Jérémi 18 - Kazambale lé Sebe Sauunu 1979

Jérémi go bɔdɔzan lé kɔn ’léé

¹ Gakelebale we fe Jérémi lɛ léma:

² ’I nwa, ’i go bɔdɔzan lé kɔn ’léé; ’bɛna lé an dan we fe lɛ i lɛ.

³ An go bɔdɔzan lé kɔn ’léé, ’té é a nyanama pana, ’té éé bɔdɔgi pawu nɔɔan.

⁴ Bɔ lé é ke a dɔna, é ’ka kɛlɛ lɛ é zima lo; ’bɛ zoɛ we éé bɔa bɔtɛrɛyɔɔ lé ke bɔdɔzannu lee, a ma; yé é a bɛ kɛlɛ é blibɔmale yɛrama.

⁵ Yé Gakelebale lé an lɛ léma:

⁶ Izraɛl munu, an ’ka bɔa kazé kɛlɛle lɛ bélé fɛan zo lé bɔdɔzan ’ko a kɛlɛ, a zo loo? Maa Gakelebale ɛ ke a fena. Izraɛlmunu, fɛan zo lé bɔtɛrɛyɔɔ ke é dɔzan lee, a zo lé ka ke an lee.

⁷ Yi ke nya an we fé, dé migɔnɔ do léé, dé bɛn do léé, wolé we ma, léé, ’wo wo si ana, ’wo wo gyɛ, ’wo wo kulu ga.

⁸ Naa, bɛn lé maa a mawe fe, dé é daan élé we lɛrɛlɛrɛ kɛlɛle ma, wenaané lé ke an bli gi léé, maa kɛla a lɛ, maa dan an bli si lɛ ’bɛ lɛ.

⁹ Yé yi ke nya an we fé, dé migɔnɔ do léé, dé bɛn do léé, wolé we ma, léé, ’wo nyana ’wo fla pa,

¹⁰ naa, dé ’bɛ bɛn ’ko wenaané kɛlɛ an yuɛ gi, dé é ’ka tɔné dɔ lɛ an lɛ lo, wezin lé ke an bli gi léé, maa kɛla a lɛ, an dan an bli si lɛ ’bɛ lɛ.

¹¹ Bé fe sin Judamunu valé Jérusalɛm munu lɛ léma: Gakelebale léma: Ka ye, an we tɔntɔn ma’lɛrɛ léé, ’é bɔ ka ma. Maa a an bɔn‐in bɔrɔna ka mawe do nya. Ka faa do do, ’ka daan ka kɛlɛwe nyanénu ma. ’Ka ka kɛlɛwe naanénu valé ka panyanamanu vo, ’ka a dɛrɛ sia.

¹² Naa, wo léé: We pla ’bɛ. Ko dan tawo lɛ kolé bɔn‐in bɔrɔlenu yɛrama; ko faa do do, ko dan we kɛlɛ lɛ ko bligiwe naanénu yɛrama.

Munu sɔn vɔ Bale ma

¹³ Amalé Gakelebale léma: ’Ka we laa bɛnnu lee. Mi kyɛn ɛ ’bɛ zoɛ we ’ma é kyɛɛn? Izraɛl munu lé ke bélé blɛnzan zo, tadanmawe lé é gié é glɛ la, wa kɛlɛ.

¹⁴ Liban tɛrɛla glasépun ’yi éé boo gɔlɛgɔ grɔgrɔnu nwiin? Taa, ’yinu lé woo sié baa, ’té wa drɔɔdrɔɔ, ’té woo yoroan, wa ye léé, woo béliéé?

¹⁵ Naa, alé munu gi éé saan an ma, woo lasikɔrɔpo kyɛ blé miyilinu lɛ, ’Té woo tawoo zi saanlenu ta, ’té woo sié zi kwanu ta, Yé woo goo zi bɛnu ta, zinu lé wo ’ka tegele lo, wo ta.

¹⁶ Wo ’wolé tɛrɛ kɛlɛ boatɛrɛ nya, ’té munu a ma we nanaan; Munu faa lé woo giéan ana, woo dɔa dan‐uun, ’té woo ’wuo nyɔɔn‐an.

¹⁷ Maa dan wo fwila lɛ wo nyanézannu ’lɛ bélé yirinwana fu a kɛla fɛan zo, a zo; Wolé klebleyi nya, maa dan an nwun zi dɔ lɛ wo ta, maa ’ka dan wo nagini lɛ lo.

Wo Jérémi mawe ble

¹⁸ Yé wo léé: ’Ka da, kaa gi pa Jérémi ma. Bélidɔwe ’ka dan si lɛ Balebanzannu lee lo; weplale ’ka dan si lɛ wedɔɔzannu lee lo; dére ’ka dan nyaa lɛ balelayemunu ’léé lo. ’Ka da, kaa Jérémi gyɛ kaa dére nya, té kaa tɔné dɔ a dére do kpen lɛ lo.

¹⁹ Gakelebale, ’i tɔné dɔ an lɛ. ’I an nyanézannu dére ’ma ma.

²⁰ Woo wezin lɛgi paan wenaané nyaa? Naa, wo guru bo an lee anlé tɛrɛla nyaale we ma. An da i va, an dɔle wolé we gi we ma, yee valé i bli dɔralale wo ma we ma; we ’ko sele ’é dɔ i gi ma.

²¹ Bɛwemalé ’i wolé nénu gyɛ lɔrɔ nya ma; ’i wo gyɛ gwɔun nya ma; wolé lomu lé nénu ’é ga ma, yé lomu ’é kɛlɛ gyɛzaralomu nya ma. Wo zananu ’é ga bawurumagyɛ lee ma; guli ’é wolé pɛniɛnu gyɛ ma.

²² Bléyian va lé sunya palunu bɔra wo ma fiaa, ’wo siaale ’ma wolé kɔnnu gi ma; naa, wo guru bo an kunle we ma, yé wo séli vɔ an lee, azama.

²³ Yé bii Gakelebale, an mawe faa lé wa blé léé, ’wo an gyɛ, bé gi dɔɔ. Té i wo ma we vo wolé weplenu ma lo; té wolé wenyané é saan i gi lo. ’I wo guru zana a gi i ’lɛ; ’i we kɛlɛ wo lɛ i bli flibléyi va.