Jérémi 22 - Kazambale lé Sebe Sauunu 1979

É we fe minwiinmunu gɔnɔ gi munu lɛ

¹ Gakelebale léma: ’I go Juda munu nwiinzan blɛn lé kɔn gi, yé ’i dére ’ko fe wo lɛ ’bɛna.

² Bé fe wo lɛ léma: Bii Juda munu nwiinzan blɛn lé i ke é nyanale David lé webleblin ta bɛ, ’i tɔné dɔ Bale dére lɛ. Bii koo, i wuomunu koo, ilé munu koo, ’kaa faa lé ka wɔraan kɔn ’léé ’konu na, ’ka tɔné dɔ.

³ Gakelebale léma: ’Ka we tegele valé we drɔle kɛlɛ; ’ka mi si vami lee; té ka nyané pa bɛn koo, ti valé bu galazan koo, zanagala le koo, wo ta lo; té ka glawe kɛlɛ mi lɛ lo; té ka weanwiinlozan nyɛ zana fɛkona lo.

⁴ Naa, dé ka we kɛlɛ dére ’ko yɛrama, minwiinzan blɛnnu lé woo nyanaan David lé webleblin ta, wo dan wɔra lɛ kɔn ’ko ’léénu na, ’té wo ke é vɔle goronu gi valé wisoonu ta, wo koo, wo wuozannu koo, wolé munu koo, woo lé.

⁵ Naa, dé ka ’ka ka tɔné dɔa dére ’konu lɛ lo, maa anbozen ’nyɔɔn léé, kɔn ’ko, é dan kɛlɛ lɛ é ’bin nya.

⁶ Naa, Gakelebale we fe Juda munu nwiinzan blɛn lé munu lé we ma, yé é léé: Bii a an lɛ bélé Galaad tɛrɛ zo, bélé Liban gɔ zogoroné zo. Naa, weboen lé, maa dan i kɛlɛ lɛ bélé bwi zo, fla lé mi do kpen ’ka a ta lo, a nya.

⁷ Maa a fɛsɛrɛzannu ma’lɛrɛna, léé, ’wo nwa i ma, ’té gulidanfɛnu a wo faa lee do do. Wo dan ilé sɛdrɛyili zimanu bɔi lɛ, yé wo dan wo vɔ lɛ kyɛ va.

⁸ Bɛn kiɛrenu é dan gié lɛ fla ’ko sɔnɔ, yé wo dan we fe lɛ wo ke lɛ léé: Mɛmalé Gakelebale we kɛlɛ fla blɛn ’ko lɛ ’bɛ zoo?

⁹ Yé wo dan a zi pa lɛ léé: Wo sɔn vɔ Gakelebale, wolé Bale lé gipawe ma, yé wo dia ’wo bli la bale bɛnu ’lɛ yé wo ’bɛnu bɔ, amalé.

¹⁰ Té ka wuvɔ ka nwiinzan Jozias lé é ga, a ta lo, Té ka a gyɛ bo lo; A be lé é ke gona luu gi, ’ka wuvɔ ’bɛzan ta. Naa, é ’ka dan da lɛ é pa gi é dɛrɛ lo; É ’ka dan é yaatɛrɛ ye lɛ é dɛrɛ lo.

¹¹ Juda nwiinzan blɛn Jozias be Salum lé é ke minwiinzan nya é ti pa gi bɛ, yee ɛ ke gona. Gakelebale a mawe fe léé: É ’ka dan da lɛ é pa gi é ziin lo,

¹² Naa, é dan ga lɛ tɛrɛ lé wo go a nya luu gi bɛ, ana, yé é ’ka dan tɛrɛ ’ko ye lɛ é dɛrɛ lo.

¹³ Mian é ’ka élé kɔn dɔa we tegele nya lo, Yé éé kɔnmi zinu paan weple kɛlɛle nya, ’Té é ’ka élé nyanamapazan banwo lo, ’Té é ka a gooli paan lo,

¹⁴ ’Té é a fé léé: Maa dan kɔn blɛn dɔ lɛ anzé nya, Yé maa kɔnmi zinu blɛnnu pa, Maa dan fɛnɛtinu pa lɛ a ma, An dan plafɔn kɛlɛ lɛ sɛdrɛyili nya, Yé maa dan tɔrɛ sɔɔn gié lɛ a ma, Wenaané ’é kɛlɛ ’bɛzan lɛ ma.

