Jérémi 17 - Kazambale lé Sebe Sauunu 1979

We lɛdɔle Judanu gi

¹ Juda munu lé wenyané a é gyɛle foliɛwɔlɛ biki nya, diaman lé wa lɛ ma bo, a nya. É a é gyɛle wo bli ta, yee valé wolé balebannanu lé bélinu ma.

² Woo bɔn‐in bɔrɔan wolé nénu ma fɛan zo, a zo duo lé woo bɔn‐in bɔrɔan wolé balebannanu ma, yé a zo duo lé woo bɔn‐in bɔrɔan wolé miyilinu lé wa laama Asataté, ’té woo wo dɔa yili drɔɔdrɔɔnu wuo, ’bɛ valé gɔpanénu nwiin bɛ, wo ma.

³ Ka wenyané kɛlɛ fɛfaana kalé tɛrɛ la, amalé maa zi nɔ fɛsiéglanyazannu lɛ léé, wo kalé fɛnu si ka lee; ka leefɛnu valé kalé fɛwezannu faa, wo dan wo faa si lɛ kalé féinu ta, wo dan wo faa si lɛ anlé gɔ blɛn nwiin kalé gɔ nwiin yobanna na.

⁴ Ka pagi lé we ma lé tɔnɔ lé maa a nɔ ka lɛ bɛ, é dan san lɛ ka lee. Ka dan kɛlɛ lɛ ka nyanézannu wuozannu nya, tɛrɛ lé ka ’ka ana dɔɔa lo, ana. Naa, ka anlé bliflile nwa bélé kyɛ zo, amalé an bli flile ’ka dan nyaa lɛ lo.

⁵ Gakelebale we fe yé é léma: Mian éé paan blami ta, ’Té éé mi kɛla é tɛngizan nya, ’Té éé bli sié Gakelebale lɛ, ’wo bale pa ’bɛzan ma.

⁶ É a bélé nyanaizénlazan zo nyéné saa lé fɛna, Yé é ’ka ginanamawe yé bɔna ’bɛna lo, a zo. Éé nyanaan nyéné saa lé fɛna lé éé mi kyɛ blé, ana. Tɛrɛ lé wɛ ke a ma, ’té mi ’ka nyanaan ana lo, ana.

⁷ Mian éé paan Gakelebale ta, ’té a bli ke Gakelebale lɛ, ’Bɛzan drɔɔ a é vole.

⁸ É a bélé yili lé wa suru ’yi sɔnɔ, ’Té a suninu éé goo ’yiyoro va, a zo. É ’ka yɛrɛgabléyi gi dɔɔa lo, Yé a laa drɔɔdrɔɔ ’ka nyaan lo. Dé lɛɛ ’ka da lɛ lɛɛan gi lo, é ’ka ’bɛ kana paan lo, Yé a poro baale ’ka sié a nwiin lo.

⁹ Mi bli ’ka zi yɛrama lo; é a é nyané; De ɛ bɔa mi bli lé we dɔɔle lɛɛ?

¹⁰ Maa, Gakelebale, maa mi bli gi daan, maa mi gi kulian, Léé, an mi do do faa banwo wolé tawobɛ yɛrama, É valé wo panyanamanu yɛrama.

¹¹ Doo éé buaan nyɛné lé é ’ka a vɔ lɛ lo, a ta fɛan zo bɛ, A zo duo lé mi lé éé fua blé dabli nya, a zo lé alé we ke. Alé tɛrɛla é dan bɔi lɛ a ta yé é si wo zi, Yé é kɛlɛ ’tugyɛzan nya é voéla.

¹² Webleblin tɔbɔle, ilé we a blɛn bléyi faa va, I a kolé munu lé fɛna sauun nya.

¹³ Gakelebaleoo, Bale, Izraɛl munu bli a bii ɛ lɛ. Munu faa lé wo sɔn vɔ i ma, yaragyɛwe é dan bɔ lɛ wo ma. Munu lé wo nwun zi dɔ an ta, wo dan wo tɔ gyɛ lɛ tɛrɛ va. Naa, maa Gakelebale lé an ke mi vo é yuɛma ’yi’wuo nya, wo sɔn vɔ an ma, azama.

Jérémi lé Bale lɛ léé, ’é bɔ ’é va

¹⁴ Gakelebale, ’i an béli, yé an dan béli lɛ. ’I an si we gi, yé an dan si lɛ we gi, naa, an bii ɛ tɔ bɔa.

¹⁵ Bé ye, wo lé an lɛ léé: Gakelebale dére a kyɛɛn? A lɛ ’é sɔɔ ma.

