Jérémi 14 - Kazambale lé Sebe Sauunu 1979

Yiri bile plɛplɛ

¹ Gakelebale we fe Jérémi lɛ yiri bile we ma, yé é léma:

² Juda munu a gyɛ bona, Alé flamunu bli kyɛ a é dɔle, gyɛbosɔnu a é zénle wo ta, yé wa é yiale tɛrɛ va, Yé Jérusalɛm munu dére éé nwaan siaale nya.

³ Mi segelenu éé né kiénénu nwunvɔa ’yi tɔna, Yé nénu éé goo ’yibagi, yé wo ’ka ’yi yé a gi lo; Woo nɔlaan bɔ koro nya wo lee. Yara wo gyɛ; wo kua yara nya yé wo sɔ zén ’wo ’wuo ma.

⁴ Tɛrɛ kyɛ dɔ, Lɛɛ ’ka dan tɛrɛ la lo, azama. Yé yara féipazannu gyɛ yé wo bɛ bua ’wo yara.

⁵ Bwigigan é ziin, Éé né yaan yé éé daan a ma, Lu drɔɔ ’ka lo, azama.

⁶ Bwi gi sokofalenu éé dɔa gɔpané nwiin, ’Té woo flin‐é fɛ gin sile we ma bélé méné zo; Lu drɔɔdrɔɔ ’ka lo, amalé wo yuɛ gi zun.

⁷ Dé kolé weplenu éé kɛla ko ma kolé wenayezan nyaoo, Gakelebale ’i we kɛlɛ i tɔ lé we ma; Naa, ko yuɛ gi blan namɔn, Ko wenyané kɛlɛ i ma.

⁸ Bii lé, Izraɛl munu bli ke i lɛ, léé, I a wo siéwegizan nya wolé kleblebléyi va, Mɛmalé i a kɛlɛna bélé bɛn zo tɛrɛ ’ko taa? Bélé giézan lé é yii do kpen yé é go, a zoo?

⁹ Mɛmalé kwa vɔ i lɔlu la a zoo? Bii lé i ke nyanazan nya, mɛmalé i ’ka bɔa ko sile lɛ we gi loo? Naa, Gakelebale, bii a ko méléna duowo, Yé woo i tɔ laama ko ma; Té i sɔn vɔ ko ma lo.

¹⁰ Ka ye, Gakelebale munu ’ko ma we fe yé é léma: Vlan burule fɛfaana sɔ wo lɛ. Wo ’ka bɔa wobo kunle lɛ yé wo nyana fɛ dona lo; amalé an ’ka bɔa kunle lɛ wo ma lo. Wolé weplenu sele dɔ sin an gi, yé an we lɛdɔa wo gi wolé wenyanénu ma.

¹¹ Yé Gakelebale lé an lɛ léma: Té i munu ’ko lé muun pa lo.

¹² Dé wo lɔrɔ sɔn‐oo, maa ’ka dan an tɔné dɔ lɛ wolé welaadére lɛ lo. Dé wo wi kyɛ ble an lɛoo, dé wo blɛ kɛlɛ an lɛoo, maa ’ka dan ’bɛ ban‐ɛn ble lɛ lo; naa, é sɔ an lɛ léé, maa wo kulu ga, gwɔun koo, lɔrɔ koo, migyɛgyɛ koo, wo nya.

¹³ Maa a zi pa léma: Aa! Mizan, Gakelebale, bé ye, balelayezannu lé wo lɛ léé: Ka ’ka dan gwɔun ye lɛ lo, lɔrɔ ’ka dan ka gyɛ lɛ pelo; naa, Bale é dan vole drɔɔ bozen nɔ lɛ ka lɛ fɛkona.

¹⁴ Yé Gakelebale lé an lɛ léma: Balelayezannu éé vié woo an tɔ gi; maa ’ka ’bɛ balelayezannu ’ko pa lɛ zia lo, maa ’ka dére ’ko pa lɛ wo ’léé lo, maa ’ka ’bɛ fe lɛ wo lɛ lo. Vié yuɛziwenu lé wa ye; wolé we lɛ kinile a we pla nya; dabliwenu lé woo sié ’wo bli gi, yee lé wa fe balelawefele nya.

¹⁵ Bɛwemalé Gakelebale we fe balelayezannu lé woo balelawe fé a tɔ gi, ’té é ’ka wo pa lɛ zia bɛ lo, ’té wa fé léé, gwɔun valé lɔrɔ ’ka dan da lɛ tɛrɛ ’ko la lo, wolé we ma, yé é léé: balelayezannu ’ko, wo dan zamaga wo lɛ gwɔun valé lɔrɔ nya.

¹⁶ Yé munu lé wo balelawe fe ’bɛnu lɛ, ’bɛnu galenu é dan dia lɛ Jérusalɛm zinu ta, lɔrɔ valé gwɔun pagi nya. Wo koo, wo nanu koo, wo benu koo, wo lunu koo, wo pazan do ’ka dan kɛlɛ lɛ ana lo; maa dan wolé we lɛrɛlɛrɛnu nɔla lɛ wo ma.

¹⁷ Bé fe wo lɛ léma: É yiéyi valé é béli an yuɛyi a yorona, Yé é ’ka kinié lo; Naa, wenaané blɛn bɔ anlé munu ma, Manɔn yaale baba bɔra wo ma.

¹⁸ Dé an go féioo, gwɔun gyɛzannu a ’bɛna; Dé an da flaoo, lɔrɔgyɛzannu a ’bɛna. Balelayezan boen valé Balebanzan woo nɔɔan tɛrɛ ’ko la, Yé wo ’ka wo gona dɔɔa lo.

Munu nyanainya dére vɔ Bale lɛ

¹⁹ I sɔn vɔ Juda ma weboen nyaa? Yé biiboen Siɔn yé naaninvɔmafɛ nyaa? Mɛmalé éé ko blaan Yé ko bélifɛ do ’ka ana loo? Ko bli a vole drɔɔ lɛ, naa, ginanawe do kpen ’ka ana lo, Ko bli a ko bélile lɛ, yé bé ye, yoyo zén ko gi.

²⁰ Gakelebale, kolé wenaanénu valé ko tranu lé weplenu ginin dɔ ko gi; Naa, ko wenyané kɛlɛ i ma.

²¹ I tɔ lé we ma, té i nyé yéli ko ma lo; Té i tɛrɛ zén ilé webleblin tɔ ta lo. Gipawe lé kaa kɛlɛ bɛ, té i gi é san a ma lo, té bé sɛrɛ lo.

²² Bɛnnu faa lé miyilinu vazan do éé lɛɛ daan? taa, La ɛ lɛɛ daan? Lɛɛdazan ’ka bii Gakelebale kolé Bale nya loo? Ko bli a bii ɛ lɛ, Naa, bii ɛ ke fɛnu ’ko faa kɛlɛzan nya.