Jérémi 2 - Kazambale lé Sebe Sauunu 1979

Bale we pla Jérusalɛm munu lɛ

¹ Gakelebale we fe an lɛ yé é léé:

² ’I go, yé ’i siaa Jérusalɛm munu tɔné gi léma: Gakelebale léma: An sɔ i lɛ i boroné la bléyi va fɛan zo, a sele a an gi. Ko ke si é dɛrɛ bléyian va, an wea i lee fɛan zo, ’Té i go an zuo bwi gi, Féi ’ka fɛana lo, ana, a sele a an gi.

³ Izraɛl a é pale é yɛrama Gakelebale zé nya Bélé féifɛ vinin zo; Munu faa lé wa blé, we a wo nwiin Yé wenaané bɔ wo ma; maa Gakelebale ɛ ke a fena.

⁴ Jakɔb lé kɔngimunu, Yé ’kaa faa lé ka ke Izraɛl kulunu nya, ’ka tɔné dɔ Gakelebale lɛ.

⁵ Gakelebale léma: Ka tranu mɛ weple ɛ ye an gi Yé wo si an ma baa Yé wo go boafɛnu zuo yé wobozen kɛlɛ boamunu nyaa?

⁶ Maa Gakelebale lé an wo si Éjipiti tɛrɛ la, wo ’ka an ta laan boenwo lo; An go wo nya bwi gi, Tɛrɛ lé fɛ do ’ka ana lo, ’té guru saa ke ana, Tɛrɛ lé ’yi ’ka a gi lo, ’té ga ke ana bɛ, Tɛrɛ lé mi do kpen ’ka giéan ana lo Yé mi do kpen ’ka nyanaan ana lo, an da wo nya ana ’naan, Yé wo ’ka an ta laan loo?

⁷ Tɛrɛ lé éé fɛ dɔa, an da ka nya ana, Léé, ka ana fɛporonu valé ana fɛ zimanu ble; Naa, ka bɔ ana tɔɔn, ka anlé tɛrɛ tiri dɔ, Yé ka anlé fɛna kɛlɛ bo zo.

⁸ Balebanmunu ’ka maa Gakelebale ta laan boenwo lo. Munu lé woo bélidɔwe paan munu gi, wo ’ka an dɔɔ lɛ lo. Bale lé munu tabinzannu ’ka kɛlɛ lɛ yarapawelamunu nya an ’lɛ lo. Balelayezannu balelawe fe Baal tɔ gi, Yé fɛnu lé wo ’ka bɔa mi va lo, wo go ’bɛnu zuo.

⁹ Amalé, maa dan we ble lɛ ka va plɛplɛ fɔɔ yé é bɔ ka nénénu va. Maa Gakelebale ɛ ke a fena.

¹⁰ ’Ka gié wɛyiworona tɛrɛ lé wa laama Kitim, a ta, yé ’ka nagini. ’Ka munu pa zia Kédaa tɛrɛ la yé ’wo a nagini téiin, Dé ’bɛ zoɛ we ana wo vaa?

¹¹ Bɛn lé é ézé balenu tavɔɔan Dɔlé ’té wo ’ka bale bozennu nya lo, ’bɛ bɛn a kyɛɛn? Naa, anlé munu wozé Fuabale tavɔɔ yonu lé wo ’ka bɔa mi va lo, wo nya.

¹² Oo lanu, ka gi ’é vuru we ’ko ma ma. Ka ma ’é nyɔɔn dikinile ka gi valé dunu zénle ka ta we ma. Maa Gakelebale ɛ ke a fena.

¹³ Naa, anlé munu wenyané gɔnɔ fié kɛlɛ: Maa lé, an ke bélé ’yi’wuo lé éé mi voo é yuɛma, a zo, wo an vo Yé ’yigurunu lé ’yi ’ka voo wo gi lo, wa bo wozé nya.

¹⁴ Izraɛl munu a luunu lé wo wo lɔ, wo nyaa? taa, wo wo yaa luu gii? Naa, mɛmalé wo kinin gulizarafɛ nyaa?

¹⁵ Golizra boronénu éé wé wo ma, woo siaan wo ta, Woo ’wiié wolé tɛrɛ ta; Kyɛ wolé flanu ble, mi ’ka nyanaan wona é dɛrɛ lo.

¹⁶ Nofa munu valé Tapanɛs munu é ziin, Wo dan ka nwun puiɛ lɛ tata.

¹⁷ Bléyian va lé Gakelebale kalé Bale a gona ka nya zi zima ta, Ka sɔn vɔ a ma, amalé we ’ko bɔ ka ma. Azoan é ke loo?

¹⁸ Yé sin, mɛmalé é sɔ ka lɛ léé, ka go Éjipiti tɛrɛ la Yé ka Nil yuu minii? Mɛmalé é sɔ ka lɛ léé, ka go Asiri tɛrɛ la Yé ka ’bɛna yuu minii?

¹⁹ Kalé we lɛrɛlɛrɛnu kɛlɛle valé kalé yuɛgiblanlenu é dan we lɛdɔ lɛ ka gi, Yé ka dan a ye lɛ yé ka dan a gi dɔɔ lɛ léé, Gakelebale kalé Bale vole, ’té a kana do kpen ’ka zén‐é ka gi lo, ’Bɛ a wenaané valé we lɛrɛlɛrɛ nya. Maa, Mizan, lagi sunyanu lé Gakelebale ɛ ke a fena.

