Jérémi 23 - Kazambale lé Sebe Sauunu 1979

Bli vole é voélawe lɛ

¹ Gakelebale léma: Munu pazannu lé woo anlé trubɛnu gi sɛra, ’té woo wo kinié ékema, we tɔntɔn ’é kɛlɛ wo lɛ ma.

² Bɛwemalé, munu pazannu lé woo fɛblele no anlé munu lɛ, Gakelebale, Izraɛl lé Bale wo ma we fe léé: Ka anlé ’blanu fwila, ka wo bin; ka ’ka wo pa lɛ é zima lo, amalé maa dan we lɛdɔ lɛ ka gi kalé we lɛrɛlɛrɛ kɛlɛle we ma. Maa Gakelebale ɛ ke a fena.

³ Yé anlé ’blanu lé woo voo, ’té maa wo bin turu, tɛrɛ faa lé wo go a ta, maa dan wo si lɛ ’bɛna yé an da wo nya ékeva; ma dan da lɛ wo nya ’wo blena é ziin; wo dan né yaa lɛ yé wo fan.

⁴ Yé mi pazannu lé wo dan fɛ nɔ lɛ wo lɛ, maa dan wo dɔ lɛ. Wo ’ka dan kana lɛ é ziin lo; di ’ka dan kini lɛ wo gi é dɛrɛ lo, yé fɛ ’ka dan kele lɛ wo va mi do kpen ma lo.

⁵ Gakelebale léma: Ka ye, a yinu é dan bɔ lɛ yé maa dan David punla nɛɛ lɛ mi tegele do nya yé é dan pla lɛ munu nwiin, yé fɛ kiɛre é dan nyian wo lɛ a ma, yé é dan we tegele valé we drɔle kɛlɛ lɛ tɛrɛ ’ko la.

⁶ ’Bɛzan zé bléyi va, Juda munu é dan si lɛ we gi; Izraɛl munu é dan nyana lɛ drɔɔ ’wo nyanana. Yé ka ye, tɔ lé wo dan a laa lɛ a nya, yee lé ke ’ko: Gakelebale, kolé we tegele.

⁷ Bɛwemalé, Gakelebale léma: Ka ye, a yinu é dan bɔ lɛ yé wo ’ka dan a fe lɛ é dɛrɛ léé: Gakelebale lé é Izraɛl munu si Éjipiti tɛrɛ la yé é da wo nya, ’bɛzan a é yuɛma, lo;

⁸ naa, wo dan a fe lɛ léé: Gakelebale lé é Izraɛl munu kulunu si yirinwana bɛbolazia tɛrɛ la, yee valé tɛrɛnu faa lé é wo bin yé wo go wona, ana, yé é da wo nya, ’bɛzan a é yuɛma. Yé wo dan nyana lɛ wolé tɛrɛ la.

Jérémi balelayezannu mawe fe

⁹ Gakelebale balelayemunu mawe fe léé: An bli ’wii an gi, An wɔlɛnu faa ma éé nyɔɔn‐an; Maa a bélé nwɛgyɛzan zo, Bélé mi lé nwɛ gié a yuɛ ma, a zo, Gakelebale valé é dére sauun lé we ma.

¹⁰ Naa, tɛrɛ la fan gɔné ginile valé le ginile nya; Bale a é pale tɛrɛ ’ko la munu ma, amalé gyɛbole ke; Winu lé fɛblena lé é ke bwi la, ’bɛna lu a é gale. Munu éé vlan buruwo wenaané kɛlɛle we ma, Plɛplɛ lé é ke wo lee, é a weple saa kɛlɛfɛ nya.

¹¹ Gakelebale léma: Balelayezannu valé Balebanzannu kɛlɛwe a é vɔnle; Anbozen lé kɔn gi, an bɔ wolé we lɛrɛlɛrɛnu ma.

¹² Bɛwemalé wolé zi é dan kɛlɛ lɛ yɔrɔyɔrɔ gunuti va, Wo dan wo nyunu lɛ yé wo dan dia lɛ; Naa, maa dan we tɔntɔn bɔ lɛ wo ma, Lɛɛan nya lé maa dan we lɛdɔ lɛ wo gi, ’bɛ lɛɛ nya. Maa Gakelebale ɛ ke a fena.

