Jérémi 19 - Kazambale lé Sebe Sauunu 1979

Bɔ ’wiile

¹ Gakelebale we fe yé é léma: ’I go, ’i bɔ do lɔ bɔdɔzan lee. Yé mi segelenu valé Balebanzan segelenu wo pa i va.

² ’I go Bɛn‐Inom gɔ worona, ’té é ke bɔdɔkɔn ’léé bɛ, ana. ’Bɛna lé dére lé maa dan a fe lɛ i lɛ bɛ, bé zana dɔɔ.

³ Bé fe wo lɛ léma: Juda nwiinzannu valé Jérusalɛm munu, ’ka tɔné dɔ Gakelebale dére lɛ. Lai sunyanu lé Gakelebale, Izraɛl munu lé Bale léma: Ka ye, maa dan we tɔntɔn do kɛlɛ lɛ fɛkona lɛ, yé dé miomian é a zuo’ma, a tɔné zuogi éé wé, zeee.

⁴ Wo sɔn vɔ an ma; wo fɛkona sɔnné sɛrɛ; wo lasikɔrɔpo kyɛ ble bale bɛnu lɛ ana, balenu lé wo koo, wo tranu koo, Juda nwiinzan blɛnnu koo, wo ’ka wo dɔɔ lɛ é kyɛn lo, wo lɛ, yé wo weanwiinlozannu kiɛre nyɛ zana fɛkona;

⁵ yé wo gɔ nwiin yobannanu dɔ Baal zé nya, léé, wo ’wolé nénu kyɛ ble Baal lɛ ana, ’té maa ’ka wo béli dɔ lɛ ’bɛ nya lo, yé maa ’ka ’bɛ zoɛ we fe lɛ wo lɛ lo, yé maa ’ka bɔn‐in bɔrɔ lɛ ’bɛ ma monomono lo.

⁶ Bɛwemalé, Gakelebale léma: A yinu é dan bɔ lɛ yé wo ’ka dan fɛkona laa lɛ, Tofɛt valé Bɛn‐Inom gɔworona é dɛrɛ lo, naa, ’bɛ yinu la, wo dan a laa lɛ migyɛ gɔworona.

⁷ Fɛkona, maa dan Juda munu valé Jérusalɛm munu lé wepladérenu gi sɛrɛ lɛ tata. Maa dan wo gyɛ lɛ wo nyanézannu lé gwɔun nya, yee valé munu lé é sɔ ’bɛnu lɛ léé, ’wo wo gyɛ, ’bɛnu bɛ nya. Maa dan wo galenu nɔ lɛ lagi mianénu valé tɛrɛlawinu lɛ wolé fɛblele nya.

⁸ Maa dan fla ’ko kɛlɛ lɛ é ’bin nya, yé é dan kɛlɛ lɛ wenanamafla nya. Munu faa lé woo giéan a sɔnɔ, wo gi é dan vuru lɛ, yé wo dan ’furu fɛn lɛ wenaanénu faa lé é bɔ a ma bɛ, a we ma.

⁹ Maa dan a kɛlɛ lɛ léé, wo ’wo benu valé ’wo lunu wi ble, yé wo saa é dan ’wo ke wi ble lɛ. Wolé kleblele valé wolé nyanéblele ’ko, é si wo nyanézannu valé munu lé é sɔ ’bɛnu lɛ léé, ’wo wo gyɛ, wo va.

¹⁰ ’Bɛ zuo, ’i bɔ ’wii, munu lé ka go wo nya, wo yuɛ va.

¹¹ Yé bé fe wo lɛ léma: Lai sunyanu lé Gakelebale léma: A zo lé maa dan munu ’ko valé fla ’ko gɔrɔ ’wii lɛ, bélé fɛan zo lé woo bɔdɔzan lé bɔ ’wiié, ’té mi ’ka bɔa a ma’lɛrɛle lɛ é ziin lo, a zo. Yé mi pana nyaale lé we ma lé wo dan munu pa lɛ Tofɛt.

¹² Gakelebale léé: A zo lé an dan we kɛlɛ lɛ fɛkona valé ana munu lɛ, yé an dan fla ’ko kɛlɛ lɛ bélé Tofɛt zo.

¹³ Jérusalɛm kɔnnu valé Juda nwiinzannu lé kɔnnu, wo dan kɛlɛ lɛ fɛ lé wana sɔnné sɛrɛ, a nya, bélé Tofɛt zo; kɔnnu faa lé wo lasikɔrɔ kyɛ ble wo nwiin lagifɛnu faa ’lɛ, ’té woo baleban’yi zanaan bale bɛnu lɛ wo nwiin bɛ, woo lé.

¹⁴ Jérémi si Tofɛt, fɛana lé Gakelebale a nwunvɔ balelawe fele we ma, ana. ’Bɛ zuo yé é dɔ Gakelebale lé kɔn gɔrɔ gi, yé é lé munu faa lɛ léé:

¹⁵ Lai sunyanu lé Gakelebale, Izraɛl lé Bale léma: Ka ye, we tɔntɔnnu faa lé maa wo lɛ kini, maa dan wo bɔ lɛ fla ’ko valé a zi flanu ma. Naa, wo yuɛma dɔ an va plɛplɛ, yé wo ’ka tɔné dɔ lɛ an dérenu lɛ lo, azama.