²⁰ Ana mɔn ka ka bɔrɔ ma luubale kini Yé ka si luu gi, Yé ka léé: Ko ’ka a va léé, ko vo mi wuozannu nya é dɛrɛ lo; Naa, ka go gɔpanénu faa nwiin Yé ka go yili drɔɔdrɔɔnu faa wuo Yé ka yia wona bélé gɔnégini le zo.

²¹ An ka suru dɔrɔyili zima lé A gɔnɔ ke tegele, a féi nya. É kɛlɛ kaa yé sin ka dɔbɛ nɔla Yé ka kinin dɔrɔyili dɛn nyaa?

²² Dé ka zuru gwɛn sabli nyaoo, Dé ka sabli kiɛre giéan ka maoo, An dan kalé weple pagi ye lɛ an ’lɛ duowo. Maa Gakelebale ɛ ke a fena.

²³ É kɛlɛ kaa yé ka léé: Ko ’ka ko tiri dɔ lɛ lo, Ko ’ka go lɛ Baalnu zuo loo? ’Ka ka gane paginu nagini gɔ worona, Ka wean kɛlɛ, ’ka bɔn‐in bɔrɔ ’bɛ ma do. Ka a bélé nyɔgɔmé tina lé éé vlan borowo plɛplɛ, ’té éé giéan fɛfaana, a zo.

²⁴ Ka a bélé bwi gi sokofale tina lé éé nyanaan nyéné saa lé fɛna, a zo, ’Té éé koi sié alé gɔné lɔrɔ lé we ma; De ɛ dan alé blibɔmawe kɛlɛle yi ga lɛ a lee? Wo lé wo ke a ginina, é ’ka lé wo wɔlɛ gi é nyaa wo ma lo, Wo dan a ye lɛ a moné nya.

²⁵ ’Ka yuɛ pa kabozen va, té sawala é so ka gane ma lo. Té ka bɔrɔ gi é ga lo. Naa, ka léé: I a we plana ko lɛ é pla; Bale bɛnu lɔrɔ éé ko gya; ’ko go wo zuo.

We lɛdɔle Izraɛlnu gi yara lé

²⁶ Kyeenwozan lé wo bɔ a ma fiaa kyeenwona, yara a gya fɛan zo, a zo duo lé yara é dan Izraɛlmunu gyɛ lɛ, wo koo, wo nwiinzan blɛnnu koo, wo nwiinzannu koo, wolé Balebanzannu koo, wolé balelayezannu koo, woo lé.

²⁷ Wo lé yili lɛ léé: Bii a an ti nya. Yé wo lé gɔlɛ lɛ léé: Bii ɛ an bɔra tɛrɛ la. Naa, wo nwunzi dɔa an ta, wo ’ka yuɛ vɔa an ta lo. Yé dé wenaané bɔ ka ma bléyian va, ka léé: ’I nwa, ’i bɔ ko va.

²⁸ ’Té balenu lé ka wo kɛlɛ kazé nya, wa kyɛɛn? Dé wenaané bɔ ka ma bléyian va, wo bɔalɛ léé, wo ka si we gii? ’Wo nwa ma. Oo Juda munu, kalé flanu ’léé a kiɛre fɛan zo, a zo lé kalé balenu ’léé ke.

²⁹ Mɛmalé ka a za vɔna an lɔ maa? Ka ’ka nyanaan an wuo lo. Maa Gakelebale ɛ ke a fena.

³⁰ Maa ilé nénu bla, naa, ’bɛ tɔnɔ ’ka lo. Anlé we lɛdɔle wo gi ’ka wo yuɛ gi bɔ lɛ lo. Ka balelayezannu gyɛ gwɔun nya bélé fɛan zo lé golizra éé mi gya, a zo.

³¹ Bléyi ’ko va munu, ’ka bɔn‐in bɔrɔ Gakelebale dére ma. Maa kɛlɛ bélé nyéné saa lé fɛna zo Izraɛlnu lɛɛ? Maa kɛlɛ bélé tɛrɛ lé gunuti tiritiri ke é sɔɔlale a ta, a zoo? Mɛmalé anlé munu a fena léé: Ko a kobo ma, ko ’ka a va léé, ko nɔla i va é ziin loo?

³² Blɛnné gi éé saan é ’lɛrɛfɛnu maa? Bosizan gi éé saan élé fɛwezan maa? Naa, anlé munu gi san an ma yi kiɛre boen nya.

³³ Ka gɔné ginian ka zua fɛan zo bɛ, amalé ka we paan gɔnégini lomu gi.

³⁴ Yé nyanégyɛzannu valé weanwiinlozannu nyɛ a é zénle kalé varɔ gi, dɔlé ’té ka ’ka bɔ lɛ wo ma kɔn sɛrɛna yé wo wɔra a gi lo.

³⁵ Naa, duowo, ka léé: Iin, ko a weanwiinlozannu nya; a bli ’ka dan fli lɛ ko ma lo. Ka ye, an dan we ble lɛ ka va; ka léé, ’wo ’ka wenyané kɛlɛ lɛ pelo, azama.

³⁶ Mɛmalé ka a ta kelekele wona kalé zi nɔlale we maa? Éjipiti munu é dan ka gyɛ lɛ yara nya bélé fɛan zo lé Asiri munu ka gyɛ yara nya, a zo.

³⁷ Ana lé ka dan si lɛ, ka bɛ nya é plale ka nwiin. Naa, munu lé ka bli vo wo lɛ, Gakelebale sɔn vɔ wo ma, amalé a va ’ka dan gyɛ lɛ ka lee lo.