¹³ Maa Samari lé balelayezannu ye gweawuogizannu nya; Woo balelawe fé Baal tɔ nya; Wo anlé munu Izraɛl saan.

¹⁴ Naa, maa an tadanmawe ye Jérusalɛm lé balelayezannu va; Wa leginizannu nya; woo tawoo viéwole nya, Woo dɔa mi plenu zuo, Léé, té wo va mi do kpen é daan élé we lɛrɛlɛrɛ kɛlɛle ma lo. Wo faa a an yuɛ gi bélé Sɔdɔm munu zo; Yé munu lé woo nyanaan Jérusalɛm, wa bélé Gɔmɔɔ munu zo an yuɛ gi.

¹⁵ Bɛwemalé lai sunyanu lé Gakelebale we fe balelayezannu ma, yé é léma: Ka ye, maa dan koinyɔnɔ nɔ lɛ wo lɛ wolé fɛblele nya, Yé maa dan lale zén lɛ wo miniyi va, Naa, Jérusalɛm lé balelayezannu lé we ma lé Bale lé zi ma wenyané fele sɔɔla tɛrɛ faa la.

¹⁶ Lai sunyanu lé Gakelebale léma: Balelayezannu lé woo balelawe fé ka lɛ, té ka tɔné dɔ wo lɛ lo. Wa boawe fena ka lɛ; we lé ke wo bli gi, yee lé wa fé ka lɛ yuɛziwe nya; we lé éé sié Gakelebale ’léé, wo ’ka ’bɛ fé ka lɛ lo.

¹⁷ Munu lé woo nyé yélié an ma, wo lé ’bɛnu lɛ léma: Gakelebale léma: Ka dan vo lɛ drɔɔ. Yé munu faa lé woo tawoo wolé blibɔmawe zuo, wo lé ’bɛnu lɛ léé: Wenaané do kpen ’ka dan bɔ lɛ ka ma lo.

¹⁸ Mi kyɛn ɛ go nyana lɛ Gakelebale lé wekyɛ zi, ’té éé a yé, ’té éé tɔné dɔa a dére lɛɛ? De ɛ tɔné dɔ a dére lɛ, ’té éé a gi maan?

¹⁹ Ka ye, Gakelebale lé fu blɛn a giéna, a wɛwɛ dɔ; é zun wo gi bélé zagele zo. É ’wii mi nyanénu ’wuo ma bélé bɔ zo.

²⁰ Gakelebale bli ’ka dan dɔrala lɛ lo, fɔɔ yé a bligiwe lɛ é sɔɔ yé a ’wuo é pla. Ka dan we ’ko gi ’ma lɛ é voéla.

²¹ Maa ’ka balelayezan ’konu nwunvɔ lɛ lo; wo go é wo; maa ’ka we pa lɛ wo ’léé lo, naa, wo balelawe fe.

²² Dé é kɛlɛ kɔɔn léé, wo nyana anlé wekyɛ zi, ’té wo an dérenu fe anlé munu lɛ, ’té wo wo si wolé tawobɛ naané zuo, ’té wo wo si wo kɛlɛwe lɛrɛlɛrɛnu zuo.

²³ Gakelebale léma: Maa ’ka Bale lé é ke é pu, a nya loo? Yé é ziin, maa ’ka Bale lé é ke baa, a nya loo?

²⁴ Gakelebale léma: Mi éé bɔalɛ yé ébo yɔɔ fɛdona, ’té maa ’ka a yé loo? Gakelebale léma: Maa ’ka la valé tɛrɛ faan loo?

²⁵ Balelayezannu lé woo balelawe fé vié nya an tɔ gi, we lé wa fe, maa ’ma. Wo léma: Maa nyɛ do gyɛ, maa nyɛ do gyɛ.

²⁶ Balelayezan ’konu, é sɔ wo lɛ léé, wo balelawe fe vié nya yifaamaa? Yé dabliwe lé é ke wo bli gi, yee lé wa fé balelawe fele nya yifaamaa?

