Jérémi 15 - Kazambale lé Sebe Sauunu 1979

Juda munu sɛrɛle

¹ Gakelebale lé an lɛ léma: Dé é kɛlɛ kɔɔn léé, Moizi valé Samuɛl dɔ munu ’ko lé we gi an ’lɛ, an bli ’ka dan dɔrala lɛ munu ’ko ma lo. ’I wo bin an lɛ baa, ’wo si ana yé ’wo go ma.

² Yé dé wa laa i lee léé: Ko go kyɛɛn? bé zi pa léma: Gakelebale léma: Munu lé wozé ke ga nya, ’wo ga ma; Munu lé wozé ke gwɔun nya, ’wo ga gwɔun ’léé ma; Munu lé wozé ke lɔrɔ nya, ’wo ga lɔrɔ nya ma; Munu lé wozé ke luubale nya, ’wo kɛlɛ luu nya ma.

³ Gakelebale léé: Maa dan bawurumagyɛ ziɛn pa lɛ wo lɛ zia; gwɔun lé wo gyɛle koo, blénnu lé wo ganale koo, lagi mianénu valé tɛrɛlawinu lé wo blele valé wo sɛrɛle koo, woo lé.

⁴ Maa dan wo kɛlɛ lɛ kanaleefɛ nya tɛrɛla bɛnnu faa lɛ, Judanu nwiinzan blɛn Ézékia be Manasé lé we ma, yee valé we faa lé é a kɛlɛ Jérusalɛm, ’bɛ lé we ma.

⁵ Jérusalɛm, de ɛ dan nyanai zén lɛ i taa? De ɛ dan wuvɔ lɛ ilé we maa? De ɛ dan go lɛ ilé we nagini lɛɛ?

⁶ Gakelebale léé: I sɔn vɔ an ma, yé i go i zuo zia, Naa, maa an bɛ soi i ma, yé maa i kulu ga; An wɔlɛ gi nyaa an ma, nyanai zénle i ta we ma.

⁷ Maa wo fɛɛan anlé fu nya fɔɔ tɛrɛ ’ko glɛ ta; Maa né kele anlé munu ma, maa wo kulu ga, Wo ’ka si lɛ wo kɛlɛwenu zuo lo, azama.

⁸ Alé gyɛzaralomu é dan kɛlɛ lɛ kiɛre é mini wɛyi gɔɔn ma nyéné ta, Gulidanzan boroné koo, é bu bozen koo, Maa dan kulugazan pa lɛ zia wo ɛ ma É yiéyi boenwo. Yé nyané blɛn blele valé di kinié mi gi we é dan bɔra lɛ wo ma fiaa.

⁹ Lezan lé a benu ke sɔrafié, alé tɛrɛla lɔrɔ nyaa a ma, Yeeboen lɛ bo, Azé yiri vɔ yiri vɔle ’lɛ, Yara a gyɛ; yaragyɛwe bɔ a ma. Munu lé wo vo ana, maa wo pa ’wo nyanézannu lé gwɔun lee. Maa Gakelebale ɛ fe.

Jérémi gun gyɛ Bale lɛ

¹⁰ An buoo, i an yaa wenaanébɔmazan nya. Maa ɛ ta lé zavɔle valé wesiale ke tɛrɛ faa la. Maa ’ka vɛɛn sié lo, maa ’ka drɔn paan lo, naa, duowo, munu faa éé bale paan an ma.

¹¹ Gakelebale léé: Webozen lé, izé é dan kɛlɛ lɛ néné é voéla; webozen lé, maa dan glawe kɛlɛ lɛ i nyanézan lɛ yé é dan é ’wuo wɔra lɛ i gane wuo, we tɔntɔn bɔbléyi valé kleblebléyi va.

¹² Kalé gulidanfɛnu lé ke foliɛwɔlɛ nya bɛ, wo bɔalɛ léé, wo yirinwana bɛbolazia tɛrɛlamunu lé foliɛwɔlɛ valé wolé zéné wii?

¹³ Maa ka leefɛnu valé kalé fɛwezannu no munu lé woo fɛ sian gla nya, wo lɛ, wenyanénu faa lé ka a kɛlɛ fɛfaana kalé tɛrɛ la, wolé we ma.

¹⁴ Maa dan ka valé ka nyanézan pa lɛ zia tɛrɛ lé ka ’ka a dɔɔa lo, a ta, naa, anlé bliflile a bélé kyɛ lé wa bi, a zo; é nwa ka ma.

¹⁵ Oo Gakelebale, i we faa dɔɔ, an sele ’é dɔ i gi ma; té i gi é san an ma lo ma; ’i anlé we lɛgi pa klepaantazannu ma ma. Dé i bli kɛlɛ tiéé wo ma, an dan ga lɛ. Wo serele bo an ma i tɔ lé we ma; we ’ko sele ’é dɔ i gi ma.

¹⁶ Maa i dérenu ye yé maa wo ble; i dérenu a an bli gi néné yé woo an gi nanaan; naa, Gakelebale, lai sunyanu lé Bale, wo i tɔ laan an ta.

¹⁷ Maa ’ka nyana lɛ mi ma wenanazannu va léé, an gi ’é nana wo va lo; naa, ilé plɛplɛ lé we ma lé an nyana an do; naa, bii an fan wɛwɛ nya.

¹⁸ Mɛmalé an nyané blé bléyi faa maa? Mɛmalé an manɔn éé yaan yé é ’ka sɔ lɛ a lɛ léé, é nyaa loo? I dan kɛlɛ lɛ an lɛ bélé dabli ’yibɔna zoo? Bélé yuu lé é ’ka yoroan é dɛrɛ lo, a zoo?

¹⁹ Amalé Gakelebale léma: Dé i bu vɔ an ma é ziin, maa dan a zi pa lɛ, yé i dan dɔ lɛ an ’lɛ; dé i fɛwezannu sié fɛ naanénu va, i dan kɛlɛ lɛ bélé an ’léé zo; é a lé munu é da i va é ziin, é ’ka lé bii é nɔla wo va é ziin lo.

^20-21 Maa dan i kɛlɛ lɛ munu ’ko va bélé kɔnguru plɛplɛ lé wa dɔ zéné nya, a zo; wo dan guli dan lɛ i va, naa, wo ’ka dan i kele lɛ lo; naa, an dan kɛlɛ lɛ i va, i bélile valé i sile we gi we ma. Maa dan i si lɛ mi nyanénu lee, maa dan i si lɛ glawe kɛlɛzannu lee. Maa, Gakelebale ɛ ke a fena.