lo; wo ’ka dan wo sia lɛ lo; wo ’ka dan wo pa lɛ lo; wo dan kɛlɛ lɛ bélé winu bo zo tɛrɛ la.

³⁴ Munu pazannu, ’ka dunnu, ’ka siaa; zi gɔɔn trubɛ lɛzannu, ’ka burula kyɛyee va. Naa, ka bɔrɔboyi bɔ sin, azama. Maa dan ka ’wii lɛ yé ka dan dia lɛ bélé bɔwezan zo.

³⁵ Munu pazannu vɔzifɛ ’ka é dɛrɛ lo. Zi gɔɔn trubɛ lɛzannu siéwegifɛ ’ka é dɛrɛ lo.

³⁶ Woo munu pazannu lé siaalenu maan; woo zi gɔɔn trubɛ lɛzannu dunnulenu maan; naa, Gakelebale wolé trubɛ blena sɛrɛ tata.

³⁷ Gakelebale wo nyanana drɔɔnu sɛrɛ élé bliflile baba nya.

³⁸ É nwa é nyanana, bélé fɛan zo lé golizrané éé nwaan é yiina, a zo; naa, wolé tɛrɛ vo bwi nya, fɛsɛrɛzan wɛwɛ dɔle valé alé bliflile baba lé we ma.