Jérémi 20 - Kazambale lé Sebe Sauunu 1979

Jérémi valé Balebanzan Pasuu kee

¹ Imɛɛ be Pasuu lé ke Balebanzan nya, ’té é ke Bale lé kɔn ma ginizannu nwiinzan nya bɛ, é Jérémi lé balelawe fele ’ko ’ma.

² Yé Pasuu balelayezan Jérémi bla, yé é a vɔ bokɔn lé é ke é dɔle Bale lé kɔn gɔrɔ ’léé lé wa laama Bɛnjamɛn, ’té é ke loru zia bɛ, a sɔnɔ, a gi.

³ Naa, ’bɛ é tu kini, Pasuu Jérémi bɔra bokɔn gi. Yé Jérémi lé a lɛ léé: Gakelebale ’ka i tɔ laa lɛ Pasuu lo; é i laama Magɔɔ‐Misabib.

⁴ Naa, Gakelebale léma: Bé ye, maa dan di kini lɛ i gi, bii valé i béénu faa nya; wo nyanézannu é dan wo gyɛ lɛ gwɔun nya i yuɛ va. Yé maa dan Juda munu faa pa lɛ Babilɔn nwiinzan blɛn lee, yé ’bɛ é dan go lɛ wo nya luu gi Babilɔn yé é dan wo gyɛ lɛ gwɔun nya.

⁵ Fla ’ko lé fuafɛnu faa koo, ana munu lé nyanama tɔnɔ faa koo, alé fɛwezannu faa koo, Juda nwiinzan blɛn lé fɛwezannu faa koo, maa dan wo nɔ lɛ wo nyanémunu lɛ. Wo dan wo si lɛ gla nya, yé wo go wo nya Babilɔn.

⁶ Yé bii Pasuu, bii valé ilé munu faa, ka dan go lɛ luu gi; i dan go lɛ Babilɔn yé i dan ga lɛ ’bɛna. Wo dan i pa lɛ ’bɛna, bii valé i béénu faa lé i balelawe fe wo lɛ vié nya bɛ, wo nya.

Jérémi gun gyɛ Bale lɛ

⁷ Gakelebale, i zɛ vɔ an ma yé maa nyi si, I an kun, i pla an nwiin; Yi faa do do ma, maa a wenanamazan nya, Munu faa an ma we nanaan.

⁸ Naa, dé maa a we fena bléyioo bléyian va, é a lé an siaa, É a lé an siaa munu lé wo ke glawe valé va kɛlɛna, wo ta. Yé Gakelebale dére kɛlɛ gwɛmawe valé an ma wenanawe nya yi faa do do ma, munu lee.

⁹ Dé maa fe léé: Maa ’ka dan a tɔ bɔra lɛ an ’léé é dɛrɛ lo, Maa ’ka dan we fe lɛ a tɔ gi é dɛrɛ lo, Tɔɔn, fɛ do kɛlɛ an bli gi bélé kyɛ zo, ’Té éé yaan an wɔlɛnu gi. An kwa kuli léé, an pla ’bɛ nwiin, naa, an ’ka bɔalɛ lo.

¹⁰ Maa mi kiɛre lé gun gyɛle ’ma, Yé wo léé: Yifaama, yifaama, we tɔntɔn, we tɔntɔn! ’Ka a tɔ laa, yé ko dan a tɔ fe lɛ. Munu faa lé wo bli ke an ma drɔɔ, Wa sin an ma vɔɔna léé, dé a sɔné é dan san lɛɛ? Wo léé: Dé é dan we do kɛlɛ lɛ é tanyila Yé ko a kuun? ’Té ko dan we lɛgi pa lɛ a ma.

¹¹ Naa, Gakelebale a an va bélé nyanazan plɛplɛ zo, Amalé nyanépaantazannu é dan dia lɛ; wo ’ka dan an kun lɛ lo. Wolé we ’ka dan vɔ lɛ a ma lo, amalé yara é dan wo gyɛ lɛ. É dan kɛlɛ lɛ yaragyɛwe lé a glɛ ’ka lo, ’té munu gi ’ka dan san lɛ a ma lo, a nya.

¹² Lai sunyanu lé Gakelebale éé mi tegele gi daan, Éé mi bli giwe valé a bɔn‐in bɔrɔlenu va ginian. Maa dan ilé we lɛgi pana ye lɛ wo ma, Naa, maa anlé we bɛ paan bii ɛ lee.

¹³ ’Ka lɛrɛ vɔ Gakelebale lɛ. ’Ka Gakelebale tɔ zin fe. Naa, éé nyanaizénlazannu sié mi nyanénu lee.

¹⁴ Yi lé wo an yaa a ta, ’wo bale pa a ma ma. An bu an yaa yian nya, Té a drɔɔ é vo lo ma.

¹⁵ Mi lé é da an yaawe fe lɛ an ti lɛ léé: Wo négɔné do yaa izé nya, ’Té a bli fan ginanale nya bɛ, ’Wo bale pa ’bɛzan ma ma.

¹⁶ Mi ’ko ’é kɛlɛ bélé fla lé Gakelebale a sɛrɛ, ’té a nyanai ’ka zén a ta lo, a zo. ’É dunnulenu ’ma é bladi ma, Yé ’é gulidan siaalenu ’ma é yiéyi ma.

¹⁷ Mɛmalé wo ’ka an gyɛ lɛ an bu bɔn gi loo? Mɛmalé an bu bɔn ’ka kɛlɛ lɛ an pana nya loo? Mɛmalé an ’ka vo lɛ an bu bɔn gi mi lɛɛfaama loo?

¹⁸ Mɛmalé maa bɔra an bu bɔn gi ’Té maa nyané valé kleblele ’ko yéé? ’Té anlé yinu éé giéan yaragyɛwe saa bɔle nya an maa?