Jérémi 21 - Kazambale lé Sebe Sauunu 1979

Jérémi Jérusalɛm kelele lɛ kini

^1-2 Minwiinzan blɛn Sédésias Malkija be Pasuu valé Balebanzan Maaséja be Sofoni nwunvɔ Jérémi va, a fele a lɛ we gi léé: ’I we laa Gakelebale lee ko lɛ; naa, Babilɔn nwiinzan blɛn Nébukanɛsaa a gulidanna ko va; dé Gakelebale é dan wezin do kɛlɛ lɛ ko lɛ yé é gyɛzorowe kɛlɛ yé é mi ’ko bin ko ma baa? É wo nwunvɔ bléyian va, Gakelebale we fe Jérémi lɛ ’bɛ bléyi va.

³ Jérémi a zi pa wo lɛ léé: ’Ka fe Sédésias lɛ léma:

⁴ Izraɛl lé Bale, Gakelebale léma: Ka ye, Babilɔn nwiinzan blɛn valé Kaldé munu lé wo ke kalé fla mabɛnna bɛ, gulidanfɛnu lé ke ka lee, ’té ka guli daan wo va a nya flagɔrɔ zi bɛ, ka dan da lɛ wo nya fla é ziin, yé maa dan wo téé lɛ ékeva fla ’ko méléna.

⁵ ’Bɛ zuo, maa ɛ dan guli dan lɛ ka va, an bɛ soile nya, an bɛ plɛplɛ nya, an bli flile nya, an wɛwɛ valé an bli tɔntɔn blɛn nya.

⁶ Maa dan fla ’ko la munu gyɛ lɛ; munu valé winu, wo dan ga lɛ bawurumagyɛ naané nya.

⁷ Gakelebale léé: ’Bɛ zuo, Juda nwiinzan blɛn Sédésias koo, a wuozannu koo, munu koo, fla ’ko la munu lé wo so bawurumagyɛ valé gwɔun valé lɔrɔ lee, ’bɛnu koo, maa dan wo pa lɛ Babilɔn nwiinzan blɛn Nébukanɛsaa lee; munu lé é sɔ ’bɛnu lɛ léé, ’wo wolé tɛrɛla nyaa, maa dan wo pa lɛ ’bɛnu lee, yé Nébukanɛsaa é dan wo gyɛ lɛ gwɔun nya, é ’ka dan wo vo lɛ lo; é ’ka dan nyanai zén lɛ wo ta lo; é ’ka dan wo ye lɛ mi nya lo.

⁸ Bé fe munu ’ko lɛ léma: Gakelebale léma: Ka ye, an vole é yuɛma zi valé ga zi pla ka ’lɛ.

⁹ Mian éé voo fla ’ko ta, é dan ga lɛ gwɔun lee, dé ’bɛ kaan lo, lɔrɔ lee; dé ’bɛ kaan lo, bawurumagyɛ lee. Naa, mian é bɔra yé é go Kaldé munu lé wo ke kalé fla mabɛnna bɛ, wo va, é dan vo lɛ é yuɛma, yé alé gulizarafɛ lé ke léé, é so ga lee.

¹⁰ Naa, Gakelebale léé: Maa an yuɛ vɔa fla ’ko ta wenaané kɛlɛle a lɛ we ma; wezin kaan lo. Maa dan a nɔ lɛ Babilɔn nwiinzan blɛn lɛ, yé é dan a kyɛ ble lɛ.

¹¹ Bé fe Juda nwiinzan lé munu lɛ léma: ’Ka tɔné dɔ Gakelebale dére lɛ.

¹² David kulunu, Gakelebale léma: ’Ka we tegele kɛlɛ bladi, yé ’ka munu si vanu lee, dé an bli é da fli bélé kyɛ zo, ’té éé blé, ’té mi do ’ka bɔa a dirile lɛ lo, ka kɛlɛwe naanénu lé we ma.

¹³ Gakelebale léma: Maa a i ma; bii fla lé i ke é pale gɔnu worona, gɔlɛgɔ blɛn lé ke fɛna pɛblɛɛ na, a ta, ka lé ka fé léé: De ɛ dan zun lɛ ko maa? De ɛ dan wɔra lɛ ko nyananaa?

¹⁴ Maa dan we lɛdɔ lɛ ka gi ka kɛlɛwe yɛrama. Maa dan kalé pɔrɔ kyɛ vɔ lɛ yé é dan a zi fɛnu faa ble lɛ. Maa Gakelebale ɛ ke a fena.