Jérémi 24 - Kazambale lé Sebe Sauunu 1979

Bɔrɔporo kyɛɛ nya fié

¹ Babilɔn nwiinzan blɛn Nébukanɛsaa munu si Jérusalɛm yé é go wo nya Babilɔn; Juda nwiinzan blɛn Jojakim be Jékonia koo, Juda flazannu koo, yilinyaazannu koo, laklé kɛlɛzannu koo, woo lé. ’Bɛ zuo Gakelebale kyɛɛné fié gɔɔn an lɛ yuɛzi gi. Wa é fanle bɔrɔyiliporo nya yé wa é dɔrale Gakelebale lé kɔn ’léé.

² Bɔrɔyiliporo lé ke kyɛɛné do gi, wa é zima é baba, bélé yiliporo vininzannu zo, yé kyɛɛné koɛzan zé a é naané é baba; mi ’ka bɔa wo blele lɛ lo, wo naané lé we ma.

³ Gakelebale lé an lɛ léé: Jérémi, i mɛ fɛ yéé? Maa a zi pa léé: Bɔrɔyiliporonu lé. A zimanu a é zima é baba, yé a naanénu a é naané é baba. Wa é naané fɛan zo bɛ, mi ’ka bɔa wo blele lɛ lo, wo naané lé we ma.

⁴ Gakelebale lé an lɛ léma:

⁵ Gakelebale Izraɛlnu lé Bale léma: Fɛan zo lé bé ye léé, bɔrɔyiliporo kenu a é zima, a zo léé, Juda munu lé maa wo nwa ’ko yé wo go wo nya luu gi Kaldé tɛrɛ la, wa é zima, yé maa dan wezin kɛlɛ lɛ wo lɛ.

⁶ Maa dan an yuɛ vɔ lɛ wo ta bli zima nya, yé maa dan da lɛ wo nya tɛrɛ ’ko la é ziin; maa dan wo nyana lɛ ana, yé maa ’ka dan wo kulu ga lɛ é dɛrɛ lo. Maa dan wo nyana lɛ kli, yé maa ’ka dan wo nwa lɛ é dɛrɛ lo.

⁷ Yé bli lé é dan an dɔɔ lɛ Gakelebale nya, maa dan a vɔ lɛ wo gi. Wo dan kɛlɛ lɛ anlé munu nya, yé maa dan kɛlɛ lɛ wolé Bale nya, ’té dé wo da an va wo bli faa nya.

⁸ Gakelebale léé: Juda nwiinzan blɛn Sédésias koo, wo nwiinzannu koo, Jérusalɛm munu pɔné lé wo vo tɛrɛ ’ko la koo, munu lé woo nyanaa Éjipiti tɛrɛ la koo, maa dan wo kɛlɛ lɛ bélé bɔrɔyiliporo naanénu lé mi ’ka bɔa wo blele lɛ wo naané lé we ma lo, wo zo.

⁹ Maa dan wo kɛlɛ lɛ kanaleefɛ valé we tɔntɔn bɔamazannu nya bɛnnu faa lɛ, yé fɛfaana lé maa dan wo bin lɛ, wo dan kɛlɛ lɛ serelebomazannu nya, wo dan wolé we fe lɛ gi la, wo dan we nana lɛ wo ma, wo dan kɛlɛ lɛ balepamazannu nya.

¹⁰ Gwɔun koo, lɔrɔ koo, migyɛgyɛ koo, maa dan wo pa lɛ wo lɛ zia, fɔɔ yé wo ta é saan tɛrɛ lé maa a nɔ wo valé wo tranu lɛ, a ta.