²⁷ É dɔ wo gi léé, ’wo an tɔ saan anlé munu gi, nyɛnu lé wa gi fé wo bɔlunu lɛ bɛ, wo nya, bélé fɛan zo lé wo tranu gi san an tɔ ma Baal lé we ma, a zo.

²⁸ Balelayezan lé é nyɛ gyɛ, ’élé nyɛ gi fe ma, yé mian é an dére ’ma, ’é a gi fe yarapalale nya ma. Mɛmalé ka ’sapɛɛ valé ’sawɔlɛ vɔɔ?-?aan? Maa Gakelebale ɛ ke a fena.

²⁹ Gakelebale léma: An dére ’ka bélé kyɛ zo loo? É ’ka bélé gɔlɛ ’wii maato blɛn zo loo?

³⁰ Bɛwemalé, Gakelebale léé: Ka ye, balelayemunu lé woo vié woo wo bɔlunu dére nya, yé wo léé, maa ɛ fe, maa a wo ma.

³¹ Gakelebale léma: Ka ye, balelayezannu lé woo wobo gi we fé balelawe fele nya, maa a wo ma.

³² Gakelebale léma: Ka ye, munu lé woo vié nyɛ gi fé balelawe fele nya, ’té woo wo gi fé, ’té woo anlé munu saan wolé viéwole valé wo yara plɛplɛ nya, maa a wo ma. Maa ’ka wo pa lɛ zia lo, maa ’ka we fe lɛ wo lɛ lo, wo ’ka we zin do kpen nyian wo anlé munu ma lo. Maa Gakelebale ɛ ke a fena.

Bale lé wevɔmilɛ dére

³³ Dé munu ’ko léé, dé balelayezan do léé, dé Balebanzan do léé, dé é a laa i lee léé, mɛ wevɔmilɛ dére lé Gakelebale a fee? ’I wevɔmilɛ dére ’ko fe wo lɛ léé: Gakelebale léma: Maa dan sɔn vɔ lɛ ka ma.

³⁴ Yé dé balelayezan léé, dé Balebanzan léé, dé munu ’ko va mi do léé, dé é a fe léé, Gakelebale éé we vɔa lou mi lɛ, maa dan we lɛdɔ lɛ ’bɛzan gi, yee valé élé munu nya.

³⁵ ’Ka laa ka bɔlunu valé ka bwenu lee léé: Gakelebale a zi pa nɔɔ? Dé ’bɛ kaan lo, ’ka laa léé: Gakelebale lé nɔɔ?

³⁶ Naa, té ka fe é dɛrɛ léé, Gakelebale lé wevɔmilɛdére, lo. Naa, dé mian é a fe a zo, Bale é dan we gɔɔn lɛ ’bɛzan lɛ. Ka Bale yuɛmale, lai sunyanu lé Gakelebale, kolé Bale dére plɛn‐an.

³⁷ I dan a laa lɛ balelayezan lee léé: Gakelebale a zi pa nɔɔ? Dé ’bɛ kaan lo, bé laa léé: Gakelebale lé nɔɔ?

³⁸ Dé ka fe é ziin léé, Gakelebale lé wevɔmilɛ dére, Gakelebale léma: Ka fe léé, Gakelebale lé wevɔmilɛ dére, dɔlé ’té maa mi nwunvɔ ka lɛ a fele nya léé, té ka fe é dɛrɛ Gakelebale lé wevɔmilɛ dére, lo,

³⁹ bɛwemalé, ka ye, an gi é dan san lɛ ka ma; an dan son vɔ lɛ ka valé fla lé maa a nɔ ka valé ka tranu lɛ, a ma. An dan ka bin lɛ an yara ma baa;

⁴⁰ maa dan ka kɛlɛ lɛ serelebomazannu nya lɛɛfaama, yaragyɛwe lé a glɛ ’ka lo, maa dan a bɔ lɛ ka ma. Mi gi ’ka dan san lɛ we ’konu ma monomono lo.