¹⁵ Sɛdrɛyili lɔrɔ lé i gyɛle we ma lé i ke é plale mi nwiin? I ti ’ka fɛ ble lɛ loo? É ’ka ’yi mini lɛ loo? Naa, é we tegele valé we zima kɛlɛ Yé a gi nana.

¹⁶ É nyanégyɛzannu valé yalɛgyɛzannu lé we ble, Yé a gi nana. Yee lé ke an dɔɔle nya. Yee kaan loo? Maa Gakelebale ɛ ke a fena.

¹⁷ Naa, i yuɛnu valé i bli, Woo i vɔa fɛyelɔrɔ gi, Wo i kɛlɛ weanwiinlomunu nyɛ zanazan nya; Wo i kɛlɛ va nya, wo i kɛlɛ glawe kɛlɛzan nya; yee saa ma lé i yuɛ valé i bli bɔ.

¹⁸ Amalé Gakelebale Juda munu nwiinzan blɛn Jozias be Jojakim mawe fe léé: Wo ’ka dan wuvɔ lɛ a ta A fele nya léé: Yéé! an bwe, yéé! an buru, lo. Wo ’ka dan wuvɔ lɛ a ta A fele nya léé: Yéé! anzan, fua blɛn, i gale nyɔ, lo.

¹⁹ Wo dan a pa lɛ sokofale pabɛ yɛrama. Wo dan a gana lɛ yé wa vuli Jérusalɛm gɔrɔ zi.

²⁰ ’I vɔ Liban gɔ nwiin. ’I siaa Bazan tɛrɛ ta. ’I siaa Abarim gɔ nwiin, Naa, munu faa lé i sɔ wo lɛ, wo wo guru ’wii.

²¹ Maa we fe i lɛ ilé tɔnɔfɛ yebléyi va, Yé bii léé, ’é ’ka ’é tɔné dɔa an lɛ lo. I kiéné la bléyi va fɔɔ kyɔ, i we kɛlɛ ’bɛ zo, I ’ka i tɔné dɔ lɛ an dére lɛ lo.

²² Fu é dan ka tabinzannu faa zana lɛ a gi, Yé munu lé i sɔ wo lɛ, wo dan go lɛ luu gi; ’Bɛ bléyi nya yara é dan i gyɛ lɛ, yé yaragyɛwe é dan bɔ lɛ i ma, I kɛlɛwe naanénu faa lé we ma.

²³ Bii lé i nyanaan Liban gɔ nwiin, ’Té ilé kɔn dɔa sɛdrɛyili nwiin, Dé nyanéblele bɔ i ma bléyian va, i dan dunnu lɛ; Ilé nyanéblelenu é dan kɛlɛ lɛ bélé lezan lé é ke né yaana, alé nyanéblele zo.

²⁴ Gakelebale léé: Maa a é yuɛma. Dé Juda nwiinzan blɛn Jojakim be Jékonia kɛlɛ bélé bɛmafɛ zo an bɛyi maoo, maa dan a so lɛ ’bɛna.

²⁵ Maa dan i nɔ lɛ munu lé é sɔ wo lɛ léé, wo ilé tɛrɛla nyaa, wo lɛ; munu lé i ma éé nyɔɔn‐an wo ’lɛ, wo lɛ, Babilɔn nwiinzan blɛn Nébukanɛsaa lɛ, Kaldé munu lɛ.

²⁶ Maa dan i vuli lɛ, bii valé i yaa bu nya, tɛrɛ bɛ lé wo ’ka i yaa lɛ ’bɛna lo, ana; ana lé i dan ga lɛ.

²⁷ Naa, tɛrɛ lé wa a va léé, wo nɔla ’bɛna, wo ’ka dan nɔla lɛ ’bɛna lo.

²⁸ Jékonia ’ko lé woo nyé yélié a ma, é a bɔ ple nyaa? É kɛlɛ bélé pooné go zoo? Mɛmalé wo wo vuli, yee valé é kulunu nya, tɛrɛ lé é ’ka ana dɔɔa lo, a taa?

^29-30 Gakelebale léma: Tɛrɛ, tɛrɛoo tɛrɛ! ’I tɔné dɔ Gakelebale lɛ. ’I mi ’ko tɔ gyɛ léé, alé né ’ka lo, Bélé mi lé alé tɛrɛla tɔnɔ ’ka dan kɛlɛ lɛ lo, a zo; Naa, a kulu do kpen ’ka dan kɛlɛ lɛ mi nya Yé é nyana David lé webleblin ta Yé é pla Juda munu nwiin lo.