Jérémi 13 - Kazambale lé Sebe Sauunu 1979

Lɛn kyɛsidi lé we

¹ Gakelebale we fe an lɛ yé é léma: ’I go, ’i lɛn kyɛsidi lɔ izé nya yé bé dɔ i gyɛn; naa, té bé vɔ ’yi va lo.

² Maa kyɛsidi lɔ, dérean Gakelebale a fe an lɛ, a yɛrama, yé maa a dɔ an gyɛn.

³ Gakelebale dére fe an lɛ a gɔnɔ fiézan nya yé é léma:

⁴ Kyɛsidi lé bé lɔ, ’té é ke é dɔle i gyɛn bɛ, bé si, ’i nwa, ’i go Yufrat yuu ba gi yé bé yɔɔ ’bɛna gɔlɛfee gyɛna.

⁵ An go, yé maa a yɔɔ Yufrat yuu sɔnɔ, Gakelebale a fe an lɛ fɛan zo, a zo.

⁶ Yi kenu giéle zuo, Gakelebale lé an lɛ léé: ’I nwa, ’i go Yufrat yuu ba gi yé kyɛsidi lé bé yɔɔ yi la ’bɛna an dére ta bɛ, yé bé si.

⁷ An go Yufrat yuu ba gi, yé maa kun ana fwile ma, yé kyɛsidi lé maa a yɔɔ bɛ, yé maa si; naa, kyɛsidi sɛrɛ; é ’ka vo lɛ é zima é dɛrɛ we do kɛlɛfɛ nya lo.

⁸ Gakelebale we fe an lɛ.

⁹ Gakelebale lé an lɛ léma: ’Ko zo lé maa dan Juda munu lé boblɛn yi ga lɛ, yee valé Jérusalɛm munu lé boblɛn baba nya.

¹⁰ Mi nyanénu ’ko lé wo ’ka ’wo tɔné dɔa an dérenu lɛ lo, ’té woo gibɔrɔan ’wolé blibɔmawenu ma yé wo go bale bɛnu zuo bɛ, ’té woo ’bɛnu bɔa ’té woo diaan ’bɛnu ’lɛ, wolé we ’é kɛlɛ bélé kyɛsidi ’ko lé é ’ka vo lɛ é zima é dɛrɛ lo, azé zo ma.

¹¹ Naa, woo kyɛsidi dɔa mi gyɛn fɛan zo bɛ, a zo lé an Izraɛl lé munu faa yere an ma, é valé Juda lé munu faa nya, léé, ’wo kɛlɛ anlé munu koo, an tɔ koo, an tɔbɔle koo, anlé fua koo, wo nya; naa, wo ’ka ’wo tɔné dɔ lɛ an lɛ pelo. Maa Gakelebale ɛ ke a fena.

Dɔrɔ zéngibɔnu ma gɔnévɔle

¹² Bé fe wo lɛ léma: Gakelebale, Izraɛl lé Bale léma: Bɔnu faa é dan fan lɛ dɔrɔ nya. Yé wo dan a fe lɛ i lɛ léé: Ko ’ka a gi dɔɔa léé, bɔ faa é dan fan lɛ dɔrɔ nya loo?

¹³ Yé bé fe wo lɛ léma: Gakelebale léma: Ka ye, maa dan tɛrɛ ’ko la munu faa bɔn fan lɛ yee ɛ zo; minwiinzan blɛnnu lé woo nyanaan David lé webleblin ta koo, Balebanzannu koo, balelayemunu koo, Jérusalɛm munu faa koo, maa dan wo faa gyɛ lɛ dɔrɔ nya.

¹⁴ Maa dan wo vɔ lɛ ékema, munu valé ’wo benu, maa dan wo ’wuo zun lɛ ékema. Maa ’ka dan wo do vo lɛ lo, an nyanai ’ka dan zén lɛ wo ta lo, maa ’ka dan wuvɔ lɛ wo ta lo, we do ’ka dan wo kulu gale yi ga lɛ an lee lo. Maa Gakelebale ɛ ke a fena.

Jérémi we pla wo lɛ boblɛn lé we ma

¹⁵ ’Ka tɔné dɔ yé ’ka an ban ka tɔné nya. Té ka kɛlɛ boblɛnzannu nya lo. Naa, Gakelebale a we fena.

¹⁶ ’Ka fua nɔ Gakelebale kalé Bale lɛ A dale gunutinu nya ’lɛ, Ka gane sɔnéwɔlɛ sanle gɔnu ma gunutinu va ’lɛ. Ka dan san dale lɛbɛn lɛ, Yé é dan san ’ko nɔla lɛ gafurɔ nya. É dan a nɔla lɛ gunuti tiritiri nya.

¹⁷ Dé ka ’ka ka tɔné dɔ lɛ an lɛ lo, Maa dan wuvɔ lɛ kyeen gi kalé boblɛn lé we ma. An yuɛyi é dan yoro lɛ, Wo go Gakelebale lé trubɛnu nya luu gi, azama.

¹⁸ Bé fe minwiinzan blɛn valé minwiin le lɛ léé: Tɔkoro lé é ke ka nyɛɛfɛ nya, é si ka ’wuo ma, é dia, amalé ’ka nyana tɛrɛ va.

¹⁹ Kalé fla blɛnnu lé é ke yirinwana bɛyilazia, wo gɔrɔ lɛ a é tanle, wo lɛsozan ’ka lo; wo go Juda munu faa nya luu gi, wo go wo faa nya luu gi é ta lé kɔn‐an.

²⁰ ’I yara nwa, yé munu lé wa sina yirinwana bɛbolazia, ’i wo nagini. Trubɛnu lé wa nɔ i lɛ, ’té wo ke ilé fua tɔbɔ trubɛnu nya bɛ, wa kyɛɛn?

²¹ É we lɛdɔ i gi, i lé ’bɛ gi nɔɔ? Biibozen we paa wo gi léé, ’wo kɛlɛ izan nya; i ’ka dan kle ble lɛ bélé né yaa le lé né a kun, a zo loo?

²² Dé bé fe i bli gi léé: Mɛmalé we ’ko bɔ an maa? Ilé weple di lé we ma lé wo ilé sɔ si i ta gla nya yé i dɔ é porole.

²³ Étiopi mi éé bɔa é kɔlɛ nɔlale lɛɛ? Kua éé bɔa é kɔlɛ vɔɔle nɔlale lɛɛ? A zo duo lé, ka lé, wenaané kɛlɛlɛ vɔ ka lee, ka bɔaléé, ka wezin kɛlɛɛ?

²⁴ Maa dan wo fwila lɛ bélé fɛan zo lé nyéné saa lé fɛna fu éé lɔɔ fwilaan fɛan zo, a zo.

²⁵ Maa i kɛlɛwe dan; izé ma ban lo; i gi san an ma, yé i pa vié ta, azama. A zo lé Gakelebale a fe.

²⁶ Maa dan ilé sɔ lɔlunu nwa lɛ fɔɔ yé é bɔ i yara, yé yaragyɛwe lé é bɔ i ma bɛ, yé munu a ye.

²⁷ Maa ilé mi bɛ naginilenu ye, yé maa i wele a zuo ’ma; ilé wenaané lé bé kɛlɛ pɛnpɛnné gyɛle nya gɔpanénu nwiin valé féinu ta, maa wo ye; maa ilé bozowenu ye. Bii Jérusalɛm, we tɔntɔn kɛlɛ i lɛ; i tiri é dan vo lɛ é dɔle yifaamaa?