¹⁶ Yé maa, maa i lɛdɔ a ma. Maa ’ka sɔn vɔ lɛ an kɛlɛle Bale lé munu pazan nya ma lo; yé bé gi dɔɔ léé, maa ’ka a va léé, yi tɔntɔn é bɔ lo; wean é bɔra an ’léé, maa a fe gɔrɔ la.

¹⁷ Té i kana vɔ an gi lo; bii ɛ ke an yɔɔna nya we tɔntɔn bɔyi nya.

¹⁸ Munu lé woo nyané paan an ta yaragyɛwe ’é bɔ wo ma ma. Té yarawe é bɔ an ma lo ma. Wo ma ’é nyɔɔn ma, naa, té an ma é nyɔɔn lo ma. ’I we tɔntɔn bɔ wo ma ma. ’I dunuzénmitawe bɔ wo ma fié ma.

Flinyi sɔnné pale

¹⁹ Gakelebale we fe an lɛ yé é léma: ’I go flagɔrɔ ’léé lé wa laama munu lé nénu, ’té Juda nwiinzan blɛnnu woo wɔraan ’té woo bɔraan ’bɛna, ana. ’I dɔ ana yé ’i dɔ Jérusalɛm flagɔrɔ ’léé nuu.

²⁰ Bé fe wo lɛ léma: ’Ka tɔné dɔ Gakelebale dére lɛ. Juda munu nwiinzan blɛn koo, Juda munu faa koo, ka faa lé ka ke Jérusalɛm munu nya, ’té ka wɔraan gɔrɔ ’ko ’léé bɛ, ka koo, ’ka tɔné dɔ ma.

²¹ Gakelebale léma: ’Ka yuɛ pa kabozen va kaboen lé we ma. Té ka kɔné do kpen si flinyi nya lo, té ka wɔra kɔné do kpen nya Jérusalɛm gɔrɔ gi flinyi nya lo;

²² Té ka kɔné do kpen si kalé kɔn gi flinyi nya lo, té ka nyanama do kpen pa lo. Naa, ’ka flinyi ye kalé yi nyané nya, maa a fe ka tranu lɛ fɛan zo, a zo.

²³ Wo ’ka ’wo tɔné dɔ lɛ an lɛ lo; wo ’ka an ban lɛ ’wo tɔné nya lo. Wo kɛlɛ yuɛma plɛplɛzannu nya, léé, wo ’ka ’wo tɔné dɔa lo, té wo we paa ’wo gi lo.

²⁴ Gakelebale léma: Dé ka tɔné dɔ an lɛ, dé ka ’ka wɔra lɛ fla ’ko la kɔné do kpen nya ka nwiin flinyi nya lo, dé ka flinyi ’ko ye kalé yi nyané nya, dé ka ’ka nyanama do kpen pa lɛ ’bɛ yi ’ko nya lo,

²⁵ ’té minwiinzan blɛnnu valé mi blɛnblɛnnu éé dan nyana lɛ David lé webleblin ta. Wo dan wɔra lɛ fla ’ko gɔrɔ gi, ’té wa é vɔle goronu gi valé wisoonu ta; wo koo, wo nwiinzannu koo, Juda munu koo, Jérusalɛm munu koo, woo lé, yé munu é dan kɛlɛ lɛ fla ’ko ta lɛɛfaama.

²⁶ Munu é dan si lɛ Juda tɛrɛ la flanu koo, Jérusalɛm zi flanu koo, wona; wo dan si lɛ Bɛnjamɛn tɛrɛ koo, gɔ worona koo, gɔ nwiin koo, yirinwana bɛyilazia koo, wona, ’té winu lé wa kyɛ blé koo, sarakanu koo, blɛnu koo, lasikɔrɔpo lé wa kyɛ blé koo, wo dan da lɛ wo nya Bale bɔvɔ sarakanu bole we gi Gakelebale lé kɔn gi.

²⁷ Naa, dé maa ka béli dɔ léé, ’ka flinyi kɛlɛ yi nyané nya, té ka kɔné do kpen si a yi nya lo, té ka kɔné do kpen wɔra Jérusalɛm flinyi nya lo, naa, dé ka ’ka ka tɔné dɔ lɛ an lɛ lo, ’té maa dan kalé flagɔrɔ ’léé duolinu kyɛ vɔ lɛ, yé é dan Jérusalɛm lé fuakɔnnu kyɛ ble lɛ yé é ’ka dan diri lɛ pelo.