Jérémi 12 - Kazambale lé Sebe Sauunu 1979

Jérémi we laa Bale lee

¹ Gakelebale, bii a tegele fɛan zo bɛ, é ’ka dɔ lɛ an gi léé, an zavɔ i va lo; Naa, duowo, maa a a va léé, maa we fe ilé weblele ma. Mɛmalé i mi nyanénu ma wenu nyian woo? Mɛmalé i dablikɛlɛmunu voo é yuɛma drɔɔ?

² I wo suru bélé yili zo yé wo suni wɔra; Yé wo tin, yé wo poro baa; I tɔ a wo ’léé, Naa, wo bli a é sile i ma baa.

³ Yé bii Gakelebale, i an dɔɔ, I an yé, an bli lé ke i lɛ bɛ, bé gi ginian. ’I wo si ana bélé ’blanu lé woo wo bɔrɔ bo, wo zo, Yé ’i wo tadɔ wo gyɛyi zé nya.

⁴ Tɛrɛ ’ko é dan gyɛ bo lɛ yifaamaa? Yé féi faa ta lunu é dan ga lɛɛ? Winu valé mianénu a zamaga wona Flamunu lé we lɛrɛlɛrɛ kɛlɛle we ma; Naa, wo léé: É ’ka dan kozé tɛrɛla ’wuoplana ye lɛ lo.

⁵ Dé i vlan za kɛlɛ ganela munu va yé koi i gyɛ ’naan, I bɔa za kɛlɛle lɛ wisoonu va kaa? Yé dé tɛrɛla a bléyian va drɔɔ, dé i ’ka iboma duaa lo ’naan, Dé Juudɛn yuu bɔra bwi la bléyian va, i dan mɛ ɛ kɛlɛ lɛɛ?

⁶ Naa, ibo bwenu valé i ti lé kɔngimunu i paan i nyanézannu lee, ’Té wobozen éé plaan i ta, Dé wo béé la glewo i va, té i bli é vo ’bɛ lɛ lo.

Bale bli kyɛ dɔ alé munu lé we ma

⁷ An sɔn vɔ anlé kɔn ma. An daan anlé tɔnɔfɛnu ma. Maa an sɔlɛzan bɔra é nyanézannu lɛ.

⁸ Anlé tɔnɔfɛ kɛlɛ an lɛ bélé golizra zo pɔrɔ gi, É ’é gi gunu an ma, Amalé maa a za pa.

⁹ Anlé tɔnɔfɛ kɛlɛ an ma wiblemiané nya; é kɛlɛ glau nya; Yé é ziin wiblemianénu faa é dan si lɛ fɛfaana, yé wo péli vɔ a ma. ’Ka go, ’ka bwigiwinu faa zén ékeva, ’Ka da wo nya yé ’wo yee tɔnɔfɛ ble.

¹⁰ ’Blatabinzannu kiɛre ’wii anlé dɔrɔféi ta, Woo anlé féi zɔn‐o ’wo gane nya; Woo anlé ginanama féi kinié bwi nya, Wa kɛlɛ fɛna tété nya.

¹¹ Wa kɛlɛ bwi nya; É a gyɛ bona, tɛrɛla lɔrɔ nyaa a ma an yuɛ gi. Naa, wo ’wii tɛrɛ faa ta, ’Bɛ we ’ka mi do kpen yuɛ gi bɔ lɛ lo.

¹² Fɛsɛrɛzannu éé sié bwi gi fɛna nwalenu faa na, Naa, Gakelebale lé gwɔun mi gyɛle sia tɛrɛ glɛ do la fɔɔ yé é bɔ a glɛ koɛ la; Vole drɔɔ ’ka mi do kpen zé nya lo.

¹³ Wo buruwɔlɛ zima vɔ féi yé wo lélinu gyɛ fɛgyɛbléyi va. Wo ’wo wɔlɛ gi nyaa wo ma é pla, ’té a tɔnɔ ’ka lo. Fɛ lé ka a gyɛ féi, Gakelebale lé bliflile blɛn zuo bɛ, Yara ’é ka gyɛ a ma ma.

Bale we fe Izraɛl punmazannu lɛ

¹⁴ An zi bɛn nyanénu lé woo nwaan tɔnɔfɛ lé Bale a nɔ élé munu Izraɛl lɛ, a ma bɛ, Gakelebale wo ma we fe yé é léma: Ka ye, maa dan wo si lɛ wolé tɛrɛ la, yé maa dan Juda munu si lɛ wo méléna.

¹⁵ Naa, dé maa wo si ana faa, ’bɛ zuo an nyanai é dan zén lɛ wo ta é ziin, yé an dan da lɛ wo faa nya wolé tɔnɔyefɛna do do, wolé tɛrɛ la do do.

¹⁶ Dé anlé munu kɛlɛwe vɔ wo lee, dé wo an tɔ ’nyɔɔn a fele nya léé: Gakelebale a é yuɛma, bélé fɛan zo lé wo Baal ’nyɔɔnle paa anlé munu gi bɛ, a zo, ’té wo gi é dan nana lɛ zin yele we ma anlé munu méléna.

¹⁷ Naa, dé wo ’ka ’wo tɔné dɔ lɛ we do lɛ lo, maa dan ’bɛ zoɛ bɛn kulu ga lɛ; maa dan wo kulu ga lɛ, yé maa wo gyɛ za ma. A zo lé Gakelebale a fe.